မဲခေါင်၊ နိုဝင်ဘာ ၂၈
၂၀၅၀ တွင်ဂျာကာတာမြို့ ရေအောက်သို့နစ်မြုပ်မည်ဟု ကြိုတင်တွက်ဆထားသဖြင့် တောအတွင်း မြို့သစ်ကြီး စတင်တည်ဆောက်နေပြီဖြစ်သော်လည်း ဂျာကာတာမြို့နေလူဦးရေသည် ထပ်မံတိုးသထက် တိုးမြင့်လာနေပြီး ကမ္ဘာ့လူဦးရေအထူထပ်ဆုံးမြို့အဖြစ် ထိပ်ဆုံးမှ ရပ်တည်နေကြောင်း သိရသည်။
ယခင်က တိုကျို၊ ကိုင်ရို၊ ဆော်ပေါ်လိုနှင့် ဒါကာမြို့များသည် လူဦးရေအထူထပ်ဆုံးဖြစ်ခဲ့သော်လည်း ယခု အင်ဒိုနီးရှားမြို့တော် ဂျာကာတာသည် မှီတင်းနေထိုင်သူပေါင်း ၄၁ ဒသမ ၉ သန်းဖြင့် ကမ္ဘာ့လူဦးရေအများဆုံး မြို့ဖြစ်လာကြောင်း ကုလသမဂ္ဂ ထုတ်ပြန်ကြေညာချက်အရ သိရသည်။
လူဦးရေများလွန်းသဖြင့် မြေအောက်ရေ သုံးစွဲမှုလည်း အလွန်များပြားသလို ပင်လယ်ကမ်းရိုးတန်း နိုင်ငံလည်းဖြစ်သောကြောင့် ဂျာကာတာမြို့သည် ပြီးခဲ့သည့် ၁၀ နှစ်အတွင် မြေအောက်သို့ ၂ ဒဿမ ၅ မီတာ နိမ့်ဆင်းသွားခဲ့သည်။
တချို့နေရာများတွင် တစ်နှစ် ၂၅ စင်တီမီတာနှုန်း မြေနိမ့်ကျမှုများရှိနေခြင်းသည် အခြားသော ကမ္ဘာတစ်ဝန်းမှ ကမ်းရိုးတန်းနိုင်ငံများ မြေနိမ့်ကျမှုထက် ၂ ဆ မြင့်မားနေသဖြင့် လက်ရှိမှာပင် မြို့တစ်ဝက်သည် ပင်လယ်ရေမျက်နှာပြင်အောက်သို့ ရောက်ရှိနေသည့် ဂျာကာတာမြို့ ကြီးသည် ၂၀၅၀ ပြည့်နှစ်တွင် အလုံးစုံ ရေအောက်ရောက်သွားနိုင်သည်ဟု သိပ္ပံပညာရှင်များက ခန့်မှန်းထားသည်။
ထိုအခြေအနေကြောင့် အင်ဒိုနီးရှားအစိုးရသည် ၂၀၂၂ ခုနှစ်မှ စတင်ပြီး ပိုမိုမြင့်မားသည် တောကြီးအလယ်၌ မြို့ပြောင်းရန် နျူဆန်တရာဆိုသော မြို့သစ်စီမံကိန်းကို စတင်ဆောက်လုပ်နေခဲ့ပြီဖြစ်ရာ အဆင့် ၅ ဆင့်မြင့် ၂၀၄၅ ခုနှစ်အပြီး ဆောက်လုပ်ကာ မြို့ပြောင်းရန် လုပ်ဆောင်နေရာ ဘတ်ဂျက် ဒေါ်လာ ၃၅ ဘီလီယံ ထုတ်သုံးမည်ဖြစ်သည်။
