မဲခေါင်၊ အောက်တိုဘာ ၂၇

စစ်အာဏာရှင်စနစ် အမြစ်ပြတ် ချေမှုန်း တိုက်ထုတ်ရန်အတွက် ဒီနေ့ အောက်တိုဘာ ၂၇ ရက်နေ့မှ စပြီး စစ်ဆင်ရေးကြီး စတင်လိုက်တယ်လို့ မြန်မာအမျိုးသား ဒီမိုကရက်တစ် မဟာမိတ် တပ်မတော်-MNDAA က ကြေညာလိုက်ပါတယ်။

တစ်နိုင်ငံလုံးရှိ ပြည်သူလူထုရဲ့ လိုလားချက်ဖြစ်တဲ့ စစ်အာဏာရှင်စနစ် အမြစ်ပြတ် တိုက်ထုတ်ရန်၊ ပြည်သူလူထုကို အကြမ်းဖက် သတ်ဖြတ်နေတဲ့ စစ်ကောင်စီရန်မှ ကာကွယ်ရန်၊ စစ်ကောင်စီမှ စစ်အင်အား အလုံးအရင်း အသုံးပြုပြီး ထိုးစစ်ဆင်မှု လေကြောင်းမှ ဗုံးကြဲတိုက်ခိုက်မှု လက်နက်ကြီးနဲ့ နေ့ညမရွေး ပစ်ခတ်မှုတွေကို ဟန့်တားရန် ထိုးစစ်စတင်တာလို့ ဆိုပါတယ်။

ဒါ့အပြင် နိုင်ငံတော်အား ဒီမိုကရေစီနဲ့ တရားဥပဒေ စိုးမိုးရေး၊ ငြိမ်းချမ်းရေး စတဲ့ လမ်းကြောင်းမှန်ပေါ် ပြန်လည် ရောက်ရှိလာစေရန်၊ စစ်မှန်တဲ့ ကိုယ်ပိုင်အုပ်ချုပ်ခွင့်ရဒေသ၊ စစ်မှန်တဲ့ ဖက်ဒရယ်ပြည်ထောင်စု နိုင်ငံတော်သစ်ကြီး အတူတကွ တည်ထောင်ရန် နဲ့ အွန်လိုင်းဂိမ်း ကျားဖြန့်လုပ်ငန်းကို လုပ်ကိုင်နေတဲ့ စစ်ကောင်စီနဲ့ ပြည်သူ့စစ် တွေကို တိုက်ဖျက် နှိမ်နှင်းရန်စတဲ့ ရည်ရွယ်ချက်နဲ့ စစ်ဆင်ရေးကြီးကို ဒီကနေ့မှာ စတင်လိုက်ပြီလို့ MNDAA ကပြောပါတယ်။

အဲ့ဒီကြေညာချက်နဲ့အတူ စစ်ကောင်စီနဲ့ ပြည်သူ့စစ်တွေရဲ့ စခန်းကို ညီနောင်မဟာမိတ်တပ်ဖွဲ့တွေက ဝင်ရောက် တိုက်ခိုက်နေပြီဖြစ်ပြီး ဒီနေ့မနက်က လားရှိုး၊ ချင်းရွှေဟော်တို့မှာ စစ်ပွဲပြင်းထန်နေတယ်လို့ MNDAAက ထုတ်ပြန်ပါတယ်။

စစ်ကောင်စီဟာ နိုင်ငံတော် ငြိမ်းချမ်းရေး နဲ့ ပင်လုံစာချုပ်ကို လျစ်လျူရှုခဲ့တဲ့အပြင် ပဋိပက္ခတွေကို ဖန်တီးခဲ့ပြီး တစ်နိုင်ငံလုံးကို ပြည်တွင်းစစ်ဖြစ်ပေါ်စေခဲ့တယ်လို့ MNDAA ကဆိုပါတယ်။

ဒါ့အပြင် ၂၀၂၁ ခုနှစ်မှာ စစ်ကောင်စီက အာဏာထပ်မံ သိမ်းလိုက်တာဟာ ဒီမိုကရေစီလမ်းစဉ်ကို ကူးပြောင်း နေတဲ့ နိုင်ငံတော်အား ဒုက္ခပင်လယ်နက်ထဲသို့ ထပ်မံတွန်းပို့လိုက်တာ ဖြစ်တယ်လို့ MNDAAက ဆိုပါတယ်။

