မဲခေါင်၊ နိုဝင်ဘာ ၆
ထိုင်းနိုင်ငံ လုံခြုံရေးကော်မတီ ဥက္ကဌ ရန်ဆီမန်ရုမ်းက မိမိတို့ကော်မတီသည် လေ့လာစစ်ဆေးမှုများကို အချိန်အတိုင်းအတာတစ်ရပ်ယူခဲ့ပြီးနောက် ကျားဖြန့်ကွန်ရက်နှင့်ပတ်သက်နေသည့် သံသယတရားခံ ၄၃ ဦးအမည်စာရင်းကို တင်သွင်းကာ စုံစမ်းစစ်ဆေးသွားနိုင်ရေး လုပ်ဆောင်မည်ဟု နိုဝင်ဘာ ၅ ရက်၌ ထုတ်ပြန်သွားခဲ့သည်။
ထိုင်းနိုင်ငံသည် နိုင်ငံတကာမျက်နှာစာတွင် ကျားဖြန့်လုပ်ငန်းများဖွံ့ဖြိုးလည်ပတ်နိုင်မှု ကြီးထွားလာစေ ရေး အထောက်အပံ့များစွာပေးနေသောနိုင်ငံအဖြစ် မြင်နေရခြင်းတွင် ဝန်ကြီးချုပ်အပါ သက်ဆိုင်ရာ အဖွဲ့အစည်းများက လုံလောက်သည့် အရေးယူမှုများမလုပ်ဆောင်ခြင်းကြောင့်ဖြစ်ကြောင်း၊ ထို့ကြောင့် မကြာမီ သံသယတရားခံထိုင်းနိုင်ငံသားနှင့် ပူးပေါင်းဆောင်ရွက်သူပေါင်း ၄၃ ယောက်အမည်စာရင်း အား လ၀ကဗျူရို၊ ရဲတပ်ဖွဲ့နှင့် စုံစမ်းစစ်ဆေးရေးတပ်ဖွဲ့များအပါ သက်ဆိုင်ရာ အဖွဲ့အစည်းများထံသို့ တင်သွင်းပြီး အထောက်အထားအချက်အလက်များပိုမိုရရှိနိုင်ရေး ပူးပေါင်းဆောင်ရွက်ခြင်းဖြင့် စစ်ဆေးသွားရန် တင်ပြသွားမည်ဟု ရန်ဆီမန်ရုမ်းက ပြောကြားခဲ့သည်။
ယင်းစာရင်းတွင် ကျားဖြန့်သံသယခေါင်းဆောင်များအဖြစ် အမေရိကန်နှင့်နိုင်ငံတကာမှ ပိတ်ဆို့ အရေးယူထားသည့် ဘန်စမစ်၊ ခေါက်အန် (Kok An)၊ Yim Leak၊ Huione Pay၊ Zheng Heng Group၊BIC Group နှင့် BIC Bank တို့ ပါဝင်မည်ဖြစ်သလို BIC Bank ဥက္ကဌလုပ်ခဲ့ပြီး ငွေကြေးခဝါချမှုများ ပူးပေါင်းလုပ်ဆောင်သည်ဟု စွပ်စွဲခံထားရသည့် Sathit Limpongpan တို့ပါဝင်မည်ဖြစ်ကြောင်း ထုတ်ပြန်သွားခဲ့သည်။
နိုင်ငံပေါင်းများစွာ၌ နိုင်ငံသားကတ်များကိုင်ဆောင်ထားသည်ဟု သိရသော ဘန်စမစ်သည် ထိုင်းတွင် နိုင်ငံသားခံယူခွင့်တောင်းခံခဲ့ရာ အခွန်မရှင်းလင်းမှုကြောင့် ပယ်ချခံရသော်လည်း ပိုမိုဖော်ထုတ်နိုင်မည့် စုံစမ်းစစ်ဆေးဖော်ထုတ်မှုများမလုပ်ဘဲ ထိုင်းအာဏာပိုင်များက ရပ်ဆိုင်းခဲ့မှုအား စစ်ဆေးရမည်ဟု ရန်ဆီမန်ရုမ်းက ဆိုသည်။
ကမ္ဘောဒီးယားကျားဖြန့်ရပ်ဝန်း၌ အဓိကကျသူဟု သံသယထားခြင်းခံရသော ခေါက်အန်သည်လည်း ထိုင်းနိုင်ငံသားကတ်မကိုင်ဆောင်ထားသော်လည်း ထိုင်းတွင် အမြဲတမ်းနေထိုင် ခွင့်ရသူဖြစ်နေခြင်းမှာ သံသယရှိစရာများစွာရှိပြီး အင်တာပိုမှ အနီရောင်အဆင့် တရားခံဟု ထုတ်ပြန် ပြီးမှ အမြဲတမ်းနေထိုင်ခွင့်ရုပ်သိမ်းရာတွင်လည်း ပွင့်လင်းမြင်သာမှုမရှိ၊ စုံစမ်းစစ်ဆေးမှု အချက်အလက်များ တိကျစွာ ရယူထုတ်ပြန်ခြင်းမရှိခဲ့သဖြင့် ကမ္ဘောဒီးယားသို့ ထွက်ပြေးနေသည်ဆို လျှင်ပင် ထိုင်းသို့ ပြန်ပို့ပြီး စစ်ဆေးအရေးယူသင့်ကြောင်း ပြောဆိုခဲ့သည်။
