မဲခေါင်၊ မေ ၂၁
တပ်စခန်းနေရာများမှတဆင့် မြို့တွင်းဝင်ရောက်နိုင်ရေး ထိုးစစ်ဆင်နေသည့် စစ်ကောင်စီကြောင့် ရှမ်း-ကရင်နီနယ်စပ်၊ မိုးဗြဲမြို့အနီးတွင် တိုက်ပွဲများ ဆက်လက်ဖြစ်ပွားနေကြောင်း သိရသည်။
မေလ ၂၀ ရက်နေ့ နေ့လယ်ပိုင်းအထိ သစ်ယာကုန်းဘက်တွင် တိုက်ပွဲဖြစ်ပွားနေပြီး တော်လှန်ရေးတပ်များ၏ ပိတ်ဆို့ထားမှုကြောင့် စစ်ကောင်စီစစ်ကြောင်းမှာ ရှေ့တိုးနောက်ဆုတ်သာ လုပ်နေနိုင်ကြောင်း ဒေသခံ စစ်ရေးသတင်းအရင်းအမြစ်က မဲခေါင်သို့ ပြောသည်။
“စစ်ကြောင်းထပ်ထပ်ထိုးလာတယ်။ မိုးဗြဲမရအောင်တော့ ကလေးတွေ (တော်လှန်ရေးတပ်များ) ကာပေးတာ၊ သူတို့(စစ်ကောင်စီ)ရိက္ခာ အတော်ပြည့်စုံပြီ ထင်တယ်။ သူတို့မှာကျည်တအားရှိတော့ လက်နက်ကြီးတွေ၊ ကျည်တွေ တအားထုနေတယ်” ဟု ၎င်းကဆိုသည်။
စစ်ကောင်စီစစ်ကြောင်း မိုးဗြဲမြို့အခြေစိုက် ခမရ ၄၂၂ တပ်ရင်းမှ ထွက်လာခြင်းဖြစ်ပြီး စစ်ကြောင်းဦးတည်ရာမှာ မိုးဗြဲမြို့တွင်းမှတဆင့် မိုးဗြဲ-ဖယ်ခုံလမ်းမအထိ တက်နိုင်ရေးဖြစ်ကြောင်း သိရသည်။
လက်ရှိတွင် စစ်ကောင်စီ ၄၂၂ တပ်ရင်းသို့ စစ်ကောင်စီမှ ရဟတ်ယာဉ်များဖြင့် ရိက္ခာ၊ လက်နက်ခဲယမ်း၊ လူအင်အား ပို့ဆောင်ခြင်းများအပြင် ပင်လောင်း-ဖယ်ခုံလမ်းပိုင်းအား အသုံးပြုခွင့်ရပြီ ဖြစ်သောကြောင့် ၎င်းလမ်းပိုင်းမှ ရိက္ခာသယ်ယူမှုများ ရှိနေသည်။
“ခုထိ လမ်းကပေါက်တယ်၊ သူတို့ ဒီလမ်းကိုသုံးတာ တော်တော်ကြာပြီ။ ၃/၄ လ လောက်ရှိပြီ။ ပင်လောင်း-တောင်ကြီး၊ ဟိုး မန္တလေး ရန်ကုန်အထိ ကားလမ်းပေါက်တော့ သူတို့အဲဒီကလည်း ပို့လို့ရတာပေါ့” ဟု ဒေသခံတစ်ဦးက ပြောသည်။
မိုးဗြဲမြို့ကို အမှတ်(၁၀၀၁) မိုးဗြဲပြည်သူ့ကာကွယ်ရေးတပ်နှင့် KNDF မဟာမိတ်တပ်ပေါင်းစုများ ထိန်းချုပ်ထားသည်မှာ တစ်နှစ်ခွဲကျော် ကြာခဲ့ပြီဖြစ်ပြီး မိုးဗြဲမြို့ကို ပြန်လည်ရရှိရေးအတွက် စစ်ကောင်စီမှ PNO ပြည်သူ့စစ်နှင့်အတူ အပြင်းအထန် ထိုးစစ်ဆင်လျက်ရှိသည့်အတွက် ဆက်လက်ထိန်းချုပ်ရန် အခက်အခဲများရှိနေကြောင်း အမှတ်(၁၀၀၁) မိုးဗြဲပြည်သူ့ကာကွယ်ရေးတပ်က မေလ ၂၀ ရက် ညနေပိုင်းက သတင်းထုတ်ပြန်သည်။
၂၀၂၅ ခုနှစ်အစမှ ယနေ့အချိန်ထိ မိုးဗြဲမြို့နယ်တွင် စစ်ကောင်စီနှင့်တိုက်ပွဲ နေ့စဉ်နှင့်အမျှဖြစ်ပွားနေပြီး တိုက်ပွဲအတွင်း နှစ်ဖက်ထိခိုက်မှုများရှိခဲ့ကာ အမှတ်(၁၀၀၁) မိုးဗြဲပြည်သူ့ကာကွယ်ရေးတပ်မှ ၅ လတာအတွင်း သူရဲကောင်း ၅ ဦးအထိ ပေးဆပ်ခဲ့ရပြီး စစ်ကောင်စီဘက်မှ ၅၀ ဦးအထက် သေဆုံးကြောင်း၊ ဆက်လက်တိုက်ပွဲဝင်ရန် စစ်ရေးလိုအပ်ချက်များရှိကြောင်း အမှတ်(၁၀၀၁) မိုးဗြဲပြည်သူ့ကာကွယ်ရေးတပ်က ဆိုသည်။
လက်ရှိတွင် စစ်ကောင်စီမှ ခမရ ၄၂၂တပ်တွင်း၊ သစ်ယာကုန်း၊ လယ်တီတောင်တို့တွင်တပ်စွဲထားပြီး ခေတ္တအခြေပြုနေရာများမှတဆင့် ရှေ့သို့တိုးတိုးလာနေကြောင်း၊ တော်လှန်ရေးတပ်များမှ အစွမ်းကုန်ကာထားကြောင်း၊ ယခုနှစ် ဖေဖော်ဝါရီနှင့် မတ်လတို့တွင် လက်လွတ်ခဲ့ရသော ကင်းစခန်းတချို့အား ပြန်လည်ရယူထားနိုင်ကြောင်း သိရသည်။
မိုးဗြဲမြို့ကို ပြီးခဲ့သည့်နှစ် ဧပြီလမှစတင်ကာ မြို့သိမ်းနိုင်ရေး တော်လှန်ရေးတပ်များမှ တကျော့ပြန်တိုက်ပွဲစတင်ခဲ့ပြီး လက်ရှိအချိန်အထိ နေ့စဥ်နှင့်အမျှ တိုက်ပွဲများဖြစ်ပွားနေသော်လည်း မြို့သိမ်းနိုင်သည့်အခြေအနေတော့ မရှိသေးပေ။
လက်ရှိအချိန်အထိ စစ်ရေးတင်းမာနေသည့်အတွက် စစ်ကောင်စီမှ လက်နက်ကြီးများကို ရမ်းသမ်းပစ်ခတ်နေသောကြောင့် မိုးဗြဲလမ်းမကြီးအား တတ်နိုင်သမျှ အသုံးမပြုကြရန် ပြည်သူ့ကာကွယ်ရေးတပ် သတင်းရင်းမြစ်က သတိပေးထားသည်။
ဂနိုက်
#MeKongNews
#မိုးဗြဲတိုက်ပွဲ
#စစ်ကောင်စီထိုးစစ်
#အမြောက်တပ်
#ခမရ၄၂၂
