မဲခေါင်၊ စက်တင်ဘာ ၂၃
ရှမ်းပြည်တောင်ပိုင်း၊ ရပ်စောက်မြို့နယ်၊ ပင်ဖြစ်ကျေးရွာ ရဲစခန်းအနီးမှာ ရှမ်းပြည်ပြန်လည် ထူထောင်ရေးကောင်စီ/ တပ်မတော် (RCSS)နဲ့ ပအိုဝ်းပြည်သူ့စစ် (PNA) တို့က တိုက်ပွဲအတု ဖန်တီးခဲ့တယ်လို့ ဒေသခံတွေက ပြောပါတယ်။
မနေ့ (စက်တင်ဘာ ၂၂) မနက် ၁၁ နာရီခန့်အချိန်မှာ ဖြစ်ပွားခဲ့ပြီး တိုက်ပွဲအတု ဖြစ်တာကြောင့် ၂ ဖက်လုံးမှာ ထိခိုက်မှု မရှိဘူးလို့ နီးစပ်တဲ့ စစ်ရေးသတင်းအရင်းအမြစ်က ဆိုပါတယ်။
“အရင်က စစ်တပ်ပဲရှိတယ်။ အခုက ပအိုဝ်းဖြူရော (PNA)၊ ရှမ်း ၂ ဖွဲ့ရောဆိုတော့ ဆက်ကြေးကောက်ရတာ၊ ဝေစားမျှစား လုပ်ရတာ မလောက်ဘူးထင်တယ်။ ၄ ဖွဲ့ဆိုတော့ သူတို့လည်း ရူးချင်ချင် ဖြစ်သွားတယ် ထင်တယ်။ အဲလိုမျိုး လျှောက်ပစ်၊ လျှောက်လုပ်နေတာလေ ၂ ဖက်လုံးက” လို့ ပင်ဖြစ်ရဲစခန်းနဲ့ နီးစပ်တဲ့ ဒေသခံ တစ်ဦးက ပြောပါတယ်။
စစ်အာဏာသိမ်းပြီး နောက်ပိုင်း ပင်ဖြစ်ကျေးရွာမှာ RCSS ကို စစ်ကောင်စီက အခြေစိုက်ခွင့် ပေးထားပြီး လူသစ်စုဆောင်းခွင့်၊ ဆက်ကြေးကောက်ခွင့်တွေ ခွင့်ပြုထားတယ်လို့ သိရပါတယ်။
ဒါ့အပြင် PNA နဲ့ ရှမ်းပြည်တိုးတက်ရေးပါတီ/ တပ်မတော် (SSPP)တို့လည်း မကြာခဏ ဝင်ရောက် လှုပ်ရှားနေပြီး ရပ်စောက်မြို့နယ်၊ ကျောက်ဂူကျေးရွာမှာလည်း ရှမ်းတပ် ၂ ဖွဲ့ကြားမှာ တိုက်ပွဲဖြစ်ပွားလေ့ ရှိပါတယ်။
“အကြီးအကျယ် ဖြစ်တယ် ထင်နေတာ။ အဲလို မဟုတ်ဘူး။ သူတို့ ဒီတိုင်း မိုးပေါ်ထောင်ပစ်တာတဲ့။ ပအိုဝ်းဖြူနဲ့ ရှမ်းကျားက ဝင်လာပြီးတော့ ရဲစခန်းကို တန်းပစ်တာတော့ မဟုတ်ဘူး။ စခန်းသိမ်းတာ မဟုတ်ဘူး။ တိုက်ပွဲ အတုပေါ့။ ရဲစခန်းက ဘယ်နေရာမှ မထိဘူး။ သူတို့လည်း အာဏာရှင်ကို ဆန့်ကျင်ယောင်ဆောင်တဲ့သဘောပေါ့” လို့လည်း ပင်ဖြစ်ဒေသခံ တစ်ဦးက ပြောပါတယ်။
ပြီးခဲ့တဲ့ လပိုင်းကတည်း ပင်ကျေးရွာမှာ RCSS က ဆန်ရိက္ခာနဲ့ တစ်အိမ် ငွေကျပ် ၂ သောင်း ကောက်ခံခဲ့ပြီး ဩဂုတ်လတစ်လလုံး ထမင်းထုတ်လည်း နေ့တိုင်းပို့ဆောင်ပေးခဲ့ရတယ်လို့ သိရပါတယ်။
တိုက်ပွဲအတု ဖန်တီးခဲ့တဲ့ စစ်ကောင်စီ လက်အောက်ခံ ပင်ဖြစ်ကျေးရွာ ရဲစခန်းဟာ ရဲတပ်ဖွဲ့ဝင် ၁၀ ဦးကျော်ခန့်သာ ရှိတဲ့ နယ်မြေခံ ရဲကင်းအဆင့်မျှသာ ဖြစ်ပြီး ရဲတပ်ဖွဲ့တွေကလည်း လာဘ်ယူပြီး မူးယစ်ဆေးဝါး ရောင်းချခွင့် ပေးထားတယ်လို့ ဒေသခံတွေက ပြောပါတယ်။
MK-014
