မဲခေါင်၊ စက်တင်ဘာ ၅

ဒေါ်အောင်ဆန်းစုကြည်ဟာ ထောင်ထဲမှာ သွားဖုံးရောဂါကြောင့် ဘာမှ မစားမသောက်နိုင်သလို နေထိုင်မကောင်းဖြစ်နေပေမယ့် ပြင်ပသီးခြားကုသခွင့်တောင်းဆိုမှုကို စစ်ခေါင်းဆောင်တွေက လက်မခံခဲ့ကြောင်း ဗြိတိန် Independent သတင်းဌာနကြီးက ဖော်ပြသွားပါတယ်။

အသက် ၇၈ နှစ်ရှိပြီဖြစ်တဲ့ ဒေါ်အောင်ဆန်းစုကြည်ကို မတရားစွဲချက် ၁၉ ချက်နဲ့ ထောင်ဒဏ် ၃၃ နှစ်ချမှတ်ထားပြီး ၅ မှုကို လွတ်ငြိမ်းခွင့်လျော့ပေါ့ပေးခဲ့ပေမယ့် ၂၇ နှစ် ကျခံရဦးမှာဖြစ်သလို ထောင်တွင်းကနေ နေအိမ်အကျယ်ချုပ် ပြန်ထားတယ်ဆိုတဲ့သတင်းကိုလည်း စစ်ကောင်စီဘက်က အတည်မပြုတဲ့အတွက် ခုထိ အကျဉ်းထောင်ထဲမှာ ရှိနေသေးပုံရပါတယ်။

မိခင် သီးခြားဆေးကုသခွင့်အတွက် ထောင်အာဏာပိုင်တွေက ထောက်ခံချက်ပေးတဲ့ကြားက စစ်ခေါင်းဆောင်တွေက လက်မခံဘဲ ငြင်းနေတဲ့အတွက် ဗြိတိန်နိုင်ငံသားဖြစ်တဲ့ ဒေါ်အောင်ဆန်းစုကြည်ရဲ့ သားငယ် ကင်မ်အဲရစ် က “နေမကောင်းတဲ့လူတစ်ယောက် သီးခြားဆေးကုသဖို့ ထောက်ခံချက်ရတာတောင် ကုသခွင့်မပေးခြင်းက အင်မတန်ယုတ်မာတာ၊ ရက်စက်တာမျိုးပဲ။ အမေ့အကြောင်း ကျွန်တော်အကောင်းဆုံးသိတာပေါ့။ နေမကောင်ရင် မူးဝေ၊ အော့အန်တာတွေ အမြဲလိုဖြစ်တတ်တယ်။ ဒါကြောင့် ချက်ချင်း ဂရုစိုက်ကုသဖို့ထောင်က ထောက်ခံပေမယ့် သူတို့က ငြင်းဆိုလိုက်တယ်။ အမေ ဒီလို ကုသမှုမခံရရင် အန္တရာယ်ရှိတယ်။ စိုးရိမ်ရတယ်။ မြန်မာ စစ်ခေါင်းဆောင်တွေကို တောင်းဆိုချင်တာက အမေ့ကို ရန်ကုန်က သူ့အိမ်မှာ ပြန်ထားပြီး လူသားတစ်ယောက်အပေါ် လူလို ဆက်ဆံတဲ့နည်းနဲ့ ဆက်ဆံကြစေဖို့ပါ” လို့ စိုးရိမ်တကြီးပြောကြားသွားပါတယ်။

ဒေါ်အောင်ဆန်းစုကြည် စီရင်ခံထားရတဲ့အမှုတွေအတွက် အယူခံဝင်ဖို့ ရှေ့နေအဖွဲ့တွေက ကြိုးစားနေပေမယ့် ပြီးခဲ့တဲ့ ဒီဇင်ဘာလကတည်းကစပြီး စစ်ကောင်စီက ဘယ်သူနဲ့မှ တွေ့ဆုံခွင့်မပေးခဲ့လို့ မတွေ့ရတော့တာဖြစ်ပါတယ်။

Ref: independent.co.uk
MKF-001

#MeKongNews

#ဒေါ်အောင်ဆန်းစုကြည်

#နေမကောင်း

#စစ်ကောင်စီ

#သီးခြားကုခွင့်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)