မဲခေါင်၊ ဧပြီ ၄
MNDAA ထိန်းချုပ်ထားသည့် လားရှိုးမြို့ပေါ်မှ ယခုလ၊ ဧပြီ ၂၁ ရက်နေ့ နောက်ဆုံးထားပြီး MNDAA တပ်များဆုတ်ခွာကာ အုပ်ချုပ်မှုကို စစ်ကောင်စီထံ ပြန်လည်လွှဲပြောင်းပေးရမည်ဖြစ်ကြောင်း MNDAA စစ်ဘက်သတင်းရင်းမြစ်က မဲခေါင်ကို အတည်ပြု ပြောသည်။
လက်ရှိလားရှိုးမြို့ထဲတွင် တာဝန်ထမ်းဆောင်အချို့အနေဖြင့် မဖြစ်မနေမြို့ထဲမှ ပြန်လည်စွန့်ခွာရမည်ဖြစ်ပြီး ဧပြီလ မကုန်ခင်အတွင်း စစ်ကောင်စီ၏ ဌာနဆိုင်ရာဝန်ထမ်းအချို့ ပြန်လည်ဝင်ရောက်လာမည်ဖြစ်ကြောင်း ယင်းသတင်းရင်းမြစ်က ပြောသည်။
“ပြောရမှာတောင် အားမရှိတော့ဘူးဗျာ၊ ကျွန်တော်တို့လည်း ဘာမှမတတ်နိုင်တော့ တော်တော်စိတ်မကောင်းဖြစ်နေကြတယ်။လမကုန်ခင် ဌာနဆိုင်ရာအဖွဲ့တစ်ချို့ပြန်ဝင်လိမ့်မယ်။ စကစဖက်ကပေါ့။ စစ်ဖက်ဆိုင်ရာတော့မဝင်သေးဘူး” ဟု ၎င်းကပြောသည်။
လားရှိူးမြို့မှ MNDAA တပ်များ ပြန်လည်ဆုတ်ခွာခြင်းမရှိပါက လေကြောင်းတိုက်ခိုက်မှုများ ပြုလုပ်သွားမည်ဟု စစ်ကောင်စီဘက်က ခြိမ်းခြောက်ထားပြီး တရုတ်ဘက်မှလည်း ကုန်သွယ်ရေးနှင့် စီးပွားရေးလမ်းကြောင်းများ ပိတ်ပစ်မည်အကြပ်ကိုင်ကြောင်း MNDAA စစ်ဘက်အရင်းအမြစ် မဲခေါင်ကို ပြောသည်။
ဧပြီလ ၂၂ ရက်နေ့တွင် စစ်ကောင်စီဘက်မှ ပထမဦးဆုံးအဖွဲ့ လားရှိုးမြို့သို့ရောက်ရှိမည်ဖြစ်ပြီး မြို့ပေါ်အုပ်ချုပ်ရေးကိုအသက်သွင်းဆောင်ရွက်သွားမည်ဖြစ်သည်။
လူငယ်များအနေဖြင့် စစ်ကောင်စီပြန်ဝင်လာခြင်းကြောင့် အနှေးနှင့်အမြန် စစ်မှုထမ်းခေါ်ယူမှုများ ရှိလာမည် ဖြစ်သောကြောင့် မြို့ပေါ် ၁၂ ရပ်ကွက် အပြင်ဘက်ရှိအထူးဒေသ (၁) ဘက်သို့တိမ်းရှောင်ကြရန် သတင်းရင်းမြစ်များက တိုက်တွန်းသည်။
လားရှိူးမြို့ပေါ် ရပ်ကွက် ၁၂ ရပ်ကွက်တွင် စစ်ကောင်စီအုပ်ချုပ်ရေး ပြန်လည်စတင်မည်ဖြစ်ပြီး မြို့နှင့် ၃မိုင်၊ ၄မိုင် အကွာခန့်ရှိ နောင်မွန်၊ ဟိုပိတ်ကဲ့သို့ နေရာများတွင်မူ MNDAA အထူးဒေသ (၁) အုပ်ချုပ်ရေးအဖွဲ့ကဆက်ရှိနေမည်ဖြစ်ကြောင်း ဒေသခံ သတင်းရင်းမြစ်တစ်ဦးက ပြောသည်။
ယခုနှစ် ဇန်နဝါရီလ ၁၅ ရက်နေ့ကတွင် MNDAA နှင့် စစ်ကောင်စီတပ်တို့ ကူမင်းမြို့၌ တရုတ်၏ကြားဝင်ပေးမှုဖြင့် တွေ့ဆုံဆွေးနွေးခဲ့ကြပြီး ဇန်နဝါရီလ ၁၈ ရက်နေ့မှ စတင်ကာ နှစ်ဖက်အပစ်အခတ်ရပ်စဲရေး သဘောတူစာချုပ်ကို တရားဝင် လက်မှတ်ရေးထိုးခဲ့ကြသည်။
လားရှိုးမြို့ပေါ် အုပ်ချုပ်မှုအား စစ်ကောင်စီထံ ပြန်လည်အပ်နှံရမည် ဖြစ်သောကြောင့် လားရှိူးမြို့အထူးဒေသ ၁ ကျန်းမာရေးဌာနမှဝန်ထမ်းအချို့အား ဧပြီလ ၃ ရက်နေ့က MNDAA မှ အလုပ်မှရပ်နားမှုများ ပြုလုပ်ခဲ့ကြောင်း သိရသည်။
လားရှိုးမြို့ကို MNDAA နှင့် ညီနောင်မဟာမိတ်တပ်များ၊ ပြည်သူ့ကာကွယ်ရေးတပ်များမှ ၁၀၂၇ စစ်ဆင်ရေးအတွင်းသိမ်းပိုက်ခဲ့ပြီး တော်လှန်ရေးကာလအတွင်း ပထမဆုံးသိမ်းပိုက်နိုင်သော တိုင်းစစ်ဌာနချုပ်အဆင့် ရုံးစိုက်ရာမြို့လည်းဖြစ်သည်။
ဂနိုက်
#MeKongNews
#လားရှိုး
#အထူးဒေသ၁
#MNDAA
#စစ်ကောင်စီ
