မဲခေါင်၊ စက်တင်ဘာ ၂၉
ရှမ်းပြည်နယ် တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသ၊ ရွာငံမြို့နယ်၊ လယ်ကိုင်းကျေးရွာအုပ်စု၊ မျှားကလေးကျေးရွာက အမျိုးသား တစ်ဦးနဲ့ အမျိုးသမီး တစ်ဦးကို မှော်ဘုရင် စစ်ကြောင်းက ထိန်းသိမ်းခဲ့ ပြီးနောက် အခု နေအိမ်ကို ကောင်းမွန်စွာ ရောက်ရှိနေပြီလို့ မိသားစုဝင်တွေနဲ့ နီးစပ်သူတွေထံက သိရပါတယ်။
ကြီးခဲ့တဲ့ ဩဂုတ်လ ၂၃ ရက်နေ့မှာ မျှားကလေးကျေးရွာနေ စစ်ကောင်စီ သတင်းပေးဆိုသူနဲ့ သမက် တို့ကို ရှင်းလင်းစဉ် သမီးဖြစ်သူနဲ့ အိမ်နီးချင်း ဖြစ်သူတို့ကို တွေ့ရှိတဲ့ အတွက် လုံခြုံရေးအရ ဖမ်းဆီးခဲ့တာ ဖြစ်တယ်လို့ မှော်ဘုရင်စစ်ကြောင်း တာဝန်ရှိသူက ပြောပါတယ်။
လက်ရှိ ပြန်လွှတ်ပေးရာမှာ နေအိမ် အတွင်းက သိမ်းဆည်းခဲ့တဲ့ စာရွက်စာတန်းနဲ့ ငွေကြေးတွေကို ပြန်လည် ပေးအပ်ခဲ့တယ်လို့ မှော်ဘုရင်စစ်ကြောင်းက ဆိုပါတယ်။
”ထိန်းသိမ်းဖို့ ခေါ်ဆောင်လာတော့ ဘယ်သူဘယ်ဝါ ဆိုတာ အတိအကျ မသိတဲ့အတွက် ကြောက်တာပေါ့။ ဒါပေမယ့် ထိန်းသိမ်းခံရချိန် ဘယ်လို မေတ္တာထားပေးတယ် ဆိုတာ သိတယ်။ ဘယ်သူမှ အမုန်းတရား မရှိခဲ့ကြပါဘူး။ ပြန်လွတ်ပြီးတဲ့ အချိန်မှာ စကစ က သံသယနဲ့ စောင့်ကြည့်တာမျိုးရှိတယ်” လို့ ဖမ်းဆီးခံရသူရဲ့ မိသားစုဝင်တွေနဲ့ နီးစပ်သူက ပြောပါတယ်။
ဖမ်းဆီးခေါ်ဆောင်လာစဥ် လမ်းခရီး နှောင့်နှေးမှုတွေ ရှိသလို လုံခြုံရေးအရ နေရာ တစ်ခုမှာ ထိန်းသိမ်းရတာက အခက်အခဲတွေ ရှိတယ်လို့လည်း မှော်ဘုရင်စစ်ကြောင်း တာဝန်ရှိသူက ပြောပါတယ်။
“ကျနော်တို့က လက်မ မကောင်း လက်မ၊ ခြေမ မကောင်း ခြေမပါပဲ။ သူတို့ အဖေတွေ ဒလန် ဆိုပေမယ့် သူတို့မှာ အပြစ်ရှိမနေဘူးပေါ့။ အဲ့အတွက် ကျွန်တော်တို့က သူတို့ကို ပြည်သူ အနေနဲ့ပဲ ကောင်းကောင်းမွန် မွန် ဆက်ဆံတယ်။ သူတို့ကို တာဝန်ယူရတဲ့ အပိုင်းတွေမှာ မိန်းကလေး ဖြစ်နေတော့ ပိုဆိုးပါတယ်။ မိန်းကလေး အသုံးအဆောင် ပစ္စည်းကအစ ဖြည့်ဆည်းပေးရတာ ဆိုတော့လေ။ ရေချိုးဖို့က အစပေါ့” လို့ သူကရှင်းပြပါတယ်။
စစ်ကောင်စီ သတင်းပေးဒလန် ဆိုသူ ၂ ဦးက ဦးဆောင်ပြီး ပြည်သူတွေ ဒူးထောက် မေးမြန်း စစ်ဆေးတာ၊ ခြိမ်းခြောက်တာတွေ လုပ်နေလို့ ပြည်သူတွေရဲ့ တောင်းဆိုမူအရ ပြီးခဲ့တဲ့ ဩဂုတ်လ၂၃ ရက်၊ ညပိုင်းမှာ ရှင်းလင်းခဲ့တာ ဖြစ်တယ်လို့ မှော်ဘုရင်စစ်ကြောင်းက ပြောပါတယ်။
CJ -012
#MeKongNews
#မှော်ဘုရင်စစ်ကြောင်း
#လုံခြုံရေး
