မဲခေါင်၊ မတ် ၁၁
ဒီကနေ့ ကျရောက်တဲ့ မြန်မာ အမျိုးသား ဒီမိုကရက်တစ် မဟာမိတ် တပ်မတော်-MNDAA ဖွဲ့စည်း တည်ထောင်မှု (၃၄) နှစ်ပြည့်နေ့ကို ဂုဏ်ပြုတဲ့ အနေနဲ့ မဟာမိတ် တပ်ဖွဲ့တွေ ဖြစ်တဲ့ တအာင်း အမျိုးသား လွတ်မြောက်ရေး တပ်မတော်-TNLA နဲ့ ရခိုင်အမျိုးသား အဖွဲ့ချုပ်-ULA/AA တို့က သဝဏ်လွှာ ပေးပို့လိုက်တယ်လို့ သိရပါတယ်။
ကိုးကန့် အမျိုးသား ခေါင်းဆောင် ဦးဖုန်ကြားရှင် ဦးဆောင်ပြီး ၁၉၈၉ ခုနှစ်၊ မတ်လ ၁၁ ရက်က စတင် တည်ထောင်ခဲ့တဲ့ MNDAA တပ်မတော်ဟာ မြန်မာနိုင်ငံရဲ့ ပထမဆုံးသော အထူးဒေသ (၁) ဖြစ်လာပြီး ‘ဝ’ UWSP/UWSA နဲ့ ‘မိုင်းလား’ PSC/NDAA တို့လို တိုးတက်တဲ့ အဖွဲ့အစည်း အဖြစ် နှစ် ၂၀ ကျော် ရပ်တည်နိုင်ခဲ့တယ်လို့ ဆိုပါတယ်။
ဒါပေမဲ့ ၂၀၀၉ ခုနှစ်မှာ မြန်မာစစ်တပ်က နယ်ခြားစောင့်တပ်အဖြစ် ပြောင်းလဲဖို့ ဖိအားပေးတာကို လက်မခံလို့ ရမယ်ရှာ တိုက်ခိုက် ခံခဲ့ရပြီး မိမိတို့ လူမျိုးချင်း မတိုက်ခိုက်လိုသလို ပြည်သူတွေကိုလည်း စစ်ဘေး ခံစားရမှာ စိုးလို့ အထူးဒေသကို စွန့်ခွာလာခဲ့တာ ၁၄ နှစ်ရှိပြီလို့ ဖော်ပြထားပါတယ်။
MNDAA ဟာ ငြိမ်းချမ်းရေး၊ အမျိုးသား တန်းတူရေး၊ ကိုင်ပိုင် ပြဌာန်းခွင့်ရရေး၊ ဖိနှိပ်ခံ တိုင်းရင်းသား အားလုံး စစ်အာဏာရှင် လက်အောက်က လွတ်မြောက်ရေး၊ စစ်မှန်တဲ့ ဖက်ဒရယ် ပြည်ထောင်စု တည်ဆောက်ရေး စတဲ့ ရည်ရွယ်ချက်ကောင်းတွေ စွဲကိုင်ထားတဲ့ အဖွဲ့အစည်းဖြစ်ပြီး အဆိုပါ ရည်မှန်းချက်တွေ အမြန်ဆုံး အကောင်အထည် ဖော်နိုင်ပါစေလို့ သဝဏ်လွှာမှာ ဆုတောင်းပေးထားပါတယ်။
ဒါ့အပြင် လက်ရှိ MNTJP/MNDAA ကို ဦးဆောင်နေတဲ့ ဦးဖုန်တာရွင် နဲ့အတူ မိမိတို့ မဟာမိတ်တပ်ဖွဲ့တွေက ဆုံးရှုံးခဲ့ရတဲ့ မူလ ကိုးကန့်နယ်မြေ ပြန်လည်ရရှိရေး၊ နွေဦးတော်လှန်ရေးကနေ ပေါက်ဖွားလာတဲ့ တော်လှန်ရေးအဖွဲ့တွေ အတူ လက်တွဲကာ စစ်အာဏာရှင်ကို တိုက်ထုတ်သွားမယ်လို့ (၃၄) နှစ်မြောက် မြန်မာအမျိုးသား ဒီမိုကရက်တစ် မဟာမိတ် တပ်မတော်နေ့ကို ဂုဏ်ပြုပေးပို့တဲ့ သဝဏ်လွှာမှာ ဖော်ပြထားပါတယ်။
MK-007
