မဲခေါင်၊ မေ ၂၆
နယ်စပ်ဖြတ်ကျော် ရာဇဝတ်မှုဆိုင်ရာ အထူးလေ့လာသူ ဂျက်ကော့ဘ်ဆင်မ်က ကမ္ဘောဒီးယားနိုင်ငံ သည် ကမ္ဘာလုံးဆိုင်ရာ စီးပွားရေးနှင့်နိုင်ငံရေးမတည်ငြိမ်မှုများကို အခြိမ်းခြောက်နိုင်ဆုံး အင်အား အကြီးဆုံး ရာဇဝတ်ကွန်ရက် ဗဟိုချက်ဖြစ်လာသည်ဟု သုံးသပ်သွားခဲ့သည်။
အသစ်ထုတ်ပြန်လိုက်သော စစ်တမ်းတစ်ခုတွင် ကမ္ဘောဒီးယား နိုင်ငံရေးလောကမှ အကြီးအကဲများ ကိုယ်တိုင် ကမ္ဘာလုံးဆိုင်ရာ ရာဇဝတ်မှုနှင့်လိမ်လည်မှုကွန်ရက်များတွင် အဓိကကြိုးကိုင်စီစဉ်သူများ အဖြစ်ပါဝင်နေခြင်းကြောင်း ဒေါ်လာဘီလီယံပေါင်းများစွာချီ လုပ်ကိုင်နေသည့် ယင်းဆိုက်ဘာရာဇဝတ်ကွန်ရက်ကြီးမှာ မကြာမီ ပြိုလဲရန်ပင် မဖြစ်နိုင်သော အဆင့်သို့ ရောက်လာနေပြီဟု ကျွမ်းကျင်သူများက သုံးသပ်ခဲ့ကြသည်။
ကမ္ဘောဒီးယား အာဏာရ ပြည်သူ့ပါတီကိုယ်တိုင်က နိုင်ငံတော်အဆင့် အကာအကွယ်ပေးခြင်းဖြင့် ကျားဖြန်နှင့် လူမှောင်ခိုကူးခြင်းလုပ်ငန်းအဆောက်အအုံများကို ချဲ့တွင်နေမှုမှာ အရှေ့တောင်အာရှရှိ ကျားဖြန်လုပ်ငန်းများဖြင့်နာမည်ကြီးသော မြန်မာနှင့်လာအိုထက်ပင် ကျော်လွန်ပြီး တရုတ်ဒုစရိုက်ကွန်ရက်များ ဦးဆောင်သော ကျားဖြန်လုပ်ငန်းများ ဗဟိုချက်သည် ကမ္ဘောဒီးယားတွင်သာ အခြေစိုက်သည်ဟု အမေရိကန်အစိုးရရန်ပုံငွေ ထုတ်ပေးထားသည့် ဟားဗတ်တက္ကသိုလ် အာရှရေးရာ စင်တာအဖွဲ့ စုံစမ်း ဖော်ထုတ်မှုတွင် ကောက်ချက်ချခဲ့သည်။
ကမ္ဘောဒီးယားနိုင်ငံ လက်ရှိဝန်ကြီးချုပ် ဟွမ်မာနတ်၏ အနီးစပ်ဆုံးဆွေမျိုးများသည် ကျားဖြန် နယ်စပ်ဖြတ်ကျော် ဒုစရိုက်ကွန်ရက်ကို ဦးဆောင်စီမံနေသူများဖြစ်နေကြောင်းနှင့် ကမ္ဘောဒီးယားသည် ကျားဖြန်လုပ်ငန်းမှ နှစ်စဉ် ဘဏ္ဍာငွေ ဒေါ်လာ ၁၉ ဘီလီယံ ရရှိကာ ထိုငွေပမာဏသည် နိုင်ငံ GDP ၏ ၆၀ ရာခိုင်နှုန်းရှိနေသည့်အတွက် အစိုးရအကာအကွယ်ပေး အကြီးမားဆုံးဆိုက်ဘာလိမ်လည်မှု့ ရာဇဝတ်ကွန်ရက်ကြီးဖြစ်နေသည်ဟု စုံစမ်းဖော်ထုတ်ရေးသားခဲ့သည်။
