မဲခေါင်၊ မေ ၅

ရှမ်းပြည်အရှေ့ပိုင်း၊ ကျိုင်းတုံမြို့တွင် ဆိုင်ကယ်သူခိုး ၆ ဦးနှင့် ဆိုင်ကယ်အချို့ကို ဖမ်းဆီးရမိထားကြောင်း ကျိုင်းတုံခရိုင် ဒုစရိုက်နှိမ်နင်းရေးတပ်ဖွဲ့ထံမှ သိရသည်။

လတ်တလောဖမ်းမိထားသူ ၆ ဦးနှင့်အတူ ဆိုင်ကယ် ၅ စီး သိမ်းဆည်းရမိထားသည့်အနက် ၂ စီးမှာ ပိုင်ရှင်ပေါ်ပေါက်ထားပြီး ကျန် ၃ စီးကို ဆက်သွယ်စုံစမ်း မေးမြန်းနိုင်ကြောင်း၊ လိုင်စင်မဲ့ဆိုင်ကယ်များကလည်း ပိုင်ရှင်ကို အမှုဖွင့်ဖို့ မရှိကြောင်း ခရိုင်ဒနနှင့် နီးစပ်သူတစ်ဦးက မဲခေါင်ကို ယနေ့ မေလ ၅ ရက် နံနက်ပိုင်းတွင် ပြောသည်။

“ဆိုင်ကယ်ပိုင်ဆိုင်မှု သေချာရင် အာမခံနဲ့ ပြန်ပေးနိုင်ပါတယ်။ ပြည်သူအများအနေနဲ့ ဆိုင်ကယ် ချက်စီတွေကို ဖုန်းနဲ့ မှတ်တမ်းတင်ထားရင် ပိုင်ဆိုင်မှုရော၊ ပျောက်ရင်လိုက်ရတာရော လွယ်မှာဖြစ်ပါတယ်။ လိုင်စင်မဲ့ဖြစ်ပေမယ့် ပိုင်ရှင်ကိုအမှုဖွင့်ဖို့ မရှိပါဘူး။ တရားရုံးအဆုံးအဖြတ်အရသာ လုပ်ဆောင်ရပါတယ်။ ပိုင်ရှင်စစ်မှန်ရင် ပြန်ရပါ့မယ်။ လူထုကို အကြံပြုလိုတာက ကျနော်တို့ဆီ အမှုအမြန်ဖြေရှင်းနိုင်ဖို့ ဖြစ်ဖြစ်ချင်းဆက်သွယ်ဖို့လိုပါတယ်။ အခုလည်း စောင့်ကြည့် စစ်ဆေးတာတွေ နေ့ရော ညရော လုပ်နေပါတယ် လို့ ပြောချင်ပါတယ်” ၎င်းကပြောသည်။

ဆိုင်ကယ်သူခိုး ၆ ဦးမှာ လွယ်မွေအထွက်လမ်းဘက်၌ ဆိုင်ကယ်လုယက်မှုတွင် တစ်ဦး၊ ဆိုင်ကယ်ကို သော့ဖျက်ပြီးတွန်းလာသူတစ်ဦးနှင့် ဘိလက်ယက်ခုံတွင် မသင်္ကာ၍ စစ်ဆေးရာမှ ဆိုင်ကယ် ၃ စီးနှင့်အတူ ဖမ်းဆီးရမိသူ ဆိုင်ကယ်သူခိုး ၄ ဦးတို့ဖြစ်ကြောင်း သိရသည်။

လွယ်မွေအမှုမှ ဆိုင်ကယ်ကို တရားရုံးမှ ပိုင်ရှင်သို့ပြန်ပေးအပ်ပြီး သော့ဖျက်တွန်းလာသည့် ဆိုင်ကယ်ကို အာမခံဖြင့် ပြန်ပေးအပ်ထားကာ တုံတာမှ ပိုင်ရှင်က ဆက်သွယ်ပြီးလာရောက်နေပြီဖြစ်ကြောင်း၊ ပိုင်ရှင်မပေါ်သေးသည့် ဆိုင်ကယ် ၃ စီး အတွက် ဆက်သွယ်မေးမြန်းနိုင်ကြောင်း သိရသည်။

ပြည်သူများအနေဖြင့်လည်း ဆိုင်ကယ်ကို ဈေးလျှော့ရောင်းခြင်း၊ သော့အုံလာဝယ်ခြင်း စသည့် မသင်္ကာဖွယ်ကိစ္စများတွေ့ပါက ရဲထံ ချက်ချင်းဆက်သွယ်ကြရန် ခရိုင်ဒနနှင့် နီးစပ်သူက ပြောသည်။

ဖမ်းဆီးရမိထားသည့် ဆိုင်ကယ်ခိုးသူများမှာ ကျလား၊ အောင်ခန်း၊ လလပါ၊ ယောနရှာ၊ ကျားဖ၊ ဂီးဒို တို့ဖြစ်ကြပြီး ကျိုင်းတုံရဲစခန်းတွင် ဖမ်းဆီးချုပ်နှောင်ထားပြီး ယနေ့တွင် တရားစွဲတင်မည် ဖြစ်ကြောင်း သိရသည်။

မဲခေါင်သတင်းဌာနမှ ဧပြီလအတွင်း ဖြစ်ပွားခဲ့သည့် ကျိုင်းတုံမြို့ ဆိုင်ကယ်ခိုးမှု၊ လုယက်မှုများကို စုစည်းထားမှုအရ လုယက်လူသတ် တစ်မှု၊ ရန်ပြုလုယက်မှု ၆ မှု၊ အလစ်သုတ်မှု ၇ မှု၊ ဖောက်ထွင်းခိုးယူမှု ၂ မှုရှိပြီး ဆိုင်ကယ်စီးရေ ၂၀ မျှ ခိုးယူလုယက်ခံထားရသည်။

#MeKongNews
#ရှမ်းအရှေ့
#ကျိုင်းတုံ
#ဆိုင်ကယ်ခိုးမှု
#လွယ်မွေ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)