မဲခေါင်၊ ဖေဖော်ဝါရီ ၂၃

ရန်ကုန်တိုင်း၊ တာမွေမြို့နယ်၊ ဌေးကြွယ်ရပ်ကွက်၊ ဇဋိလလမ်းနဲ့ ဇောတိကလမ်းမှာ စစ်ကောင်စီတပ်များ ရောက်ရှိလာပြီး လူရိပ်တွေ့တယ် ဆိုပြီးတော့ လမ်းနှစ်ဖက် ပိတ်ဆို့ရှာဖွေကာ လူငယ်တစ်ဦးကို ဖမ်းဆီးသွားတယ်လို့ ဒေသခံတွေက မဲခေါင်သတင်းကို ပြောပါတယ်။

ဖေဖော်ဝါရီ ၂၂ ရက်၊ ည ၉ နာရီကျော်က စစ်ကောင်စီတပ်များ ရောက်ရှိလာပြီး တိုက် ၄၂ ရှေ့မှာ ရပ်တန့်ကာ အရပ်ဝတ်နဲ့ လူအချို့က လိုက်လံရှာဖွေမှုတွေ ပြုလုပ်ခဲ့ပေမယ့် ဖမ်းဆီးမှု မရှိဘဲ ပြန်ထွက်သွားခဲ့တယ်လို့ မျက်မြင်တွေ့သူ တစ်ဦးက ပြောပါတယ်။

“ပထမ လာတာက မီးတန်းမပါတဲ့ စစ်ကား ၂ စီး အရင်ရောက်လာတယ်။ ပြီးတော့ အရပ်ဝတ်နဲ့ကောင်တွေက တိုက်ကို ဆင်းကြည့်ပြီးမှ ကားပေါ် တက်သွားတာ။ နောက်ပြီးတော့မှ နောက်ထပ် ရဲကား တစ်စီးနဲ့ စစ်ကား ၂ စီး ထပ်ပြီး ရောက်လာတယ်။ သူတို့နဲ့အတူ ရပ်ကွက် ဒလန်အချို့လည်း ပါတယ်။ ပထမ တစ်ခေါက် ဝင်ရှာနေတုန်းက လူမမိသွားဘူး” လို့ သူကပြောပါတယ်။

စစ်ကောင်စီက ဇဋိလလမ်းနဲ့ ဇောတိကလမ်းမှာ ည ၁၀ နာရီကျော်အချိန် နောက်ဖေးလမ်းကြားများပါ ရှာဖွေ ပိတ်ဆို့ခဲ့သလို အင်အား အများအပြားနဲ့ ကားတွေကို စစ်ဆေးခဲ့ပြီး မီးပျက်သွားတဲ့အတွက် စစ်ဆေးမှုတွေရပ်ပြီး လူငယ်တစ်ဦးကို ဖမ်းဆီးကာ ရပ်ကွက်အတွင်းမှ ပြန်ထွက်သွားကြတယ်လို့ ဒေသခံတွေက ပြောပါတယ်။

ဒီလူငယ်ကို ဘာကြောင့် ဖမ်းဆီးသွားတယ် ဆိုတာကိုတော့ မသိရသေးပါဘူး။

ပုံ-ပုံဟောင်း

MK-005

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)