ထိုင်းငွေကြေးခဝါချမှုတိုက်ဖျက်ရေးရုံး (AMLO) သည်လည်း Yim Leak ဆိုသူကျားဖြန့်ကွန်ရက်နှင့်ပတ်သက်သည့် စွပ်စွဲချက်များတွင်း ငွေကြေး လွှဲပြောင်းမှု အချက်အလက်ဟောင်းများကိုသာ လက်ကိုင်ထား ထုတ်ပြန်ပြီး ယခုမှ နောက်ပိုင်း ငွေကြေး အလွှဲအပြောင်း အချက်အလက်များထုတ်ပေးရန် ပူးပေါင်းလာခြင်းအတွက် စုံစမ်းဖော်ထုတ်ရ မည်ဖြစ်ကြောင်း၊ အမေရိကန်မှ ပိတ်ဆို့အရေးယူမှုများပြုလုပ်ခဲ့သော ကမ္ဘောဒီးယားနှင့် ထိုင်းတွင်ပါ ရုံးများ ထူထောာင်ထားသည့် ကျားဖြန့်ငွေကြေးခဝါချ ကုမ္ပဏီ Prince Group နှင့်ပတ်သက်ပြီး ထိုင်ဝမ်နိုင်ငံသား ခေါင်းဆောင်သော အဖွဲ့ဖြစ်သော်လည်း ထိုင်ဝမ်အာဏာပိုင်များက စုံစမ်းမှုတွင် ပူးပေါင်းပါဝင်မှု ယခုထိ လုံး၀မပြုလုပ်သေးကြောင်း ရမ်ဆီမန်ရုမ်းက ပြောသည်။
BIC Group and BIC Bank တွင် ဥက္ကဌ လုပ်ခဲ့ဖူးသူ Sathit Limpongpan သည် တစ်နှစ်သာတာဝန်ထမ်းဆောင်စဉ် စီးပွားရေးသမားတစ်ဦး မှ လာဘ်ထိုးရန် ကြိုးစားမှုခံရသော်လည်း စွပ်စွဲသလို တစ်လဘတ်သန်း ၅၀ ဝန်းကျင် ရယူခဲ့သည်ဆို ခြင်းမှာ မဟုတ်မှန်ဘဲ အမှားမလုပ်ခဲ့ဟု ငြင်းဆိုမှုကိုလည်း စုံစမ်းစစ်ဆေးရမည်သာဖြစ်ကြောင်း ရန်ဆီမန်ရုမ်းက ရဲရဲတောက် ပြောဆိုသွားခဲ့သည်။
လက်ရှိ ထိုင်းဝန်ကြီးချုပ်သည် စုံစမ်းစစ်ဆေးရေးတာဝန်ရှိ အဖွဲ့အစည်းများကို အကန့်အသတ်မဲ့သုံးနိုင် သည့် ချက်လက်မှတ်အလွတ်များထုတ်ပေးသည်က ချက်ချင်း အရေးယူသင့်သည် ကိစ္စဖြစ်နေသလို AMLO ကိုမူ စစ်ဆေးရန် မည်သည့် အမိန့်ထုတ်ခြင်း၊ စစ်ဆေးခိုင်းခြင်းများမလုပ်သည်မှာ သဘာ၀ မကျ ကြောင်း၊ အခြားနိုင်ငံများ ကျားဖြန့်တိုက်ဖျက်မှုအတွက် အားကြိုးမာန်တက်လုပ်နေစဉ် နာမည်အပျက် ဆုံးဖြစ်နေသည့် မိမိတို့ နိုင်ငံအကြီးအကဲများက ထိရောက်သော၊ ကျိုးကြောင်းဆီလျှော်သော၊ လုံလောက်သော စုံစမ်းစစ်ဆေးဖော်ထုတ်အရေးယူမှုများ မလုပ်သည်က ရှက်စရာကောင်းနေသည်ဟု ထိုင်းအတိုက်အခံ ပြည်သူ့ပါတီမှ ထက်မြက်သော ပါတီခေါင်းဆောင်တစ်ဦးလည်းဖြစ်သူ ရန်ဆီမန်ရုမ်း က ပြတ်သားစွာ ပြောဆိုသွားခဲ့သည်။
ကိုကလင်း
Ref: The Nation
#MeKongNews
#ထိုင်းနိုင်ငံ
#ကျားဖြန့်
#ရမ်ဆီမန်ရုမ်း
#လွှတ်တော်
