မဲခေါင်၊ ဖေဖော်ဝါရီ ၂၅
မန္တလေးတိုင်း၊ မတ္တရာမြို့နယ်ထဲ တပ်လာစွဲတဲ့ စစ်ကောင်စီတပ်နဲ့ ဒေသခံ ကာကွယ်ရေးတပ်တွေ ၃ ရက် ဆက်တိုက် တိုက်ပွဲဖြစ်ပွားရာ စစ်သား ၃ ဦး သေဆုံးတယ်လို့ Unicorn ပြောက်ကျားတပ်ဖွဲ့တာဝန်ခံက ပြောပါတယ်။
မတ္တရာမြို့နယ်၊ ပိုဝတောင်ရွာမှာ အင်အား ၄၀ လောက်နဲ့ တပ်လာစွဲတာကို ကာကွယ်ရေးတပ်တွေက လက်နက်ကြီး၊ လက်နက်ငယ် အပါအဝင် ဒရုန်း အသုံးပြုပြီး ဗုံးသီး အလုံး ၂၀ ခန့်နဲ့ တိုက်ခိုက်ခဲ့ရာ စစ်အုပ်စုဘက်ကလည်း လက်နက်ကြီးတွေနဲ့ ပြန်လည်တိုက်ခိုက်ခဲ့တယ်လို့ Unicorn ပြောက်ကျားတပ်ဖွဲ့ တာဝန်ခံက ပြောပါတယ်။
စစ်တပ်က ဖေဖေါ်ဝါရီ ၂၀ ရက်နေ့ ညနေကတည်းက ပိုဝတောင်ကို ဝင်လာတာဖြစ်ပြီး ဒေသခံ ကာကွယ်ရေးတပ် ပူးပေါင်းအဖွဲ့နဲ့ ၂၁ ရက် မနက်ပိုင်း ကတည်းက စတင်တိုက်ခိုက်တာဖြစ်ကာ ၂၂ ရက်နေ့မှာ စစ်သား ၃ ဦး သေဆုံးတာလို့ သိရပါတယ်။
“ဒေသခံများ ပြောကြားချက်အရ နာရေးကားနဲ့ ၃ ကောင် လာသယ်သွားသည်ဟု သိရပြီး အမှန်တကယ် သေဆုံးခြင်းရှိမရှိကို အတည်မပြုနိုင်သေးပေ” လို့ Unicorn ပြောက်ကျားတပ်ဖွဲ့ တာဝန်ခံက ပြောပါတယ်။
ဖေဖော်ဝါရီ ၂၃ ရက် မနက်ပိုင်း အစောကြီးမှာတော့ စစ်တပ်က ပိုဝတောင်ရွာကနေ သဖန်းဒေါင့်ရွာဘက်ကို ဆက်ထွက်သွားတယ်လို့ Unicorn ပြောက်ကျား တပ်ဖွဲ့တာဝန်ခံက ဆိုပါတယ်။
တိုက်ပွဲအတွင်း စစ်ကောင်စီဘက်က ထိခိုက်သေဆုံးမှု အခြေအနေတွေကိုတော့ မဲခေါင်သတင်း အနေနဲ့ သီးခြား အတည်မပြုနိုင်သေးပါဘူး။
အပြန်အလှန် တိုက်ခိုက်နေချိန်အတွင်း ပိုဝတောင်ရွာက နေအိမ် ၂လုံး၊ ဆိုင်ကယ်တစီး ပျက်စီးခဲ့ပြီး နွား ၂ ကောင် ထိခိုက်ခဲ့တယ်လို့ သိရပါတယ်။
တိုက်ခိုက်မှုအပြီး နယ်မြေရှင်းလင်းစဉ်မှာတော့ စစ်တပ်က အသုံးပြုတဲ့ ၅ ဒသမ ၅၆ ကျည် ၁၂ တောင့်၊ ၉ မမ ကျည် ၂ တောင့် သိမ်းဆည်းနိုင်ခဲ့တယ်လို့လည်း တာဝန်ခံက ဆက်ပြောပါတယ်။
ဒီတိုက်ခိုက်မှုကို ကောင်းကင်တော်လှန်ရေး အင်အားစု၊ ADRF၊ ABRF၊ မိုးကြိုးပြောက်ကျားနဲ့ Unicorn Guerrilla Force တို့ ပူးပေါင်း တိုက်ခိုက်ခဲ့တာ ဖြစ်ပါတယ်။
ပြီးခဲ့တဲ့ ဖေဖော်ဝါရီလ ၁၇ ရက်က စစ်တပ်နဲ့ပေါင်းနေတဲ့ မတ္တရာမြို့ပေါ်က ရွှေပြည်အညာ KTV လုပ်ငန်း ရပ်နားဖို့ ပြောက်ကျားတပ်တွေက အသံဗုံးသီးကြဲကာ သတိပေး တိုက်ခိုက်ခဲ့ပါသေးတယ်။
MK-003
