မဲခေါင်၊ ဖေဖော်ဝါရီ ၅
ကရင်နီပြည်နယ်၊ လွိုင်ကော်မြို့က အကျဥ်းထောင်မှာ ဇန်နဝါရီလ ၄ ရက်နေ့ကတည်းက လွတ်ရက်စေ့နေတဲ့ ရာဇဝတ်အကျဥ်းသား ၁၄ ဦးနဲ့ နိုင်ငံရေးအကျဥ်းသား ၆ ဦးတို့ကို ဒီနေ့( ဖေဖော်ဝါရီလ ၅ ရက်)အချိန်အထိ လွှတ်ပေးခြင်းမရှိသေးဘူးလို့ မြန်မာနိုင်ငံလုံးဆိုင်ရာ အကျဥ်းသားများ ကွန်ရက်က တာဝန်ရှိသူတဦးက ပြောပါတယ်။
“ ၁၄ ယောက်က ဇန်နဝါရီလ ၄ ရက်တည်းက လွတ်ရမှာပေါ့။ ကျန်တဲ့နိုင်ကျဥ်းတွေက တစ်လပိုင်းထဲမှာ လွတ်ရက်စေ့တာပေါ့နော်။ တယောက်နဲ့တယောက်တော့ လွတ်ရက်မတူတာရှိတယ်ပေါ့။ စုစုပေါင်း အယောက် ၂၀ က ကျသင့်တဲ့ ပြစ်ဒဏ်ကို ကျခံပြီးသည့်တိုင်အောင် မိဘတွေရဲ့ ရင်ခွင်ဆီကို ပြန်မရောက်ရသေးဘူးပေါ့” လို့ သူက ပြောပါတယ်။
လွိုင်ကော်အကျဥ်းထောင်ရဲ့ အကျဥ်းဦးစီးဌာနက လုံခြုံရေးကို အကြောင်းပြပြီး လွတ်ရက်စေ့နေတဲ့အကျဥ်းသားတွေကို အကျဥ်းထောင်ထဲမှာ ဆက်လက် ထိန်းသိမ်းထားတာဖြစ်တယ်လို့ သိရပါတယ်။
လွတ်ရက်စေ့နေတဲ့ အကျဥ်းသားတွေကို နိုင်ငံရေးအကြောင်းပြပြီး ဆက်လက်ထိန်းသိမ်းနေတာက လူ့အခွင့်အရေးကို ချိုးဖောက်တာဖြစ်လို့ ရာဇဝတ်မှုနဲ့ကျတဲ့အကျဥ်းသား ၁၄ ဦးနဲ့ နိုင်ငံရေးအကျဥ်းသား ၆ ဦးတို့ကို ပြန်လွှတ်ပေးဖို့အတွက် ကရင်နီ နိုင်ငံရေးအကျဥ်းသားများအစည်းအရုံး -KPPA နဲ့ မြန်မာနိုင်ငံလုံးဆိုင်ရာ နိုင်ငံရေးအကျဥ်းများကွန်ရက် -PPNM တို့က ပူးပေါင်းတောင်းဆိုထားပါတယ်။
လွိုင်ကော်မြို့မှာ နိုဝင်ဘာလ ၁၁ ရက်ကစပြီး စစ်ကောင်စီတပ်ရဲ့ ပြည်သူ့ကာကွယ်ရေးတပ်တွေကြား တိုက်ပွဲတွေ ဆက်တိုက်ပြင်းထန်နေပြီး စစ်ကောင်စီတပ်က လေကြောင်းကနေ ဗုံးကြဲတိုက်ခိုက်တာ၊ လက်နက်ကြီးနဲ့ အဆမတန်ပစ်ခတ်နေတာတွေကို ဆက်တိုက်ပြုလုပ်နေတယ်လို့ သိရပါတယ်။
CJ-004
#MeKongNews
#လွိုင်ကော်
#အကျဥ်းထောင်
#လွတ်ရက်စေ့
#မလွတ်
