မဲခေါင်၊ ဒီဇင်ဘာ၂၅
ရန်ကုန်ကိုပို့ဆောင်တဲ့ ရှမ်းဒေသထွက် ကုန်စိမ်းကားတွေ လမ်းခရီးဂိတ်တွေမှာ ပိတ်မိနေတာကြောင့် ကုန်စိမ်းတွေ ပျက်စီးတာ၊ ဈေးမရတာ၊ စရိတ်ပိုကုန်တာတွေ ဖြစ်ပေါ်နေပါတယ်။
သာစည်နဲ့ ကလောကြားက ကျွဲတပ်ဆုံ X-Ray ဂိတ်၊ ပျဉ်းမနား ၊ ရေနီနဲ့ ညောင်ခါးရှည်ဂိတ်တွေမှာ တားဆီးပိတ်ဆို့ခံနေရတာကြောင့် ၂ ရက်ကျော်အထိ ကြာမြင့်စွာစောင့်ဆိုင်းကြရတယ်လို့ အောင်ပန်းကုန်စိမ်းစျေးကွက်က သိရပါတယ်။
ပန်းဂေါ်ဖီ၊ ငရုတ်သီး၊ ဂျူးမြစ်၊ မုန်ညှင်း၊ မုန်လာဥနီ၊ ဘိုစားပဲနဲ့ ပန်းမျိုးစုံ အစရှိတဲ့ ကုန်စိမ်းမျိုးစုံဟာ ရှမ်းပြည်တောင်ပိုင်း၊ အောင်ပန်းကနေ ရန်ကုန်ဘက်ကိုနေ့ချင်းရောက်မှ စိုက်ပျိုးရောင်းချသူ၊ စားသုံးသူနဲ့ သယ်ဆောင်ရောင်းချသူတွေ အဆင်ပြေမှာဖြစ်ပေမယ့် အခု လမ်းဂိတ်တွေမှာကြာမြင့်နေတာကြောင့် အဆင်မပြေတာတွေ ဖြစ်ပေါ်နေတာပါ။
“တစ်ရက်တည်း ရောက်ရမယ့်ကုန်က မရောက်တော့ ပျက်စီးလို့ ကုန်သည်တွေနဲ့ စိုက်ပျိုးလုပ်ကိုင်တဲ့ တောင်သူတွေ နစ်နာဆုံးရှုံးတယ်၊ ပဲခူးနဲ့ ရန်ကုန်ကစားသုံးသူတွေလည်း သီးနှံလတ်ဆတ်တာ မစားကြရဘူးပေါ့၊ အရင်ကလို ကုန်စိမ်းကားတွေကို Green Lane နဲ့ သွားခွင့်ပြုရင် မကြန့်ကြာနိုင်ဘူးပေါ့ဗျာ” လို့ အောင်ပန်းကုန်စိမ်းဒိုင်တစ်ဦးက မဲခေါင်ကိုပြောပါတယ်။
ကျွဲတပ်ဆုံမှာ ည ၉ နာရီကျော်ကနေ မနက် ၅ နာရီအထိ ညမထွက်ရအမိန့်ကြောင့်အခုလို လမ်းခရီးမှာအနည်းဆုံး ၂ ရက်အထိ စောင့်ဆိုင်းရတာဖြစ်သလို ပျဉ်းမနား ရေနီနဲ့ညောင်ခါးရှည်ဂိတ်တွေမှာလည်း ထပ်မံပိတ်မိတာကြောင့် လမ်းခရီးမှာ ၂ ရက်ကျော်ကြာမြင့်ကြီးမှ အဝယ်ဒိုင်ကိုရောက်ရှိတယ်လို့ပြောပါတယ်။
“ကုန်တင်ကားကြီးတွေ တန်းစီနေကြရတာ ရေပေါင်းဆုံးရွာထိရောက်ပါတယ်၊ ကားစီးရေထောင်ချီမယ်၊ လူစီးကားနဲ့ တစ်ခြား ခြောက်ဘီးကားလေးတွေကတော့ ဂိတ်နားလေးတင် တန်းစီစောင့်ရပါတယ်၊ အရင်က ရန်ကုန်ဆို တစ်ညအိပ်ပဲ၊ အခုက ရန်ကုန်မရောက်သေးဘူး၊ လမ်းမှာတင် နှစ်ညအိပ် သုံးရက်ရှိနေလို့ ကုန်တွေပျက်စီးရသလို စျေးကောင်းလည်း မရတော့ဘူး” လို့ အောင်ပန်းက ကုန်စိမ်းတင်ယာဉ်မောင်းတစ်ဦးက မဲခေါင်ကိုပြောပါတယ်။
မစောင့်ချင်လို့ကျော်တက်တဲ့ကားတွေကို ဒဏ်ကြေးအဖြစ် ကျပ်တစ်သိန်းအထိကောက်ပြီး လွှတ်ပေးတာလည်း ရှိတယ်လို့ သိရပါတယ်။
“ဘယ်သူကပေးချင်မှာလဲဗျာ၊ တမင်သက်သက်ခွင်လုပ်ထားတာဗျ၊ ကားတွေကလည်း ရက်ကြာလာတော့စားစရိတ်နဲ့တွက်ပြီးပိုက်ဆံပေးကျော်တက်ကြတာပါ၊ ဒါတောင်သူတို့ညှိလို့ တက်လာခဲ့ဆိုမှပါ၊ မညှိပဲနဲ့တက်သွားလို့ကတော့ တောင်းသလောက်ပေးပဲ၊ အခြားနေရာမှာလည်း စောင့်ရတာပါပဲ” လို့ ကားသမားတစ်ဦးကပြောပါတယ်။
အောင်ပန်းကနေ ၁၂ ဘီးကားတစ်စီးကို ပိဿာ ၁၀၅၀၀ နဲ့ တွဲကားကို ပိဿာ ၂၂၀၀၀ သာ ကတ္တားကခွင့်ပြုပြီး ကတ္တားတွေမှာ ကြန့်ကြာရတာလည်း အဆင်မပြေကြဘူးလို့ သိရပါတယ်။
MK-012
#MekongNews
#ရှမ်းဒေသ
#ကုန်စိမ်းကား
#ဂိတ်တွေပိတ်
#ဂိတ်ဖြတ်ခ
