မဲခေါင်၊ နိုဝင်ဘာ ၂၇
စစ်ကောင်စီက ၅၀၅ – က ပုဒ်မဖြင့်ဖမ်းဆီးပြီး ကျိုင်းတုံထောင်တွင် အကျဉ်းကျနေသူ ၁၁ ဦး ယနေ့ နိုဝင်ဘာ ၂၇ ရက်တွင် ပြန်လည် လွတ်မြောက်လာကြောင်း အကျဥ်းထောင်နှင့် နီးစပ်သူများထံမှ သိရသည်။
ကျိုင်းတုံထောင်မှ ယနေ့ လွတ်မြောက်လာသူအားလုံးမှာ အမျိုးသားများ ဖြစ်ကြောင်းလည်း သိရသည်။
လက်ရှိ လွှတ်ပေးသူများမှာ လွတ်ရက်နီးများဖြစ်ပြီး လာမည့် ရွေးကောက်ပွဲတွင် မဲပေးခွင့် မဆုံးရှုံးစေရန်ဟု စစ်ကောင်စီက အကြောင်းပြထားသည်။
“လွှတ်ပေးတာတော့ ကောင်းတယ်၊ အမှုဖွင့်တာတွေကို ပိတ်သိမ်းပြီဆိုပြီး ပြန်ဝင်လာရင်သာ အခြားပုဒ်မနဲ့ စွဲမှာကြောက်ရတာ။ သတိထားကြဖို့ပါ ”ဟု အထက်မြန်မာနိုင်ငံ နိုင်ငံရေးအကျဥ်သားဟောင်းများကွန်ရက် အဖွဲ့ဝင်တစ်ဦးက သတိပေးသည်။
စစ်ကောင်စီက နိုင်ငံရေးအရ ဖမ်းဆီးခံထားရသူ၊ ကြေညာထားခံရသူများသည် ၅၀၅ – က သာမက ၅၀၅ (ခ)နှင့် အကြမ်းဖက်ပုဒ်မများဖြင့်အမှုတွဲထားခြင်းများရှိနေသဖြင့် ၅၀၅ – က မှ လွတ်သော်လည်း အခြားပုဒ်မများ ကျန်ရှိနေဆဲဖြစ်သည်။
“အခုက ၅၀၅ မှာ ‘က’ ကြီးပဲ ပါတာ၊ ၅၀၅(ခ) မပါတော့ ကျမတို့ မပါဘူးဖြစ်နေတယ်။ ၅၀၅ – က က အကြည်ညို ပျက်စေမှုပဲ၊ ၅၀၅(ခ) ကျတော့ လှုံ့ဆော်မှုတဲ့။ အမှန်က ‘ခ’က မှ နိမ့်သေးတာ၊ ဘာပဲဖြစ်ဖြစ် လေ လွှတ်တယ်ပြောပြီး ဖမ်းချင် ဖမ်းနေမှာဆိုတော့ မပြန်သေးဖို့ သေချာသွားတာပေါ့”ဟု ၅၀၅ – က ဖြင့်အမှုဖွင့်ခံရပြီး နောက်ပိုင်းတွင် ၅၀၅(ခ)သို့ ပုဒ်မပြောင်းခံရသူ ချင်းမိုင်ရောက် နိုင်ငံရေး တက်ကြွလှုပ်ရှားသူတစ်ဦးက မဲခေါင်သို့ ပြောသည်။
စစ်အာဏာသိမ်းပြီးနောက်ပိုင်း ဖမ်းဆီးခံခဲ့ရသူ စုစုပေါင်း ၃၀၀၃၁ ဦးရှိပြီး ၎င်းတို့အနက်မှ ၂၂၇၀၈ ဦးမှာ ထိန်းသိမ်းခံနေရဆဲဖြစ်ပြီး ယင်းထဲမှ ၁၁၄၂၅ ဦးမှာ ထောင်ဒဏ် ချမှတ်ခံထားရကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း – AAPP က နိုဝင်ဘာ၂၆ ရက်တွင် ထုတ်ပြန်ထားသည်။
#MeKongNews
#ကျိုင်းတုံထောင်
#အကျဉ်းကျ
#၅၀၅-က
#လွတ်မြောက်
