မန္တလေး၊ ဩဂုတ် ၂၉
စစ်ကောင်စီတပ် ထိပ်တန်း ခေါင်းဆောင်တွေသာမက လက်အောက်ခံ ဝန်ထမ်း အများစုဟာ နတ်အပါအ၀င် ဓာတ်ရိုက်ဓာတ်ဆင်၊ ဗေဒင်ယတြာတွေ မျိုးစုံ အသုံးပြုပြီး အသက်အန္တာရာယ်ကင်းဖို့ ကြိုးစားလာတယ်လို့ စစ်ကောင်စီဝင်တွေနဲ့ နီးစပ်သူတွေက ပြောပါတယ်။
ကချင်၊ ကရင်၊ ကရင်နီ၊ ချင်း၊ စစ်ကိုင်း၊ မကွေး စတဲ့ တိုက်ပွဲ ဖြစ်ပွားရာ ဒေသတွေမှာ တာဝန်ကျနေတဲ့ စစ်တပ် ထိပ်တန်း ခေါင်းဆောင်တွေ သာမက ရဲနဲ့ စစ်သား အပါအဝင် အရပ်ဘက် ဝန်ထမ်းတွေရဲ့ မိသားစုဝင်တွေပါ အခုလို လုပ်ဆောင်လာတာ ဖြစ်တယ်လို့ ဆိုပါတယ်။
“အန္တရာယ်ကင်းတဲ့ နေရာရောက်ဖို့ ဓာတ်ပုံတွေ ပြောင်းချိတ်လိုချိတ်၊ မပြောင်းရမှာ စိုးလို့ တစ်အိမ်လုံး ပြောင်းဖူး မစားတော့တာတို့ အများကြီးပဲ။ ဗေဒင်ဆရာက ခိုင်းရင် လုပ်လိုက်၊ နတ်က ခိုင်းရင် လုပ်လိုက်နဲ့ သူတို့ခမျာ တစ်ရက်မှ မနားရဘူးလို့ မန္တလေးမြို့က စစ်ကောင်စီဝင် အရာရှိတွေနဲ့ နီးစပ်တဲ့ လုပ်ငန်းရှင် တစ်ဦးက ပြောပါတယ်။
လက်ရှိ တိုင်းရင်းသား ဒေသတွေနဲ့ စစ်ကိုင်း၊ မကွေးတိုင်း တို့လို တော်လှန်ရေး အားကောင်းတဲ့ ဒေသတွေမှာ စစ်ကောင်စီ အရာရှိတွေ သေဆုံး ထိခိုက်မှု များပြားလာတာကြောင့် အဲ့ဒီ ဒေသတွေမှာ တာဝန်ကျနေသူတွေရဲ့ မိသားစုတွေက စိုးရိမ်ထိတ်လန့်မှုတွေ ရှိနေကြတဲ့အတွက် အခုလို အန္တရာယ်ကင်းဖို့ နည်းလမ်းပေါင်းစုံ သုံးစွဲလာတာလို့ စစ်ကောင်စီ အသိုင်းအ၀ိုင်းနဲ့ နီးစပ်သူတွေက ဆိုပါတယ်။
လက်ရှိ ကျင်းပနေတဲ့ မတ္တရာမြို့နယ်က တောင်ပြုန်းနတ်ပွဲမှာလည်း နေ့စဥ် စစ်ကောင်စီရဲ့ အရေးကြီး ပုဂ္ဂိုလ် ခရီးစဥ်တွေ ရှိနေတာကြောင့် စစ်တပ်နဲ့ ပျူစောထီး ရာနဲ့ချီပြီး လုံခြုံရေး ယူပေးနေရတယ်လို့ တောင်ပြုန်းနယ်က စစ်ကောင်စီတပ်တွေနဲ့ နီးစပ်သူ တစ်ဦးက ပြောပါတယ်။
အလားတူ မန္တလေးမြို့နဲ့ အနီးတ၀ိုက်က နာမည်ကြီး ဗေဒင်ဆရာတွေနဲ့ ကျောက်ဆည်မြို့နယ်က ရွှေသိမ်တော် ဘုရားမှာလည်း စစ်ကောင်စီဝင်တွေရဲ့ မိသားစုတွေနဲ့ နေ့စဥ် စည်ကားနေတာ တွေ့ရတယ်လို့ ဒေသခံတွေက ပြောပါတယ်။
ခေတ်အဆက်ဆက် စစ်ကောင်စီ အရာရှိတွေဟာ ဗေဒင် ယတြာတွေကို ယုံကြည် အားကိုးလေ့ရှိပြီး နေပြည်တော်မှာ စစ်ခေါင်းဆောင် မင်းအောင်လှိုင် တည်တဲ့ ဘုရားဟာလည်း ၉ ဂဏန်းကို အခြေပြုထားတယ်လို့ လေ့လာစမ်းစစ်သူတွေက သုံးသပ်ထားပါတယ်။
ပြီးခဲ့တဲ့ နှစ်တွေက စစ်တပ် ထိပ်ပိုင်း ခေါင်းဆောင်တွေ ယတြာချေထားတဲ့ မတင့်တယ်တဲ့ ရုပ်ပွားတော်ပုံများစွာ လူမှုကွန်ရက်မှာ ပျံ့နှံ့ခဲ့သလို့ လက်ရှိ KNLA ပူးပေါင်းတပ်တွေ သိမ်းပိုက်ထားတဲ့ မြ၀တီမြို့အနီးရှိ လက်ခတ်တောင်ပေါ်မှာလည်း ယတြာချေထားတယ်လို့ ယူဆရတဲ့ ထူးဆန်းတဲ့ ရုပ်ထုများ တွေ့ရှိခဲ့တယ်လို့ ကော်ပရာစစ်ကြောင်း တာ၀န်ရှိသူတွေက ပြောဆိုထားပါတယ်။
CJ-009
#MeKongNews
#ရွှေသိမ်တော်ဘုရား
#မန္တလေးမြို့
#ဗေဒင်ယတြာ
