မဲခေါင်၊ ဇူလိုင် ၇
ရှမ်းပြည်နယ် အရှေ့ပိုင်း၊ တာချီလိတ်မြို့မှာ ဇူလိုင်လ ၆ ရက်၊ နေ့လယ်ပိုင်းက နာမည်ကြီး KTV ၆ ခုကို ပူးပေါင်းအဖွဲ့က ဝင်ရောက် စစ်ဆေးပြီး သတ်မှတ်စည်းကမ်းချက်များ မလိုက်နာလို့ဆိုကာ KTV ၅ ခုကို ယာယီ ပိတ်ခိုင်းလိုက်တယ်လို့ ဒေသခံ တစ်ဦးက ပြောပါတယ်။
ဝင်ရောက် စစ်ဆေးတဲ့ KTV ၆ ဆိုင်အနက် ဝိန်းကျောက် ရပ်ကွက်ရှိ ရွှေဘူးသီး KTV၊ ကြီးမြတ်သောရွှေမြင်း PUB၊ ကိုးထပ် KTV၊ ဟိုတယ်တာချီလိတ်ရှိ DAT Bar & KTV နဲ့ ခမရ (၃၃၁) တပ်အနီးရှိ Harry Potter KTV စတဲ့ KTV ၅ ဆိုင်ကို ယာယီ ပိတ်ခိုင်းထားတာ ဖြစ်ပါတယ်။
“အားလုံး ဆိုင် ၆ ဆိုင်ကို ပူးပေါင်းအဖွဲ့တွေ ဝင်ပြီးစစ်တာ။ ဆိုင် ၅ ဆိုင်ကတော့ လိုအပ်ချက်တွေ မပြည့်စုံလို့ ခဏ ပိတ်ခိုင်းထားတဲ့ သဘောပါပဲ။ ကျန်တဲ့ KTV တစ်ဆိုင်ကိုတော့ လိုက်နာရန် လိုအပ်ချက်များ ရှိနေလို့ သတိပေးသွားတယ်။ စာရွက်စာတန်း ပြည့်စုံရင်တော့ ပြန်ဖွင့်ခွင့်ရမှာပါ” လို့ ရဲအရာရှိ တစ်ဦးက ပြောပါတယ်။
အဆိုပါ KTV တွေ သတ်မှတ် စည်းကမ်းချက်များ လိုက်နာမှသာ ပြန်လည်ဖွင့်လှစ်ခွင့် ရရှိမှာဖြစ်ပြီး 1G1 KTV ကိုတော့ လိုက်နာမှု အားနည်းတယ်လို့ သတိပေးကာ ဆက်လက်ဖွင့်ခွင့် ပေးခဲ့တယ်လို့ သိရပါတယ်။
စစ်ကောင်စီဟာ တစ်နိုင်ငံလုံး အတိုင်းအတာနဲ့ အရက်ဘီယာ ရောင်းချရာမှာ ယစ်မျိုးလိုင်စင် ရှိ၊ မရှိနဲ့ KTV၊ Night Club Bar နဲ့ Unplugged စားသောက်ဆိုင်များ သတ်မှတ် စည်းကမ်း လိုက်နာမှု ရှိမရှိ စစ်ဆေးနေတယ်လို့ စစ်ဆေးရေးအဖွဲ့မှာ ပါဝင်သူ တစ်ဦးက ပြောပါတယ်။
MK-005
#MekongNews
#တာချီလိတ်
#KTV
#ယစ်မျိုးလိုင်စင်