ဂျာကာတာမြို့ကြီးလည်း ရေအောက်မရောက်သွားစေရေး အင်ဒိုနီးရှားအစိုးရသည် အစွန်းရောက်ဖြေရှင်းမှုအဖြစ် ဒေါ်လာ ဘီလျံ ၄၀ အသုံးပြုကာ မြို့နှင့်ပင်လယ်အကြား ကြီးမားသည့် ရေတားတံတိုင်းကြီး တည်ဆောက်ရန် စီစဉ်နေသည်။
သို့သော် ဂျာကာတာမြို့နေလူဦးရေသည် စဉ်ဆက်မပြတ်တိုးပွားလာနေသလို မြေအောက်နိမ့်ကျသထက် နိမ့်ကျလာနေသော်လည်း လူများနေထိုင်ရန် အဆောက်အအုံသစ်များစွာကို ဆက်လက်ဆောက်လုပ်နေသေးသည့်အတွက် ပိုမိုလျှင်မြန်စွာဖြင့် မြို့ ပင်လယ်ရေအောက်ရောက်မည့်အရေး ကြုံနေသည်။
ဘန်ဒေါင်းနည်းပညာတက္ကသိုလ်မှ ဟာရီအန်းဒရီးယက်က်စ်က “၂၀၅၀ မှာ ဂျာကာတာ ရေအောက်နစ်မြုပ်သွားနိုင်တယ်ဆိုတာ ရယ်စရာ မဟုတ်ဘူး။ လေ့လာထားမှုတွေအရ ၂၀၅၀ ဆိုရင် အကုန်မဟုတ်တောင် ဂျာကာတာမြောက်ပိုင်း ၉၅ ရာခိုင်နှုန်းလုံးက ရေအောက်ရောက်မှာ” ဟု စိတ်ပျက်လက်ပျက် ပြောသွားခဲ့သည်။
အင်ဒိုနီးရှားအိမ်ယာဖွံ့ဖြိုးရေးအသင်း အကြံပေးကောင်စီဝင် အက်ဒီဂါနီဖိုက “လူနေတိုက်ခန်းတွေ ဆက်ရောင်းနေသရွေ့ ဆောက်လုပ်ရေးလုပ်ငန်းသစ်တွေက ဆက်လုပ်နေဦးမှာပဲ။ လူများလေ မြေအောက်ရေသုံးစွဲမှုများလေ မြို့က မြန်မြန် နိမ့်ဆင်းလာလေပဲဖြစ်ဦးမှာပါ” ဟု ညည်းညူပြောဆိုသွားခဲ့သည်။
အင်ဒိုနီးရှားအစိုးရသည် ဂျာဗားပင်လယ်နှင့် ဂျာကာတာမြို့ကြား ဒေါ်လာ ဘီလျံ ၄၀ အကုန်ခံ တည်ဆောက်မည့် တံတိုင်ကြီးပြီးလျှင် မြေအောက်ရေ သုံးစွဲမှု လျှော့ချရန် မိုးရေလှောင်ကာ ရေပေးမည့် ဆည်ကြီးတစ်ခုကိုပါ တည်ဆောက်သွားရေး လျာထားသော်လည်း ထိုလုပ်ရပ်များသည် ပင်လယ်ရေကြောင်းစနစ်များကို ပြောင်းလဲစေခြင်း၊ အနီးအနားရှိကျွန်းများ ပိုမိုရေအောက်ရောက်သွားနိုင်ခြင်း၊ ဂေဟစနစ်ပျက်ဆီးခြင်းနှင့် မြို့တွင်းရှိ မြစ်များ ရေပုပ်အိုင်များအသွင်ဆောင်လာနိုင်ခြင်းတို့ ကြောင့် သဘာ၀ပတ်ဝန်းကျင် စောင့်ရှောက်ရေးသမားများ၏ ဝေဖန်မှုများလည်း ခံနေရသည်။
ကိုကလင်း
Ref: Thesun
#MeKongNews
#အင်ဒိုနီးရှား
#ဂျကာတာ
#လူနေထူထပ်
#သဘာဝဘေး
