မဲခေါင်၊ မတ် ၂၉
ရှမ်းပြည်တောင်ပိုင်း၊ အင်းလေးကန်ဒေသ ညောင်ရွှေမြို့နယ် ကျေးရွာအားလုံးကို စစ်မှုထမ်းဖို့ နာမည်စာရင်းတွေနဲ့အတူ ထောက်ပံ့ငွေပေးဖို့ တစ်အိမ် ကျပ် ၂ သောင်းကို အုပ်ကြီးတွေက ကောက်ခံနေတယ်လို့ ဒေသအရင်းအမြစ်တွေက ပြောပါတယ်။
အင်းလေး ဟဲယာရွာမဆိုရင် စာရင်းမှာ အယောက် ၃၀၀ နဲ့ ပြင်လွန်ရပ်မှာ ၃၅ ဦး၊ တောင်ချောင်းရပ်က ၄ ဦး၊ ကလေးငယ်ရပ်က ၉၀ ဦးတို့ဖြစ်သလို အင်းပေါခုန်၊ သလဲဦး၊ ကျေးစားကုန်း စတဲ့ အခြားရွာတွေမှာလည်း ၃၀ နဲ့ ၄၀ ကြား ရှိတယ်လို့ သိရပါတယ်။
ဒီနေ့ မတ်လ ၂၉ ရက်မှာ စာရင်းပါသူတွေဟာ ညောင်ရွှေကို သွားပြီး မဲနှိုက်ကြရမှာဖြစ်ပြီး မဲပေါက်သူတွေက လူစားထည့်နိုင်သလို စစ်မှုထမ်းမယ်ဆိုရင် ကျန်သူတွေကို သက်ဆိုင်ရာ ကျေးရွာတွေကို ပြန်လွှတ်ပေးမယ်လို့ သိရပါတယ်။
စစ်မှုထမ်းမယ့်သူတွေနဲ့ အစားထိုးသူတွေအတွက် ထောက်ပံ့ကြေးအနေနဲ့တစ်အိမ်ကို ကျပ် ၂ သောင်းကောက်ခံသွားမယ်လို့ သိရပါတယ်။ အဲဒီငွေကို စစ်မှုမထမ်းရတဲ့အိမ်တွေက ပေးရမယ်လို့ ဆိုပါတယ်။
စစ်မှုထမ်းဖို့ အတင်းအဓမ္မလုပ်ဆောင်နေတဲ့ ကေလာရွာ၊ ရွာမ၊ နောက်ရပ်ကြီး၊ လင်းကင်း၊ မိုင်းလီရပ်ကွက်အုပ်ကြီးနဲ့ ရာအိမ်မှူး၊ ဆယ်အိမ်မှူးတွေကို အင်းလေးဒေသ တရားမျှတမှု ဖော်ဆောင်ရေးအဖွဲ့ JMC-I က စစ်မှုထမ်းသွားတဲ့ကလေးတွေ သေကြေ၊ ထိခိုက်ဒဏ်ရာရတာတွေ ဖြစ်လာရင် အုပ်ချုပ်ရေးက လူတွေ ကိုယ့်လုပ်ရပ် ကိုယ်တာဝန်ခံရမယ်လို့ မနေ့က မတ်လ ၂၈ ရက်နေ့မှာ သတိပေးစာပေးပို့ထားပါတယ်။
အင်းလေးဒေသမှာ ညောင်ရွှေမြို့ပေါ် ရပ်ကွက် ၈ ရပ်ကွက်အပါအဝင် ရွာပေါင်း ၄၄၅ ရွာ ရှိတဲ့အတွက် ၂၀၁၄ ခုနှစ် သန်းခေါင်စာရင်းအရ ၁၇၈၄၅၇ အိမ်ထောင်စုရှိရာ( ယခု ၂၀၂၄ ခုနှစ်တွင် တိုးပွားလာသည့် လူဦးရေအရဆိုရင် ပိုများနိုင် ) တအိမ်ကျပ် ၂ သောင်းနှုန်းကောက်ခံပါက တခါကေက်ရငွေ ကျပ် သိန်းပေါင်း ၃သောင်းခွဲကျော်ရရှိမှာဖြစ်ပြီး စစ်မှုထမ်းဈေးကွက်ကြီး တစ်ခုဖြစ်ပေါ်နေတယ်လို့ ဒေသခံတွေက ဝေဖန်နေကြကြောင်းသိရပါတယ်။
“စစ်ကောင်စီနဲ့လက်အောက်ခံ အုပ်ကြီးတွေအတွက် လူ့အရင်းအမြစ် ဈေးကွက်ကြီးပေါ့၊ မိဘတွေ၊ ကလေးတွေရဲ့ ပုူပင်သောက မျက်ရည်တွေ၊ ချွေး၊ သွေးတွေနဲ့လုပ်စားကြမှာ” လို့ အင်းလေးဒေသ နိုင်ငံရေးတက်ကြွလှုပ်ရှားသူ တစ်ဦးက ဝေဖန်ပြောကြားပါတယ်။
စစ်ကောင်စီဟာ ပြည်သူ့စစ်မှုထမ်းစုဆောင်းမှုကို ၂၀၂၄ ခုနှစ်၊ သင်္ကြန်ပြီးမယ်လို့ ပြောထားပေမယ့် အခုကတဲက အချို့သော လေ့ကျင့်ရေးတပ်တွေဆီကို စုဆောင်းရရှိတဲ့သူတွေ ပို့ဆောင်နေကြပါတယ်။
ပြည်သူ့ပန်းတိုင်အဖွဲ့ရဲ့ စုစည်းထားတဲ့စာရင်းအရ စစ်အခြေခံလေ့ကျင့်ရေးတပ်ပေါင်း ၁၁ ခုအနက် ရှမ်းတောင်က ပင်လောင်းမှာ စခတ(၄)၊ ရှမ်းမြောက်က လားရှိုးမှာ စခတ(၁၁) တို့ရှိကြပြီး တန်းမြင့်သင်တန်းကျောင်းတွေအနေနဲ့ ရှမ်းတောင် ကျိုင်းတောင်းမှာ တတက(၂)၊ ရှမ်းမြောက် ပန်ကပ်(တန့်ယန်း)မှာ တတက(၈)နဲ့ ရှမ်းအရှေ့ ကျိုင်းတုံမှာ တတက(၁၁) တို့ရှိကြပါတယ်။
MK-012
