မဲခေါင်၊ အောက်တိုဘာ ၁၀
အောက်တိုဘာ ၁၀ ရက် မြန်မာစံတော်ချိန် မွန်းလွဲ ၃ နာရီခွဲတွင် နော်ဝေနိုင်ငံ အော်စလိုမြို့၌ ပေးအပ် ချီးမြှင့်ခဲ့သော ၂၀၂၅ နိုဘယ်ငြိမ်းချမ်းရေးဆုကို အများထင်သလို အမေရိကန်သမ္မတ ဒေါ်နယ်ထရမ့် မရရှိဘဲ ဗင်နီဇွဲလားမှ ဒီမိုကရေစီသူရဲကောင်း မာရီယာကော်ရီနာမာချာဒို ရရှိသွားခဲ့သည်။
ဒေါ်နယ်ထရမ့်သည် ဒုတိယမြောက် သမ္မတ သက်တမ်း ၉ လအတွင်း အိန္ဒိယ-ပါကစတန်၊ ထိုင်း -ကမ္ဘောဒီးယား ကာလတိုစစ်ပွဲများအပါ စစ်ပွဲ ၈ ခုကို ငြိမ်းချမ်းရေးပွဲစားအဖြစ် ကြားဝင်ဆောင်ရွက်ပေးနိုင်ခဲ့သောကြောင့် မိမိထက် ငြိမ်းချမ်းရေးပိုစွမ်းဆောင်နိုင်သူမရှိနိုင်ဟု ဆုပေးပွဲမတိုင်ခင် ပြောကြားခဲ့သေးသည်။ အစ္စရေးနှင့် ဟားမက်စ်တို့၏ ၂ နှစ်ကြာ ဂါဇာစစ်ပွဲသည်လည်း ဒေါ်နယ်ထရမ့်ကြောင့် အောက်တိုဘာ ၁၀ ရက်တွင် ပထမအဆင့် အပစ်အခတ်ရပ်စဲရေးနှင့် ဓားစာခံနှင့် သုံ့ပန်းများ လဲလှယ်နိုင်ရေး သဘောတူစာချုပ်နိုင်ခဲ့ရာ မိမိ၏ အအောင်မြင်ဆုံး ငြိမ်းချမ်းရေးပွဲစားလုပ်မှုဟု ထရမ့်က ဆိုခဲ့သေးသည်။
သို့သော် နိုဘယ်ဆုအတွက် ၅ ဦးပါ ကော်မတီက ပြီးခဲ့သည့် အောက်တိုဘာ ၆ ရက်နေ့က တည်းက ငြိမ်းချမ်းရေးဆုရှင်ကို လျှောက်ထားသည့် လူပုဂ္ဂိုလ်နှင့်အသင်းအဖွဲ့ ၃၃၈ ခုထဲမှ ရွေးချယ်ထားပြီးဖြစ်ခြင်းကြောင့် ဂါဇာ ငြိမ်းချမ်းရေးကိစ္စသည် ထိုဆုံးဖြတ်မှုတွင် မပါဝင်နိုင်ခဲ့ပေ။
အမေရိကန်သမ္မတများသမိုင်းတွင် ဒေါ်နယ်ထရမ့်သည် ၅ ယောက်မြောက် နိုဘယ်ငြိမ်းချမ်းရေးဆုရှင် အဖြစ် မှတ်တမ်းဝင်လိုသည်ဟု ဝန်ခံပြောဆိုထားသော်လည်း ဆုရွေးချယ်ရေးအဖွဲ့က ထူထောင်သူ ဆွီဒင် ဓာတုဗေဒ ပညာရှင် အဲဖရတ်နိုဘယ်ဆန္ဒ၌ တိုင်းရင်းသားများအကြား ညီရင်းအစ်ကိုကဲ့သို ချစ်ခင်ရေး၊ အာဏာရှင်တပ်မတော်များ ဖျက်သိမ်းရေး သို့မဟုတ် လျှော့ချရေးနှင့် ငြိမ်းချမ်းရေး ကွန်ဂရက်များ ဖွဲ့စည်းခြင်းနှင့် ပြန့်ပွားရေးတို့အတွက် အဓိက အားစိုက်ကြိုးပမ်းသူများအတွက် ဆုက အဓိကထား စဉ်းစားပေးသဖြင့် ဗင်နီဇွဲလားပြည်သူများ ဒီမိုကရေစီအခွင့်အရေးများ ခံစားရရှိစေရေး အတွက် စစ်အာဏာရှင်စနစ်မှ ဒီမိုကရေစီစနစ်သို့ ကူးပြောင်းနိုင်ရန် အစွမ်းကုန် ပေးဆပ်လုပ်ဆောင် နေသော မာရီယာကော်ရီနာ မာချာဒိုကို နိုဘယ်ဆု ပေးအပ်လိုက်သည်ဟု ကြေညာသွားခဲ့သည်။
အစောပိုင်းကတည်းက ဒေါ်နယ်ထရမ့်သည် အဆိုးရွားဆုံးဖြစ်နေသော ရုရှား၏ ယူကရိန်းကျူးကျော် စစ်အပေါ် တားဆီးနိုင်မှုမရှိသေးခြင်း၊ နိုင်ငံတကာ ငြိမ်းချမ်းရေးနှင့်သာယာ၀ပြောရေးအတွက် အဓိက အထောက်အပံ့များများကို ဖြတ်တောက်လိုက်ခြင်း၊ ကမ္ဘာ့ကျန်းမာရေးအဖွဲ့၊ UNHCR ၊ ပါလက်စတိုင်း ရန်ပုံငွေအဖွဲ့ UNRWA တို့အား ထောက်ပံ့မှုရပ်စဲလိုက်ခြင်း၊ ICJ နှင့် ICC ကဲ့သို့သော နိုင်ငံတကာ တရားစီရင်ရေး ရုံးများကို မျက်ကွယ်ပြုခြင်း၊ ဂါဇာတွင် အစ္စရေးမှ လူမျိုးတုံး ဗုံးကြဲတိုက်ခိုက်နေမှု၌ တစ်ကြိမ်တစ်ခါမျှ ဝင်ရောက်တားဆီးခြင်းမပြုဘဲ အကြီးမားဆုံးအထောက်အပံ့ပင်ပေးနေခြင်းများ ကြောင့် မည်သို့မျှ ငြိမ်းချမ်းရေးနိုဘယ်ဆု မရနိုင်ဟု သုံးသပ်ခဲ့ကြသည့်အတိုင်း တကယ်ဖြစ်လာခဲ့ခြင်း ဖြစ်သည်။
ကိုကလင်း
Ref: ladbible
#MeKongNews
#နိုဘယ်ဆု
#ငြိမ်းချမ်းရေး
#ဒေါ်နယ်ထရမ့်
#ဗင်နီဇွဲလား
#မာချာဒို
