မဲခေါင်၊ ဇန်နဝါရီ ၂၂
ရုရှားသမ္မတပူတင်ရဲ့ လက်ကိုင်တုတ်တပ်လည်းဖြစ် ကမ္ဘာတစ်ဝန်း နာမည်ဆိုးနဲ့ ကျော်ကြားတဲ့ ပုဂ္ဂလိက စစ်တပ် လည်းဖြစ်တဲ့ ဝက်ဂနာအုပ်စု ဟာ ဆိုလီဒါမြို့ရှေ့တန်းစစ်မျက်နှာပြင်မှာ ကျဆုံးခဲ့တဲ့ ယူကရိန်းစစ်သည်အလောင်း တွေကို ယူကရိန်းဆီပြန်ပို့ပေးဖို့ အမိန့်ပေးခဲ့ပါတယ်။
ဝက်ဂနာအုပ်စု ထူထောင်သူယက်ဗ်ဂနီပရီဂိုဇင်နဲ့ ဆက်နွယ်တဲ့ မီဒီယာဝက်ဘ်ဆိုက် RIA FAN မှာ ဝက်ဂနာ တပ်မှူးတစ်ဦးက သူတို့သိမ်းပိုက်ထားနိုင်တဲ့ ဆိုလီဒါမြို့တိုက်ပွဲမှာ ရရှိတဲ့ ယူကရိန်းစစ်သားအလောင်းတွေနဲ့ ဖမ်းဆီးရမိသူတွေကို ယူကရိန်းဆီ ပြန်ပို့ပေးဖို့ အမိန့်ပေးတဲ့ ဗီဒီယိုဖိုင်ကို ဖော်ပြခဲ့ပါတယ်။
ဆိုလီဒါမြို့ဟာ ယူကရိန်းအရှေ့ပိုင်း ဒိုးနက်စ်ဒေသမှာ ရှိပြီး ရုရှားက သူတို့ဩဇာခံနယ်မြေအဖြစ် သိမ်းပိုက်ဖို့ ကြိုးစားနေတဲ့ လမ်းကြောင်းပေါ်က မြို့တစ်မြို့ဖြစ်ပါတယ်။ ဇန်နဝါရီ ၁၁ ရက်နေ့ကတည်းက ဆိုလီဒါမြို့ကို ရုရှား သိမ်းပိုက်နိုင်ခဲ့ပြီလို့ ဝက်ဂနာအုပ်စုက ကြေညာပေမယ့် ယူကရိန်းဘက်ကတော့ မကျသေးကြောင်း တုံ့ပြန်ထား တယ်။
အဲ့ဒီ့ အခြေအနေမှာ စစ်ရာဇဝတ်မှုများစွာ ကျူးလွန်ထားတယ်လို့ စွပ်စွဲခံနေရတဲ့ ဝက်ဂနာအုပ်စု တပ်မှူးက ယူကရိန်းစစ်သည်တွေရဲ့ ဂုဏ်သိက္ခာကိုငဲ့ပြီး စစ်ယာဉ်တန်း လေးတန်း သို့မဟုတ် ငါးတန်း (စုစုပေါင်း ယာဉ်အစီး ၂၀ နဲ့ ယူကရိန်းပိုင်နက်ထဲ ပြန်ပို့ပေးမယ်လို့ ပြောသွားခဲ့တာဖြစ်ပါတယ်။
ယူကရိန်း စစ်သည် အလောင်း အရေအတွက်ကို ထည့်သွင်းမပြောသွားပဲ ပရီဂိုဇင်ဟာ အရင်က ဝက်ဂနာအုပ်စုနဲ့ မပတ်သက်ကြောင်း လိမ်ညာငြင်းချက်ထုတ်ခဲ့ပေမယ့် စက်တင်ဘာလက သူဟာ ဝက်ဂနာအုပ်စုကို ထူထောင်သူဖြစ်ကြောင်း ဝန်ခံခဲ့ပြီး အမေရိကန်နဲ့အနောက်မဟာမိတ်တွေရဲ့ ပိတ်ဆို့ အရေးယူမှုတွေ ခံနေရသူဖြစ်ပါတယ်။
MKF-001
Ref: jpost
#MeKongNews