စစ်ကောင်စီဟာ လူငယ် လူရွယ် ကျောင်းသား အမျိုးသမီးတဲ့ အလွှာပေါင်းစုံမှ ပြည်သူလူထုတွေကို မတရား သတ်ဖြတ်တဲ့အပြင် ကျေးရွာ စာသင်ကျောင်း သာသနိက အဆောက်အဦးတို့ကိုပါ ဗုံးကြဲ တိုက်ခိုက် မီးရှို့ဖျက်ဆီးတာကြောင့် နိုင်ငံတော်ဟာ ဘက်ပေါင်းစုံမှာ ယိုယွင်းပျက်စီးနေတယ်လို့ ကိုးကန့်အဖွဲ့က ပြောပါတယ်။

အဲ့ဒီလို အခြေအနေတွေဟာ မြန်မာပြည်သူ တစ်ရပ်လုံးကို လက်နက်ကိုင် တော်လှန်ရေး လမ်းကြောင်းထဲကို တွန်းပို့ခဲ့တာဖြစ်ပြီး လက်နက်ကိုင် တော်လှန်ရေးကသာ စစ်အာဏာရှင်စနစ်ကို အမြစ်ဖြုတ်နိုင်မယ်လို့ MNDAA ကဆိုပါတယ်။

ဒါကြောင့် MNDAA မှ စစ်ဆင်ရေးကို ဖော်ဆောင်နေရာမှာ တစ်နိုင်ငံလုံးရှိ တော်လှန်ရေး လက်နက်ကိုင် အဖွဲ့အစည်းများ အနေနဲ့ အချင်းချင်းကြား သဘောထားကွဲလွဲမှုကို ဘေးဖယ်ထားပြီး စစ်ကောင်စီနဲ့ ပြည်သူ့စစ်ကို ဟန်ချက်ညီညီ အတူတကွ တိုက်ဖျက်ကြဖို့ မျှော်လင့်တယ်လို့ MNDAA ကပြောပါတယ်။

MNDAA အနေနဲ့ စည်းရုံးရသမျှ အင်အားစု အားလုံးကို စည်းလုံးရန် ဖြစ်တဲ့အတွက် လက်နက်ချပြီး အလင်းဝင် ပူးပေါင်လာသူမှန်သမျှကို သဘောထားကြီးကြီးနဲ့ လက်ခံကြိုဆိုမှာဖြစ်ပြီး စစ်ကောင်စီကို နောက်ခံပြုပြီး တော်လှန်ရေးကို ဆက်လက် ဆန့်ကျင်နေသူတွေကိုတော့ ပြင်းထန်စွာ တိုက်ခိုက်သွားမယ်လို့ ဆိုပါတယ်။

စစ်အာဏာရှင်စနစ်ကို တော်လှန်နေကြတဲ့ တော်လှန်ရေး လက်နက်ကိုင် အဖွဲ့အစည်းအသီးသီးအနေနဲ့ စည်းလုံးညီညွတ်စွာနဲ့ ဟန်ချက်ညီညီ တော်လှန်ရေးတစ်ရပ်ကို မိမိတို့ရဲ့ဒေသအလိုက် ဆင်နွဲနိုင်ရင် စစ်အာဏာရှင်စနစ်ကို မုချသေချာပေါက် အမြစ်ပြုတ် ချေမှုန်းနိုင်မှာ ဖြစ်တယ်လို့ MNDAAကဆိုပါတယ်။

ဒါကြောင့် မဟာမိတ်တပ်ပေါင်းစု တစ်ရပ်ကို အမြန်ဆုံးဖွဲ့စည်းပြီး ရှိသမျှအင်အားကို တပြိုင်နက်တည်း အသုံးပြုနိုင်ပါက စစ်ရေး နိုင်ငံရေး ရည်မှန်းချက်အသီးသီးကို ကျန်းသေပေါက် အကောင်အထည်ဖော်နိုင်မယ့် အခွင့်အရေး ဖြစ်တယ်လို့ MNDAA ကပြောပါတယ်။
ရှမ်းမြောက်မှာ ဒီနေ့မနက်မှစပြီး စစ်ကောင်စီတပ်နဲ့ စစ်ကောင်စီ လက်အောက်ခံ ပြည်သူ့စစ်တပ်ဖွဲ့တွေကို MNDAA ၊ TNLAA၊ AA နဲ့ BPLA မဟာမိတ်အဖွဲ့က တစ်ပြိုင်နက် ထိုးစစ်ဆင်နေပြီဖြစ်ပြီး စစ်ကောင်စီရဲ့ စခန်းတွေ ကျတာတွေလည်း ရှိနေပါတယ်။

CJ-002

#MekongNews

#ကိုးကန့်ဒေသ

#MNDAA

#ထိုးစစ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)