မဲခေါင်၊ မတ် ၁၁
လက်ရှိကမ္ဘာ့ နိုင်ငံများအကြား တင်းမာမှုများ ကြီးထွားသထက်ကြီးထွားလာခြင်းကြောင့် ကမ္ဘာပျက်ကပ်ဆိုက် မည့်အဓိကအကြောင်းတရားမှာ ရာသီဥတုပြောင်းလဲမှုမဟုတ်ဘဲ မကောင်းဆိုးဝါး နျူကလီးယားလက်နက်များ အန္တရာယ်ကြောင့်သာလျှင် ပျက်ဆီးနိုင်ကြောင်း အမေရိကန်သမ္မတ ဒေါ်နယ်ထရမ့်က Fox News သတင်းဌာန၏ Sunday Morning Futures အင်တာဗျူးအစီအစဉ်တွင် သတိပေးပြောကြားသွားခဲ့သည်။
လက်ရှိတွင် ယူကရိန်းစစ်ပွဲမှသည် ဥရောပသို့ ရုရှားဘက်မှ ခြိမ်းခြောက်မှုများရှိနေသည့်အတွက် ပြင်သစ်က ဥရောပကို ကာကွယ်ရေး နျူကလီးယားဖိုက်တာဂျက်လေယာဉ်များကို အသုံးပြုရန် ဂျာမနီသို့ ပို့ဆောင်ပေးခဲ့ပြီ ဖြစ်သည်။
လက်ရှိတွင် ကမ္ဘာ့စီးပွားရေးအင်အားအကြီးဆုံး အမေရိကန်နှင့် တရုတ်တို့ ကုန်သွယ်ရေးစစ်ပွဲအသွင်ဆောင်သည်အထိ တင်းမာနေကြပြီ အီရန်သည်လည်း နျူကလီးယားလက်နက်များ အဆင့်မြှင်တင် ထုတ်လုပ်နေသဖြင့် လာမည့်ရက်ပိုင်းအတွင်း အမေရိကန်ကိုယ်စားလှယ်များ အီရန်သို့သွားပြီး နျူကလီးယားလျှော့ချနိုင်ရေး ဆွေးနွေးရမည် ဖြစ်သည်။
မြောက်ကိုရီးယားခေါင်းဆောင် ကင်ဂျုံအန်သည်လည်း နျူကလီးယားအစီအစဉ်များကို ထပ်မံအဆင့်မြှင့်တင် ထုတ်လုပ်နေကာ ရုရှားနှင့် မဟာမိတ်ဖွဲ့ထားသည့်အနေအထားကြောင့် ကမ္ဘာပျက်ရန် ခြိမ်းခြောက်နိုင်ဆုံးသောအရာသည် နျူကလီးယားလက်နက်သာဖြစ်သည်ဟု ထရမ့်က အင်တာဗျူးတွင် သတိပေးပြောဆိုခဲ့သည်။
“ကျွန်တော်တို့တွေ ငွေတွေအများကြီး ကုန်ကျခံပြီး နျူကလီးယားလက်နက်တွေ ထုတ်လုပ်နေကြတယ်။ ဒီလက်နက်ရဲ့ ဖျက်ဆီးနိုင်စွမ်းက စိတ်ကူးနိုင်သမျှထက်ကို ကျော်လွန်နေတယ်။ တော်တော်ဆိုးဝါးတဲ့ အရာကို ငွေတွေအများကြီးအကုန်ခံ ထုတ်လုပ်နေကြမှုမျိုးပဲ။ ထုတ်သုံးလိုက်ပြီဆိုတာနဲ့ ကမ္ဘာကြီး အဆုံးသတ်သွားနိုင်ပါတယ်။ ဂျိုးဘိုင်ဒန်တုန်းက ကမ္ဘာပျက်နိုင်တဲ့ အခြိမ်းခြောက်ဆုံးအန္တရာယ်ဟာ ရာသီဥတုပြောင်းလဲမှုလို့ပဲ အမြဲ ပြောပြောနေခဲ့တယ်။ ကျွန်တော်ပြောခဲ့သားပဲ။ မဟုတ်ဘူးလို့။ တကယ်တမ်း လူသားမျိုးတုံးဖို့၊ ကမ္ဘာပျက်ဖို့ အကြီးမားဆုံးအန္တရာယ်က နျူကလီးယားလက်နက်ပဲ။ မနက်ဖြန်ချက်ချင်း ထဖြစ်သွားနိုင်တယ်။ မိုင်ပေါင်းများစွာ အဝေးကနေ ပစ်ခတ်ပြီး ချက်ချင်း ခေါင်းတွေ ပွင့်ထွက်သွားမယ်။ ချက်ချင်းကြီးလဲ ဖြစ်သွားနိုင်တဲ့ မကောင်းဆိုးဝါး လက်နက်ပေါ့ဗျာ” ဟု ထရမ့်က အသိပေးပြောကြားခဲ့သည်။
လက်ရှိတွင် နျူကလီးယားထိပ်ဖူး အများဆုံးပိုင်ဆိုင်ထားသော နိုင်ငံမှာ ရုရှားဖြစ်ပြီး ထိပ်ဖူးပေါင်း ၆၀၀၀ ပိုင်ဆိုင်ထားက အမေရိကန်က ၅၀၀၀၊ တရုတ်တွင် ၃၅၀ ရှိထားပြီးဖြစ်ကာ တရုတ်သည် နောက် ၄ နှစ် ၅ နှစ် အတွင်း ရုရှားပိုင်ဆိုင်သည့် နျူကလီးယားထိပ်ဖူး အရေအတွက်ကို လိုက်မီရန် စီမံကိန်းချ ထုတ်လုပ်နေပြီဖြစ် သည်။
ထရမ့်သည် အဆိုပါ အင်တာဗျူးတွင် ယူကရိန်းသမ္မတ ဇီလန်းစကီးကို မိမိတို့နိုင်ငံမှ ဒေါ်လာ ၃၅၀ ဘီလီယံ ထောက်ပံ့ခဲ့သည့်ကြားမှ ကလေးဆီမှ သကြားလုံးကို တောင်းသလို မိမိတို့ကို တောင်းဆိုနေခဲ့သူဟုလည်း ဝေဖန်ပြောကြားသွားခဲ့သည်။
Ref:Thesun
ကိုကလင်း
#MeKongNews
#ထရမ့်
#အမေရိကန်
#နျူစစ်ပွဲ
#ရာသီဥတု
