မဲခေါင်၊ ဖေဖော်ဝါရီ ၂၃
ငါးကန်မှာ ပူဇော်ထားတဲ့ နတ်စင်ကို သိမ်းလိုက်တယ်ဆိုတဲ့အကြောင်းပြချက်နဲ့ နှစ်ခြင်းခရစ်ယာန်ဓမ္မဆရာကို နှင်ထုတ်လိုက်တာကြောင့် ရှမ်းပြည်အရှေ့ပိုင်း၊ မိုင်းခတ်မြို့နယ်ထဲက ဟွေမဲအာခါ(အောက်ရွာ)မှာ ဓမ္မဆရာမရှိတာ တစ်နှစ်ကျော်ပြီလို့ ဒေသခံတွေထံကနေ သိရပါတယ်။
ကျိုင်းတုံ – မိုင်းခတ်လမ်း၊ လွယ်မီးတောင်နားမှာရှိတဲ့ ဟွေမဲအာခါ(အောက်ရွာ)နားမှာ သဘာဝအတိုင်းဖြစ်နေတဲ့ ရေကန်တစ်ကန်ရှိပြီး ကျေးရွာသားတွေ နှစ်စဉ်ငါးမွေးလေ့ရှိကြောင်း၊ အဲဒီကန်နားမှာ နတ်ပူဇော်ထားတယ်လို့ယူဆရတဲ့ နတ်စင်ကို သိမ်းလိုက်တာကြောင့် နှစ်ခြင်းဓမ္မဆရာကို မိုင်းခတ်ထွေအုပ်က ညတွင်းချင်းနှင်ထုတ်လိုက်တာဖြစ်ကြောင်း ကျေးရွာနဲ့နီးစပ်သူတစ်ဦးက မဲခေါင်ကို ပြောပါတယ်။
“နတ်စင်က ဟိုးအရင်နှစ်တွေက လာမလုပ်ပြီး၊ မနှစ်က ဒီအချိန်လောက်မှာ လာလုပ်တာ။ အဲဒီရွာမှာ ဗုဒ္ဓဘာသာလည်းဘူး။ တော်တော်လှမ်းတဲ့နေရာမှာမှ ရှမ်းဗုဒ္ဓဘာသာရွာရှိတာ။ အဲဒါနဲ့ ဓမ္မဆရာကလည်း နတ်စင်ကို ဖြုတ်သိမ်းလိုက်တာပေ့ါ” လို့ သူက ပြောပါတယ်။
အဲဒီလိုဖြုတ်သိမ်းလိုက်တဲ့နေ့မှာပဲ မိုင်းခတ်မှာရှိတဲ့ ဗုဒ္ဓဘာသာဘုန်းကြီးက သိသွားပြီး မိုင်းခတ်ထွေအုပ်ကို အကြောင်းကြားကာ မိုင်းခတ်ထွေအုပ်က ညတွင်းချင်း ဓမ္မဆရာကို ပြန်ခိုင်းလိုက်တာဖြစ်တယ်လို့ ဒေသခံတွေက ဆိုပါတယ်။
“ထွေအုပ်က ပြန်ခိုင်းတာဆိုတော့လည်း ဓမ္မဆရာအနေနဲ့ ဘာပြောရဲမှာလည်း ပြန်ရတာပေ့ါ။ အဲဒီကတည်းကစပြီး ရွာမှာ ရွာမှာ အခုအချိန်အထိ ဓမ္မဆရာမရှိတော့ဘူး” လို့ ဒေသခံတစ်ဦးက ပြောပါတယ်။
ဟွေမဲအာခါ(အောက်ရွာ)ဟာ အရင်က မိရိုးဖလားနတ်ကိုးကွယ်သူတွေဖြစ်ပြီး နောက်ပိုင်းမှာ ခရစ်ယာန်ဘာသာဝင်တွေ အဖြစ်ကူးပြောင်းယုံကြည်သက်ဝင်ကြတာ ဖြစ်တယ်လို့ သိရပါတယ်။
ဒီလိုမျိုးဖြစ်နေပေမယ့် ခရစ်ယာန်ဘာသာဝင်တွေအနေနဲ့ ဘယ်သူ့ကို သွားအကူအညီတောင်းရမယ်မသိတဲ့ အခြေအနေမျိုးဖြစ်နေတယ်လို့ ရှမ်းအရှေ့က ခရစ်ယာန်ဓမ္မဆရာတစ်ဦးက ပြောပါတယ်။
“ဒီလိုဖြစ်တာ ဘယ်သူ့ကိုတိုင်ရမလဲမသိဘူး။ (အကြီးအကဲပိုင်းမှာ) ခရစ်ယာန်လူကြီးလဲမရှိဘူးလေ။ ကျနော်တို့(ခရစ်ယာန်ဘာသာဝင်)တွေက ဒုတိယနိုင်ငံသား(Second Citizen) လိုဖြစ်နေတယ်”လို့ သူက ပြောပါတယ်။
ရှမ်းပြည်နယ်အရှေ့ပိုင်းဟာ ရှမ်း၊ အာခါ၊ လားဟူ၊ ဗမာ၊ ကချင် အပါအဝင် တိုင်းရင်းသားလူမျိုးစုငယ်များစွာနေထိုင်ရာဒေသဖြစ်ပြီး ကိုးကွယ်မှုပိုင်းမှာလည်း ဗုဒ္ဓဘာသာ၊ ခရစ်ယာဘာသာ၊ ရိုးရာကိုးကွယ်မှုအပါအဝင် ဘာသာကိုးကွယ်မှုစုံလင်ရာဒေသလည်းဖြစ်ပါတယ်။
#MeKongNews
#ရှမ်းအရှေ့
#ဟွေမဲအာခါ
#ဓမ္မဆရာ
