မဲခေါင်၊ ဒီဇင်ဘာ ၅
ပြည်တွင်းခရီးစဉ်များတွင် လားရှိုး၊ မူဆယ်၊ တန့်ယန်း၊ လောက်ကိုင်ဒေသနှင့် ရှမ်းအရှေ့မှ ၁၃/ မှတ်ပုံတင် ကိုင်သူများအား လက်မှတ်မရောင်းဟု ခရီးသည်များအား သတိပေးနေရကြောင်း ခရီးသွားများနှင့် ခရီးသည်တင် ယာဉ်လိုင်းများထံမှ သိရသည်။
၁၃/ မှတ်ပုံတင် ခရီးသည်များ သတိပေးချက်ဟု ဖော်ပြကာ မွန်ပြည်နယ်အပြင် အခြားခရီးစဉ် အားလုံးတွင်လည်း စိစစ်ခြင်းများ စတင် လုပ်ဆောင်နေသည်ဟု ခရီးသည်အချို့က ဆိုသည်။
ရှမ်းပြည်မှတ်ပုံတင် ၁၃/ကိုင်ဆောင်သူများ အနက်တွင်မှ အထူးသဖြင့် မြောက်ပိုင်း၊ လားရှိုး၊ မူဆယ်၊ တန့်ယန်း၊ လောက်ကိုင်ဒေသ မှတ်ပုံတင်များအား စစ်ကောင်စီက စိစစ်ခြင်း၊ တွေ့ရှိချက်အပေါ် မူတည်ပြီး အရေးယူခြင်းများ ရှိနေကြောင်း သိရသည်။
လတ်တလောတွင် ကလော၊ အောင်ပန်း၊ တောင်ကြီး စသည့် ရှမ်းတောင်ဒေသမှ ၁၃/ မှတ်ပုံတင် ကိုင်ဆောင်သူများသာ လွတ်ကင်းမှု ရှိကြောင်း ယာဉ်လိုင်းအချို့က ဆိုသည်။
“၁၃/ မှတ်ပုံတင်ပိုင်ရှင်က အစိုးရဝန်ထမ်းဆို ရပါတယ်၊ မဟုတ်ရင်တော့ မရပါဘူးရှင့်” ဟု ယာဉ်လိုင်း လက်မှတ်ရောင်းတစ်ဦးက ပြောသည်။
ခရီးသည်အချို့၏ ပြောပြချက်အရ ယာဉ်လိုင်းအချို့မှာ ကန့်သတ်ချက်မရှိဘဲ ရောင်းချသော်လည်း မန္တလာမင်း အပါအဝင် ယာဉ်လိုင်းအချို့မှာ ကန့်သတ်မှုများရှိကြောင်း သိရသည်။
သို့ရာတွင် မည်သည့် တိုက်ပွဲမျှ မဖြစ်သည့် ရှမ်းအရှေ့ နေထိုင်သူများကိုလည်း ယင်းကဲ့သို့ ကန့်သတ်ခံရခြင်း အပေါ် နားမလည်နိုင်ကြောင်း ရှမ်းအရှေ့ ဒေသခံများက ပြောသည်။
“မြန်မာပြည် တစ်ပြည်လုံးမှာ ရှမ်းအရှေ့လောက် အေးချမ်းတာမရှိ ဘာဖြစ်လို့ စစ်ဆေးခံထဲမှာ ရှမ်းအရှေ့ပါ နေရတာလဲ၊ သေနတ်သံ မပြောနဲ့ ငှက်ပစ်တဲ့ တူးမီးသံတောင် မကြားရဘူး” ဟု ကျိုင်းတုံ ဒေသခံတစ်ဦးက ဝေဖန်သည်။
လက်ရှိ၌ မွန်ပြည်နယ်နှင့် ဘားအံဘက်အထွက် ဂိတ်များတွင် ၁၃/ ကိုင်ဆောင်သူ ရာနှင့်ချီ ထိန်းသိမ်း စစ်ကြောနေကြောင်း သတင်းများထွက်လာပြီးနောက် ယာဉ်လိုင်းများတွင် ယခုကဲ့သို့ လက်မှတ်အရောင်း ကန့်သတ်ချက်များ ပေါ်ထွက်လာခြင်း ဖြစ်သည်။
#MeKongNews
#ရှမ်းမြောက်
#မှတ်ပုံတင်
#ယာဉ်လိုင်း
#လက်မှတ်မရောင်း
