မဲခေါင်၊ မတ် ၁၁
အာဏာသိမ်းပြီးနောက် ဂျပန်ထွက်ဖို့ ကြိုးစားနေတဲ့ လူငယ် မြန်မာ လုပ်သား အရေအတွက်က ဂျပန် အစိုးရ ခေါ်ယူမှုထက် အဆမတန် များပြားနေတယ်လို့ ပြည်ပ အလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ်ရဲ့ စာရင်းတွေအရ သိရပါတယ်။
စစ်အာဏာသိမ်းပြီးနောက် အလုပ်အကိုင် ရှားပါး လာတာကြောင့် ပြည်ပနိုင်ငံတွေကို သွားရောက် လုပ်ကိုင်တဲ့ မြန်မာလုပ်သား ပိုများလာပြီး စစ်အာဏာသိမ်းပြီး ပထမနှစ်ဝက်မှာ နိုင်ငံအတွင်း အလုပ်လက်မဲ့ ၁ ဒသမ ၈ သန်းကျော် ရှိလာသလို အလုပ် အကိုင်ရရှိဖို့ ပိုခက်လာတယ်လို့ အလုပ်သမား အဖွဲ့အစည်းတွေနဲ့ မြန်မာ့ စီးပွားရေး လေ့လာ သုံးသပ်သူတွေက ပြောပါတယ်။
“အခေါ်များတာကတော့ သူတို့ ဂျပန်ဘက်ခြမ်းမှာ လိုအပ်ချက်ရှိတယ်ဆိုတဲ့ အလျောက်ပေါ့။ သက်ကြီး ရွယ်အို စောင့်ရှောက်ရေး၊ သူနာပြုကိုလည်း ပြန်ခွဲထားတာတွေ ရှိတာဆိုတော့ အဲလိုမျိုးတွေလည်း အခေါ်များတယ်။ တခြား အလုပ်သင်နဲ့ဆိုင်တဲ့ အမျိုးအစားကတော့ တော်တော်များများ ရှိပါတယ်” လို့ အလုပ်အကိုင် ရှာဖွေရေး အေဂျင်စီ တာဝန်ရှိသူ တစ်ဦးက ပြောပါတယ်။
ဂျပန်ကုမ္ပဏီ၊ စက်ရုံတွေက မြန်မာ အလုပ်သမား ၇၀၀ ကျော် ခေါ်ယူမယ့် အလုပ်ကမ်းလှမ်းစာ ၂၃၀ စောင် ရရှိထားတယ်လို့ တိုကျိုမြို့ အခြေစိုက် မြန်မာသံရုံးက မတ်လ ၃ ရက် က ထုတ်ပြန်ထားသလို ၂၀၂၂ ခုနစ် အတွင်း ဂျပန်ကို အလုပ်လုပ်ဖို့ ထွက်ခွာသူ ၁၀,၀၀၀ နီးပါးအထိ ရှိလာပြီလို့ ကုမ္ပဏီတွေက ဆိုပါတယ်။
ဂျပန်နိုင်ငံကို ၂၀၂၀ ခုနှစ် နိုဝင်ဘာမှ ၂၀၂၁ ခုနှစ် ဖေဖော်ဝါရီလ အထိ လုပ်သား ၃,၀၀၀ ခန့်သာ စေလွှတ်နိုင်ခဲ့ ပေမယ့် အခု ၂၀၂၂ ခုနှစ် မတ်လကစပြီး နိုဝင်ဘာလ ၂၂ ရက်နေ့အထိ အေဂျင်စီ ၁၀၅ ခုကနေ လုပ်သား ၉,၀၀၀ ကျော် စေလွှတ်နိုင်ခဲ့တယ်လို့ ပြည်ပ အလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ်ရဲ့ စာရင်းတွေမှာ ဖော်ပြထားပါတယ်။
“ဂျပန်ကို အလုပ်လုပ်မယ်လို့ ဆုံးဖြတ်ချက်ချပြီး ကတည်းက သင်တန်းတွေ စုံစမ်းပြီး တက်ခဲ့တယ်။ JLPT စာမေးပွဲတွေ ကိုလည်း အခက်ခဲကြားက ဖြေဆိုခဲ့ရတယ်။ အဲဒီအတွက်လည်း အချိန်တော်တော်ကြာကြာ ယူပြီး လေ့လာခဲ့ရတယ်။ ငွေကြေးတွေလည်း တော်တော်ကုန်ခဲ့ပြီး နောက်ဆုံး ပြည်တွင်းမှာ လုပ်ကိုင်ဖို့ ဘယ်လိုမှ မဖြစ်နိုင်တော့လို့ လက်ရှိ လုပ်ကိုင်နေတဲ့ အလုပ်ကနေ ရပ်နားပြီး ပြည်ပထွက်ဖို့ ကြိုးစားခဲ့တာတွေရှိတယ်” လို့ ဂျပန် သွားရောက်မယ့် အမျိုးသမီး တစ်ဦးက ပြောပါတယ်။
ဂျပန်စာ သင်သူ အများစုက အသက် ၂၀ နဲ့ ၂၅ နှစ်ကြား လူငယ်တွေဖြစ်ပြီး အခုနောက်ပိုင်းမှာတော့ ဂျပန် နိုင်ငံကို အလုပ်သင်ဗီဇာ၊ ကျွမ်းကျင်လုပ်သား ဗီဇာတွေ သာမက ကျောင်းသား ဗီဇာနဲ့ပါ သွားရောက်လိုတဲ့ လူငယ်တွေ ပိုများလာတယ်လို့ အလုပ်အကိုင် ရှာဖွေရေး အေဂျင်စီ တာဝန်ရှိသူတွေက ပြောပါတယ်။
လက်ရှိ မြန်မာနိုင်ငံကနေ ထိုင်းနိုင်ငံသို့ သွားရောက် လုပ်ကိုင်မှု အများဆုံးဖြစ်ကာ ဒုတိယ အများဆုံး အဖြစ် မလေးရှားနိုင်ငံက နေရာယူထားပြီး တတိယ ကတော့ ဂျပန်နိုင်ငံ ဖြစ်တယ်လို့ အလုပ်အကိုင် အေဂျင်စီတွေထံက သိရပါတယ်။
MK-010
