မဲခေါင်၊ စက်တင်ဘာ ၂၄
တောတောင်လှိုဏ်ဂူတစ်ခုအတွင်း ပုန်းခိုစစ်ရှောင်နေသည့် ၉နှစ်သမီးအပါအဝင် လူ ၆ဦးကို ရှမ်းပြည်၊ ဓနုနယ်မြေနှင့် ဆက်စပ်သည့် သာစည်နယ်မြေအတွင်း စစ်ကြောင်းထိုးလာသည့် စစ်ကောင်စီတပ်က ဖမ်းဆီးစစ်ဆေးနေကြောင်း စစ်ရေးသတင်းအရင်းအမြစ်အရ သိရသည်။
စစ်ကောင်စီ၏ အလယ်ပိုင်းတိုင်းစစ်ဌာနချုပ် နယ်မြေအတွင်း စစ်ဆင်ရေးဝင်ရောက်နေသည့် နေပြည်တော်တိုင်းမှ စစ်ကြောင်း၂ကြောင်းသည် နန်းတွင်း(လပခ)အမိန့်ဖြင့် မိထ္တီလာ၊ သာစည်နှင့် ရှမ်းပြည် ဓနုနယ်မြေ ရွာငံတကြော ရှင်းလင်းရာမှ လှိုဏ်ခေါင်းတစ်ခုကို တွေ့ရှိရပြီးယင်းကိုရှင်းလင်းရာမှ မိသားစု ၂စု၊ လူ၆ဦးကို တွေ့ရှိခဲ့ခြင်းဖြစ်သည်ဟု ယမန်နေ့ စက်တင်ဘာ ၂၃ရက်မှာ စစ်ရေးသတင်း အရင်းအမြစ်၏ ပြောပြချက်အရ သိရသည်။
တွေ့ရှိရသည်မှာ တောင်သူမိသားစု ကျား ၃ဦး၊ မ ၃ဦး မိသားစု ၂စု ဖြစ်ပြီး ယင်းထဲတွင် ၉ နှစ်အ ရွယ် သမီးလေး တစ်ယောက်ပါသလို အသက် ၂၂ နှစ်အရွယ် သားယောက်ျားလေး တစ်ယောက်လည်း ပါကြောင်း သိရသည်။
ယင်းဖမ်းဆီးခံရသူများမှာ ရွာငံမြို့နယ် ကျောက်တောကျေးရွာမှ ဓနုလူမျိုးတောင်သူ ဦးသန်းလှိုင်၅၄နှစ်၊ ၎င်းနှင့်အတူ ဒေါ်ခင်ညိုမြတ် ၅၂နှစ်၊ မောင်ကျော်မင်း၂၂နှစ်၊ သာစည်မြို့နယ်၊ ဖိုးသာနိုင်ကျေးရွာမှ တောင်သူ ဦးမောင်မြင့် ၅၂နှစ်နှင့် ၎င်းတို့၏သမီးဖြစ်သူ မဇင်မာမိုး ၉နှစ်တို့ဖြစ်ကြကြောင်း သိရသည်။
၎င်းတို့နှင့်အတူ တူမီး၂လက်၊ ပစ္စတို ၁လက်၊ ကျည် ၅ တောင့်၊ ကျည်အိမ် ၁ ခု၊ ဓနုပြည်နယ် အမျိုးသားကာကွယ်ရေးတပ်တော် – DSNDA ၏ ရာဘာလေဆာတံဆိပ်တုံး တစ်ခု၊ လက်မောင်းတံဆိပ် ၂၉ ခု ၊ အနီရောင်ကြယ်ဖြူ အလံ တစ်ထည်ပါ သိမ်းဆည်းရမိသည်ဟု သတင်းထွက်နေကြောင်း စစ်ရေးသတင်းရင်းမြစ်က ပြောသည်။
“လက်ရှိမှာတော့ ဖမ်းသွားတဲ့သူတွေကို ခလရ၈၅ က မိထ္တီလာတပ်နယ်ကိုလွှဲပြောင်းပေးတာ။ တပ်နယ်ထဲမှာ စစ်ကြောရေးဝင်နေတယ်သိရတယ်။ ၉နှစ်ကလေးတော့ ပါမပါမသိရဘူး” ဟု ၎င်းက မဲခေါင်သို့ ပြောသည်။
ယင်းကိစ္စ အတည်ပြုနိုင်ရန် DSNDA သို့ မဲခေါင်မှ ဆက်သွယ်မေးမြန်းရာ ပြန်ကြားရေးတာဝန်ခံ ကျားပျံက ၎င်းတို့တော်လှန်ရေးဘက်မှ မဟုတ်ဘဲ စစ်ရှောင်ပြည်သူများသာ ဖြစ်သည်ဟု မဲခေါင်ကို ပြန်လည်ပြောကြားသည်။
“ရွာတွေက စစ်ကြောင်းတွေကို ကြောက်ပြီး တောတောင်ထဲ ပုန်းနေရတဲ့သူတွေအများကြီးပဲ။ မင်းပလောင်ရွာဆို တစ်ရွာလုံးပဲ” ဟု ကျားပျံက မဲခေါင်သို့ ယနေ့ စက်တင်ဘာ၂၄ရက်တွင် ပြန်လည်ဖြေကြားသည်။
လပခနယ်နှင့် ရပခနယ်များကို စစ်ကြောင်းများဖြန့်၍ ထိုးနေသဖြင့် ဓနုနယ်မြေရွာငံနယ်တွင် မင်းပလောင်လို ရွာများမှ ဒေသခံများ တောတောင်များအတွင်း ပုန်းအောင်း စစ်ရှောင်နေကြရကြောင်း DSNDA ကပြောသည်။
ရှမ်းပြည်၊ ရွာငံနယ် ကျောက်ဌက် နှင့် အလည်ချောင်းရွာများတွင်မူ တမခ၅၅ မှ အင်အား၂၀၀ ပါ ဗျူဟာတစ်ခု စစ်ကြောင်းထိုးနေပြီး ယင်းတပ်မလက် အောက်ခံ ကလောမှ ခလရ၇ သည်ယနေ့တွင် နောက်တန်းသို့ ပြန်လည်ဝင်ရောက်ကြောင်း သိရသည်။
#MeKongNews
#ရွာငံမြို့နယ်
#စစ်ကောင်စီစစ်ကြောင်း
#ဓနုနယ်မြေ
#ဖမ်းဆီးခံရမှု
