မဲခေါင်၊ ဧပြီ ၁၇
ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဆီဆိုင်မြို့ အနောက်တောင်ဘက် တစ်နေရာမှာ စစ်ကြောင်းထိုးလာတဲ့ စစ်ကောင်စီတပ်နဲ့ ပအိုဝ်းအမျိုးသား လွတ်မြောက်ရေး တပ်မတော် (PNLA)တို့ ပြင်းထန်တိုက်ပွဲ ဖြစ်ပွားခဲ့တယ်လို့ ဒေသတွင်း သတင်းအရင်းအမြစ်တွေက ပြောပါတယ်။
ဧပြီလ ၁၆ ရက်နေ့ မနက် ၈ နာရီကနေ နေ့လည် ၁၂ နာရီအထိ ၄ နာရီကျော်ကြာ တိုက်ပွဲဖြစ်ပွားခဲ့ပြီး စစ်ကောင်စီဘက်တပ်ဘက်က ၁၀ ဦးကျော် သေဆုံးခဲ့တဲ့အပြင် သေနတ် ၃ လက်နဲ့ ကားတစ်စီးကိုလည်း သိမ်းဆည်းရမိခဲ့တယ်လို့ ဆိုပါတယ်။
PNLA စစ်ဘက်ဆိုင်ရာ ပြောရေးဆိုခွင့်ရှိသူ တစ်ဦးက “အလောင်းကတော့ ကျနော်တို့ မျက်မြင်ကိုယ်တွေ့ပါ။ ကားကတော့ ၅ စီးရတယ်ပေါ့နော်။ ၄ စီးက သူတို့ မီးရှို့ဖျက်စီးလိုက်တော့ တစ်စီးပဲ အကောင်းတိုင်း ရတယ်ပေါ့နော်” လို့ ပြောပါတယ်။
ဆီဆိုင်မြို့ရဲ့ နေရာအများစုကို PNLA က ထိန်းချုပ်ထားပြီး စစ်ကောင်စီတပ်ဘက်ကလည်း မြို့ကို ပြန်သိမ်းယူဖို့ နေ့တိုင်းနီးပါး ထိုးစစ်ဆင်နေတာကြောင့် မကြခဏ ပြင်းထန်တိုက်ပွဲတွေ ဖြစ်ပွားနေတယ်လို့ ရှေ့တန်း မြေပြင် သတင်းအရင်းအမြစ်တွေက ပြောပါတယ်။
ဧပြီလ ၁၅ ရက်နေ့က ဖြစ်ပွားခဲ့တဲ့ ဆီဆိုင်မြို့တွင်း တိုက်ပွဲမှာလည်း စစ်ကောင်စီတပ်ဘက်က အရာရှိတွေ ဖြစ်တဲ့ ဗိုလ်ကြီး ဝေလင်းမောင်၊ ဗိုလ်အောင်ကျော်ထွန်း၊ ဒုတပ်ကြပ် အောင်မျိုးထွန်းတို့ အပါအဝင် ၁၃ ဦး သေဆုံးခဲ့သေးတယ်လို့ PNLA တာဝန်ရှိသူတွေဆီက သိရပါတယ်။
အဝေးရောက် ဆီဆိုင်မြို့ခံ တစ်ဦးကလည်း “တိုက်ပွဲက နေ့တိုင်း ချနေကြတယ်။ ကျနော်တို့လည်း ပြန်လို့ မရသေးဘူး။ ပစ္စည်းဝင်ယူတဲ့လူတွေ လက်နက်ကြီးထိလို့ သေကြတယ်။ အိမ်တော်တော်များများက စစ်တပ်နဲ့ PNO တွေခိုးလို့ ကုန်ပြီ။ ပြန်ရင် အကုန် အစက ပြန်စရတော့မှာ” လို့ ပြောပါတယ်။
ဆီဆိုင်တိုက်ပွဲ စတင်တဲ့ ဇန်နဝါရီလ နောက်ဆုံးအပတ်ကစပြီး ဧပြီလ ၈ ရက်နေ့အထိ စစ်ကောင်စီတပ်ရဲ့ ရမ်းသန်း ပစ်ခတ်မှုကြောင့် အရပ်သား ၅၈ ဦး သေဆုံးကာ ၇၀ ကျော် ပြင်းထန်ဒဏ်ရာ ရခဲ့တယ်လို့ ပအိုဝ်းလူငယ် အစည်းအရုံးက ထုတ်ပြန်ထားပါတယ်။
MK-014