ကမ္ဘောဒီးယားအခြေစိုက် ကျားဖြန်လုပ်ငန်းများမှ တစ်နှစ်လျှင် ကမ္ဘာတစ်ဝန်းမှ လိမ်လည်မှုပမာဏသည်လည်း ကြောက်မက်ဖွယ်ရာအဖြစ် ဒေါ်လာ ၇၅ ဘီလီယံ ရှိနေသည်ဟု ထိုအစီရင်ခံစာတွင် ဖော်ပြထားသည်။
ထိုင်းပင်လယ်ကွေ့နှင့်ကပ်လျှက် ဆီဟန်နော့ဗီလီရှိ Golden Sun Sky Casino & Hotel သည် ကျားဖြန် လုပ်ငန်းများကို အမေရိကန်အပါ ကမ္ဘာ့နိုင်ငံပေါင်း ၆၀ ကျော်အထိ လိမ်လည်ရာ ဒုစရိုက်ကွန်ရက်ထဲ တွင်ပါဝင်သလို ကမ္ဘောဒီးယားအစိုးရကိုယ်တိုင် အကာအကွယ်ပေးထားသည့် ဖနွမ်းပင်မြို့မှ Huione International Pay ငွေလဲရုံးသည် ခရစ်ပတို၊ Binance နှင့် e wallet စနစ်များမှ ငွေကြေးခဝါချမှုများကို မည်သည့်အတားအဆီးမှမရှိ၊ နိုင်ငံတကာမှ ပိတ်ဆို့အရေးယူမှုမရှိဘဲ ကမ္ဘောဒီးယားအစိုးရဘဏ်တမျှ လုပ်ဆောင်ပေးနေကြောင်း ဖော်ပြထားသည်။
ယမန်နှစ်က သတင်းပေါက်ကြားမှုဖြစ်ပြီးနောက်တွင်လည်း တခြားအမည်များဖြင့် ကုမ္ပဏီခွဲများစွာကို ပြည်ပနိုင်ငံများတွင် ပြောင်းဖွင့်လှစ်လုပ်ကိုင်နေဆဲဖြစ်ကြောင်း၊ ယခင်ကျားဖြန်လိမ်လည်ငွေများကို တရုတ်တွင် ၆၀ ရာခိုင်နှုန်း ခဝါချ သော်လည်း ၂၀၂၀ ပြည့်နှစ်မှ စတင်ပြီး စည်းကမ်းတင်းကျပ်လိုက်သောကြောင့် ငွေကြေးခဝါချမှုများ ဗဟိုချက်မှာ ကမ္ဘောဒီးယားအစိုးရ ဦးဆောင်မှု အောက်သို့ ရောက်လာကြောင်း၊ ကျားဖြန်လုပ်ငန်းများ အတွက် ကျွမ်းကျင် ပညာရှင်များကို လိမ်လည်ခေါ်ယူ လူမှောင်ခိုကူး၊ လက်စဖျောက်မှုများအားလုံး သည်လည်း ကမ္ဘောဒီးယားအစိုးရနှင့်ပတ်သက်ပြီး ဖုံးကွယ်ပေးထားခြင်းဖြင့် ကမ္ဘောဒီးယားသည် မကြာမီ ဖြိုလှဲမရနိုင်သည့် ကျားဖြန် ဒုစရိုက်ကွန်ရက် ဗဟိုချက် ဖြစ်လာတော့မည်ဟု ယင်းအစီရင် ခံစာက သုံးသပ်ဖော်ပြသွားခြင်းဖြစ်သည်။
ကိုကလင်း
Ref: South China Morning Post
#MeKongNews
#ကမ္ဘောဒီးယား
#ကျားဖြန့်
#ဖနွမ်းပင်
#ရာဇဝတ်ကွန်ယက်
