မဲခေါင်၊ ဖေဖော်ဝါရီ ၁၄
စစ်အုပ်ချုပ်ရေးကြေညာပြီး ၉ရက်အကြာမှာ စစ်ကောင်စီက ခင်ဦးမှ ကျေးရွာတွေကို နေ့စဥ်စစ်ကြောင်းထိုးရုံသာမက စစ်ရှောင်တဲတွေကိုပါ မီးတင်ရှို့နေတယ်လို့ ခင်ဦးမြို့နယ်သတင်းမှန်ပြန်ကြားရေးအဖွဲ့က ဒီကနေ့ သတင်းထုတ်ပြန်ပါတယ်။
ဖေဖော်ဝါရီ ၈ရက် ကတည်းက ရေဦးမြို့မှ ခင်ဦးမြို့ပေါ်သို့ ရောက်ရှိလာတဲ့ စစ်ကောင်စီ တပ်သား တွေဟာ ဖေဖော်ဝါရီ၁၁ရက်မှာ ပျူစောထီးရွာဖြစ်တဲ့ မဒေါင်းလှရွာမှပျူတွေနဲ့ပေါင်းကာ စောကြီးကျေးရွာနဲ့ သေနပ်စိန်ကျေးရွာတို့ရှိ မီးလောင်ပြင်မှမီးဘေးသင့်ပြည်သူတွေရဲ့ ထန်းရွက်တဲတစ်ချို့အား မီးရှို့ဖျက်စီးခဲ့ကြတယ်လို့ သိရပါတယ်။
ဒါ့အပြင် အင်ကြင်းပင်ရွာ ၊ဖန်းခါးကုန်းရွာတွေရှိ ဒေသခံတွေကို လက်နက်ပြခြိမ်းခြောက်ပြီး တစ်အိမ်တစ်ယောက်နှုန်းခေါ်ယူကာ ဆန်/ဆီ/မြေပဲစတဲ့ စားစရာပစ္စည်းတွေကို မဒေါင်းလှပျူစောထီးရွာသို့ ယူဆောင်သွားခဲ့ကြတယ်လို့ သိရပါတယ်။
အဲဒီစစ်ကြောင်းဟာ ဖေဖော်ဝါရီ၁၁ရက်နဲ့၁၂ရက်တွေမှာ ပင်တင်းကျေးရွာ၊ညောင်ကန်ကျေးရွာ၊ကွမ်းတိုင်းကျေးရွာ၊မင်းကံကြီးကျေးရွာတို့ကို ဝင်ရောက်ခဲ့ပြီး ကျေးရွာတွေမှ ပြည်သူပိုင်စားစရာ ပစ္စည်းတွေကို မကျီးတုံပျူစောထီးခြံသို့ မတရားခိုးယူသယ်ဆောင်ခဲ့ကြတယ်လို့ ဆိုပါတယ်။
ဖေဖော်ဝါရီ-၁၃ရက်နေ့ မနက်ပိုင်းမှာ မင်းကံကြီးကျေးရွာကို ကျေးရွာစာသင်ကျောင်းပါမကျန် မီးရှို့ခဲ့ပြီး နေ့လယ်ပိုင်းမှာ လက်ပံလှကျေးရွာကိုဝင်ရောက်ကာ ညနေပိုင်း၃နာရီခွဲခန့်အချိန်မှစပြီး ပြည်သူပိုင်နေအိမ်တွေကို နေရာခွဲ မီးတင်ရှို့ခဲ့ကြတယ်လို့ သိရပါတယ်။
အလားတူ ညနေပိုင်းမှာ လက်ပံလှကျေးရွာမှ တစ်ဆင့် လောင်းရှည်ကျေးရွာအတွင်းသို့ ဝင်ရောက်ကာ နေအိမ်တွေကို ညပိုင်းအထိ မီးတင်ရှို့ခဲ့ကြပြီး လောင်းရှည်ကျေးရွာမှာ ယာယီညအိပ်သွားခဲ့ပါတယ်။
ခင်ဦးမြို့နယ်မြောက်ခြမ်း၊အရှေ့ခြမ်းနဲ့အရှေ့တောင်ခြမ်းရှိ ကျေးရွာတွေမှ ဒေသခံတွေဟာဖေဖော်ဝါရီ ၁၁ရက်နေ့မှ စပြီး ဒီကနေ့ မနက်အထိ အလှည့်ကျစစ်ဘေးရှောင်နေရပြီး စားစရာရိက္ခာတွေ လိုအပ်နေသလို နေစရာနဲ့ အဝတ်အထည်တွေလည်းအကူညီလိုအပ်နေတယ်လို့ သိရပါတယ်။
MK-003
#MeKongNews
