မဲခေါင်၊ ဇွန် ၂၁
မြန်မာနိုင်ငံတွင်းက ဒေသအခြေပြု သတင်းမီဒီယာ ၉ ဖွဲ့စုပေါင်းပြီး Burma Media Consortium – BMC ကို အခုနှစ် ဇွန်လ ၁၃ ရက်မှာ ဖွဲ့စည်းတည်ထောင်လိုက်တယ်လို့ ဒီနေ့ ဇွန်လ ၂၁ ရက်နေ့မှာ BMC က ထုတ်ပြန်ပါတယ်။
စစ်တပ်အာဏာသိမ်းပြီးနောက်ပိုင်း သတင်းမီဒီယာနဲ့ သတင်းထောက်တွေကို စစ်တပ်က ပြင်းထန်စွာ ဖိနှိပ်နေပြီး ဒေသအခြေစိုက် သတင်းဌာနတွေရဲ့ ရေရှည်ရပ်တည်နိုင်စွမ်းနဲ့ ဖွံ့ဖြိုးတိုးတက်ရေးတွေက ခြိမ်းခြောက်ခံနေရတယ်လို့ BMC က ဆိုပါတယ်။
အဲဒီ အခြေအနေတွေကို စုပေါင်းဖြေရှင်းနိုင်ဖို့အတွက် ဒေသတွင်း အခြေစိုက်မှု၊ သတင်းထုတ်လုပ်မှု၊ သတင်းစာပညာအပေါ် ရပ်တည်ခံယူမှုနဲ့ သတင်းဌာနလုပ်နိုင်စွမ်း စတာတွေ တူညီမှုရှိတဲ့ သတင်းဌာနတွေပေါင်းပြီး BMC ကိုတည်ထောင်တယ်လို့ သိရပါတယ်။
“စစ်တပ်အာဏာသိမ်းခဲ့တဲ့နောက်ပိုင်း မြန်မာနိုင်ငံမှာ အဆိုးရွားဆုံး မီဒီယာဖိနှိပ်မှုတွေ ဖြစ်ပေါ်ခဲ့တယ်။ စစ်ကောင်စီရဲ့ မီဒီယာသမားတွေအပေါ် အကြမ်းဖက်မှုနဲ့ ဖိနှိပ်မှုတွေကြောင့် ကျွန်တော်တို့သတင်းဌာနတွေမှာ မလုံခြုံမှု၊ ခြိမ်းခြောက်မှု၊ အနာဂါတ်မရေရာမှုတွေနဲ့ အခက်အခဲပေါင်းစုံ ကြုံတွေ့နေရပါတယ်။ ဒီအခက်အခဲတွေကို အတူတကွစုပေါင်းရင်ဆိုင်ကျော်လွှားနိုင်ဖို့အတွက် ပြည်နယ်နဲ့တိုင်းအခြေပြု သတင်းဌာန ၉ ခု ပူးပေါင်းပြီး BMC အဖွဲ့ကို ဖွဲ့စည်းခဲ့တာ ဖြစ်ပါတယ်”ဟု BMC အဖွဲ့ဥက္ကဋ္ဌ ကိုဉာဏ်လင်းထက်က ဆိုပါတယ်။
စစ်တပ်ရဲ့ ပြင်းထန်တဲ့ဖိနှိပ်မှုကြောင့် ဒေသတွင်းသတင်းတွေကို ရယူခြင်း၊ သတင်းအချက်အလက် စိစစ်ခြင်း၊ သတင်းထုတ်လုပ်ခြင်းတွေအပြင် သတင်းထောက်တွေရဲ့ အရည်အသွေး၊ သတင်းအရည်အသွေးနဲ့ သတင်းထုတ်လုပ်မှုအရည်အသွေးတွေ တိုးတက်အောင် လုပ်ဆောင်ရာမှာ အခက်အခဲနဲ့ စိန်ခေါ်မှုတွေရှိနေတယ်လို့လည်း ကိုဉာဏ်လင်းထက်က ဆက်ပြောပါတယ်။
BMC အနေနဲ့ မြန်မာနိုင်ငံမှာ သတင်းအချက်အလက် လွတ်လပ်စွာ ရယူခွင့်နဲ့ လွတ်လပ်စွာ ထုတ်ဖော်ပြောဆိုခွင့်တွေကို အာမခံထားတဲ့ စစ်မှန်တဲ့ ဖက်ဒရယ်ဒီမိုကရေစီထွန်းကားဖို့ကို ပန်းတိုင်အနေနဲ့သတ်မှတ်ထားတယ်လို့သိရပါတယ်။
ဒါ့အပြင် သီးခြားလွတ်လပ်ပြီး ဘက်မလိုက်တဲ့ သတင်းအချက်အလက်တွေကို ဆန်းသစ်တီထွင်ပြီး အချိန်နဲ့တပြေးညီတင်ဆက်နိုင်ဖို့၊ ကိုယ်စားပြုတဲ့ ဒေသခံတိုင်းရင်းသားတွေရဲ့ ဓလေ့ထုံးထမ်း၊ ယဉ်ကျေးမှု၊ ကိုးကွယ်မှုနဲ့စာပေတွေကို ထိန်းသိမ်းမြှင့်တင်ဖို့နဲ့ လူ့အခွင့်အရေးစံချိန်စံနှုန်းတွေ ခိုင်မာအားကောင်လာအောင် အရေးဆိုမှုတွေ ထိရောက်စွာလုပ်ဆောင်ရာမှာ သတင်းထောက်နဲ့ သတင်းရဲ့စွမ်းဆောင်ရည်မြှင့်တင်ဖို့ရည်ရွယ်တယ်လို့ BMC က ထုတ်ပြန်ချက်မှာ ဖော်ပြထားပါတယ်။
BMC မှာ ကချင်အခြေစိုက် The 74 Media၊ ရှမ်းမြောက်ပိုင်း အခြေစိုက် Shwe Phee Myay သတင်းအေဂျင်စီ၊ ရှမ်းအရှေ့ပိုင်းနှင့် တောင်ပိုင်းအခြေစိုက် မဲခေါင်သတင်းဌာန၊ ချင်းအခြေစိုက် Zalen သတင်းဌာန၊ မန္တလေးတိုင်းနှင့် စစ်ကိုင်းတိုင်းအခြေစိုက် Mandalay Free Press သတင်းဌာန၊ မြန်မာပြည်အလယ်ပိုင်း မြေလတ်ဒေသအခြေစိုက် Myaelatt Athan သတင်းဌာန၊ ရခိုင်အခြေစိုက် Western News၊ ဧရာဝတီတိုင်းအခြေစိုက် Ayeyawaddy Times သတင်းဌာနနှင့် တနင်္သာရီတိုင်း အခြေစိုက် Tanintharyi Times သတင်းဌာနတို့ပါဝင်တယ်လို့ သိရပါတယ်။
MK – 009
#MeKongNews
#BMC
#လွတ်လပ်စွာထုတ်ဖော်ပြောဆိုခွင့်
#သတင်းလွတ်လပ်ခွင့်
