မဲခေါင်၊ အောက်တိုဘာ ၇
TikTok တွင် Followers ၃ သိန်းကျော်ရှိသော အသက် ၂၀ ဝန်းကျင်သာရှိသည့် တောင်ကိုရီးယားသူ ယွန်ဂျီအာသည် နောက်ဆုံး Livestream လွှင့်အပြီး မိနစ် ၃၀ အကြမှာပင် ရက်စက်စွာ ရိုက်နှက် နှိပ်စက်ခံရကာ တောင်တန်းထူထပ်သည့် ဂျိုရယ်လာခရိုင်မြောက်ပိုင်း မူဂျူစီရင်စု၌ အိတ်ထဲအလောင်းထည့် စွန့်ပစ်မှုဖြစ်ပွားခဲ့သည်။
ယွန်ဂျီအာ နောက်ဆုံးရိုက်ကူးရေးလုပ်ခဲ့သည့်နေရာမှာ အင်ချွန်းရှိ ယွန်ဂျွန်းကျွန်းပေါ်တွင်ဖြစ်ကာ အလောင်းတွေ့ရှိသောနေရာနှင့် ၃ နာရီကြာ ကားမောင်းခရီးအကွာအဝေးရှိသည်ဟု ဆိုသည်။
စက်တင်ဘာ ၁၁ ရက်နေ့ကတည်းက ထိုလူသတ်မှုဖြစ်ပွားခဲ့ခြင်းဖြစ်ပြီး စီစီတီဗီကင်မရာမှတ်တမ်းများအရ ညနေ ၃ နာရီ ၂၇ မိနစ်တွင် ကားအတွင်းမှ ယွန်ဂျီအာ တံခါးတွန်းဖွင့်ထွက်ပြေရန် ကြိုးစားနေသည့်မြင်ကွင်အား မြင်တွေ့ရသလို အတွင်းမှ ဆောင့်စွဲပြီး တံခါးပြန်ပိတ်သွားမှုကို မြင်တွေ့ခဲ့ရသည်။
သံသယတရားခံ ချွိုင် (အွန်လိုင်းအမည် ကြောင်နက်) အား အလောင်းတွေ့ရှိပြီး ၁၂ နာရီအကြာတွင် ဖမ်းဆီးခဲ့ကာ စုံစမ်းစစ်ဆေးမှုများပြုလုပ်နေရာ၌ တောင်ကိုရီးယား သတင်းများတွင် စုံစမ်းမှု အခြေအနေအရပ်ရပ်ကို မီးမောင်းထိုးဖော်ပြနေကြသည်။
အသက် ၅၀ ဝန်းကျင်ရှိ ချွိုင်သည် ဘ၀နှစ်မျိုးနှင့် နေထိုင်သူဖြစ်ကာ ယွန်အား သူသည် IT ကုမ္ပဏီမှ စီအီးအိုဟု မိတ်ဆက်ကာ ပူးတွဲလုပ်ငန်းရှင်များနှင့် ယွန်အား လူမှုကွန်ရက်ပေါ်၌ ပိုမိုအောင်မြင်စေမည်ဟု ကတိပြုခဲ့ကြောင်း၊ ချွိုင်သည် ယွန်းကဲ့သို့သော် အွန်လိုင်းဆယ်လီ ဩဇာလွှမ်းမိုးသူများထဲ VIP တစ်ဦးအဖြစ်နှင့် အလွန်တန်ဖိုးကြီးမားသည့် လက်ဆောင်များ၊ ငွေများပေးနေကြဖြစ်ရာမှ နောက်ဆုံး ကြွေးမြီများစွာတင်ရှိပြီး နေအိမ်ကိုပင် လေလံတင်ရောင်းချနေရသူဖြစ်သည်ဟု ဒေသတွင်း Soap Central မီဒီယာက ဖော်ပြခဲ့သည်။
မည်မျှ ငွေသုံးကြမ်းခဲ့သနည်းဆိုလျှင် လူမှုကွန်ရက်ပလက်ဖောင်း တစ်ခု၌ level ၅၆ အထိပင်ရောက်ကာ ထို့အတွက် ဝမ် သန်း ၁၀၀ (ပေါင် ၅၃၀၀၀) သုံးခဲ့သည်ဟုပင် ဆိုသည်။
တောင်ကိုရီးယား ဖျော်ဖြေရေးသတင်းစဉ် Kbizoom ဖော်ပြမှု၌ စီစီတီဗီမှတ်တမ်းအရ ချွိုင်သည် ယွန်အား သူနှင့်အတူ အလုပ်များဆက်လုပ်ရန် အခင်မဖြစ်မီ အချိန်ပိုင်း၌ ဒူးထောက်ကာပင် တောင်းပန်ခဲ့သည်ကိုလည်း တွေ့ရကြောင်း၊ ယွန်ဘက်မှ အလုပ်ချိန် ချိန်းဆိုမှုများ ဘဝင်မကျခြင်း၊ မဖြစ်နိုင်သောတောင်းဆိုမှုများ တောင်းဆိုခြင်းတို့ကြောင့် ဆက်လက်မတွဲဘဲ လမ်းခွဲရန် ဆုံးဖြတ်ခဲ့ရာမှ ယခုလို လူသတ်ပြီး အိတ်ထဲထည့်ကာ အလောင်းသွားစွန့်ပစ်မှုဖြစ်ခဲ့ရသည်ဟု ဖော်ပြသွားသည်။
စီစီတီဗီမှတ်တမ်းအရ သေဆုံးသူအား ထုပ်ထားသည့် အိတ်ကိုလည်း ချွိုင်သည် တောင်းပန်ပြီး နာရီပိုင်း အကြာတွင် ဆွဲလာသည်ကို တွေ့ရှိရသဖြင့် ဖမ်းဆီးကာ စစ်ဆေးစဉ် ကနဦး ငြင်းဆိုပြီးနောက် နောက်ပိုင်းမှ အပြစ်ဝန်ခံခဲ့သည်ဟု ဒေသတွင်း The Chosun Daily နှင့် Chosun Biz မီဒီယာများက ဖော်ပြသွားခဲ့ကြသည်။
ထိုသို့ ရက်စက်စွာသတ်ဖြတ်ရခြင်းမှာ အွန်လိုင်းဆယ်လီများအပေါ် အလွန်အကျူး ငွေပေးခြင်းများမှ စီးပွားပျက်ခြင်းနှင့် ဆက်စပ်ပြီး သတ်ဖြတ်ခြင်းဖြစ်နိုင်သည်ဟု ရဲတပ်ဖွဲ့တာဝန်ရှိသူတစ်ဦးကလည်း မှတ်ချက်ပေးခဲ့သည်။
Ref: Thesun
#MeKongNews
#တောင်ကိုရီးယား
#တစ်တော့
#လူသတ်မှု
#အွန်လိုင်းဆယ်လီ
