မဲခေါင်၊ အောက်တိုဘာ ၂၁
စစ်ကောင်စီရဲ့ ပြည်သူ့စစ်မှုထမ်း အပတ်စဉ် ၃၊ ၄၊ ၅ ကို ခေါ်ယူရာမှာ အဓမ္မခေါ်ယူခြင်း ခံရသူ အများစု ပါဝင်တယ်လို့ ဗမာ့ရေးရာနဲ့ ပဋိပက္ခလေ့လာရေးအဖွဲ့ (BACS) တာဝန်ရှိသူက ပြောပါတယ်။
အရင် အပတ်စဉ် ၁၊ ၂ ကလိုမျိုး မိမိဆန္ဒအလျောက် စစ်မှုထမ်းလိုသူတွေ မရှိတော့တဲ့အတွက် မဲနှိုက်တာ မပြုလုပ်တော့ဘဲ တိုက်ရိုက်ဆင့်ခေါ်စာနဲ့ ခေါ်ယူတာ၊ စစ်ဆေးရေးဂိတ်တွေမှာ စောင့်ဖမ်းပြီး ပေါ်တာဆွဲတာတွေ ပြုလုပ်ခဲ့တာပဲ ဖြစ်ပါတယ်။
“စစ်ကောင်စီ ထိန်းချုပ်နိုင်တဲ့ ဒေသတွေက ပိုပြီးတော့ ခံရတာပေါ့နော်။ သူတို့ သတ်မှတ်တဲ့ အရေအတွက် ၄ ထောင်နဲ့ ၅ ထောင်သတ်မှတ်တဲ့အထဲမှာ ထိန်းချုပ်ဒေသက လျော့နည်းလာတော့ မဖြစ်မနေ ခေါ်ယူရတဲ့အထဲမှာ အတင်းအကြပ် ခေါ်ယူတာတွေ ဖြစ်လာတာပေါ့။ ဒါကြောင့်လည်း အပတ်စဉ် ၃၊ ၄၊ ၅ မှာ ရန်ကုန်တိုင်းနဲ့ ဧရာဝတီတိုင်းက အဓိက ခံရတာပေါ့နော်” လို့ BACS ရဲ့ သုတေသန တာဝန်ခံ ကိုမင်းထက်အောင်က ပြောပါတယ်။
စစ်မှုထမ်း အပတ်စဉ် ၁ ကို ခေါ်ယူခဲ့စဉ်က စစ်တပ်ထောက်ခံသူ အများစုနဲ့ ၅ ထောင်အရေအတွက် ပြည့်မီခဲ့ပေမယ့် အပတ်စဉ် ၂ ကစပြီး ခေါ်ယူဖို့ ခက်ခဲလာတာကြောင့် စစ်မှုထမ်း ဥက္ကဌဖြစ်သူ ဗိုလ်ချုပ်ကြီး တင်အောင်စန်းက လျာထားချက်ဦးရေ ပြည့်မီဖို့ ဖိအားပေးခေါ်ယူခိုင်းထားတယ်လို့ စစ်ကောင်စီ လက်အောက်ခံ မီဒီယာတွေကို ဖြေကြားထားပါတယ်။
“အပတ်စဉ် ၃ မှာဆိုရင် ပအိုဝ်းဘက်မှာ သင်တန်းကျောင်းအသစ် ဖွင့်ပြီးတော့ ရန်ကုန်တိုင်းက ခေါ်တဲ့လူတွေ အများဆုံး ပို့ထားတာမျိုး ကျနော်တို့ တွေ့ရတယ်ပေါ့နော်။ နောက်ထပ်ခံရတာကတော့ ပဲခူးတိုင်း၊ မကွေးတိုင်း အရှေ့ခြမ်း၊ မန္တလေးတိုင်းပေါ့နော်။ ပြီးတော့ နေပြည်တော်လည်း ပါတာပေါ့” လို့ ကိုမင်းထက်အောင်က ဆက်ပြောပါတယ်။
စစ်ကောင်စီက အပတ်စဉ် ၃၊ ၄၊ ၅ ကို စုဆောင်းခဲ့ရာမှာ ပြည်သူ့စစ်မှုထမ်းတင် မကဘဲ အရင်ကတည်းက တပ်မတွေအလိုက် တပ်သားသစ်စုဆောင်းရတဲ့ လူသစ်စုဆောင်းရေး ကဏ္ဍကိုလည်း တစ်ပြိုင်နက် အကောင်အထည်ဖော်လာတယ်လို့ BACS ရဲ့ လေ့လာချက်အရ သိရပါတယ်။
စစ်ကောင်စီဟာ သူတို့ထိန်းချုပ်နယ်မြေတင်မကဘဲ ပြည်ပနိုင်ငံတွေမှာ ဖမ်းဆီးခံရတဲ့ တရားမဝင် ရွှေ့ပြောင်းလုပ်သားတွေကိုလည်း အဓမ္မစစ်မှုထမ်း စေခိုင်းထားပြီး တိုက်ပွဲဖြစ်ပွားရာနဲ့ နီးစပ်ဒေသတွေမှာလည်း ပြည်သူ့စစ် ဖွဲ့စည်းနေတယ်လို့ ဆိုပါတယ်။
“ရှမ်းပြည်ဘက်မှာဆိုရင် စစ်မှုထမ်းပြဌာန်းပြီးမှ ပြည်သူ့စစ်တွေက ပိုပြီးစုဆောင်းလာတာ တွေ့ရတယ်ပေါ့နော်။ ဥပမာ PNO/ PNA ဆိုရင် သူတို့စုထားတာက စစ်တပ်ထက်တောင် များတယ်လို့ ပြောလို့ရတာပေါ့။ အဲတာတွေက အတင်းအကြပ် ခေါ်တာတွေ ရှိသလို တချို့ကြတော့လည်း သူတို့ဆီဝင်ရင် စစ်ကောင်စီရဲ့ စစ်မှုထမ်း မပါတော့ဘူးဆိုတာမျိုး မက်လုံးပေးထားတာကို တွေ့ရတယ်ပေါ့နော်” လို့ ကိုမင်းထက်အောင်က ရှင်းပြပါတယ်။
ဩဂုတ် ၁၆ ရက်နေ့တုန်းက မန္တလေးတိုင်း၊ တံတားဦးမြို့နယ်၊ ထောက်ရှာကုန်းရွာမှာ စစ်ကောင်စီထောက်ခံသူ ပန်းရံလုပ်သား အယောက် ၁၀၀ ပေါ်တာဆွဲခံရပြီး ၄၅ ဦးကို စစ်မှုထမ်းခေါ်ယူခဲ့တယ်လို့ ပြည်သူ့စစ်ခေါင်းဆောင် ပေါက်ကိုယ်တော်ရဲ့ ပြောပြချက်အရ သိရပါတယ်။
စစ်ကောင်စီရဲ့ စစ်မှုထမ်းခေါ်ယူရေးအဖွဲ့ကို ဖိအားပေးမှုကြော်င့် စစ်မှူထမ်း အပတ်စဉ် ၃၊ ၄၊ ၅ မှာ စုဆောင်းခံရသူဦးရေ ၂၁,၀၀၀ ထက်မနည်းရှိနိုင်ပြီး အပတ်စဉ်တခုမှာ အရင်အပတ်စဉ်တွေထက် လူဦးရေ ၂ ထောင်ခန့် ပိုနိုင်တယ်လို့ BACS က သုံးသပ်ထားပါတယ်။
MK-014
