မဲခေါင်၊ ဖေဖော်ဝါရီ ၄
အာဏာသိမ်း ၂ နှစ်ပြည့်နေ့ ဖေဖော်ဝါရီလ ၁ ရက်နေ့မှာ စစ်ခေါင်းဆောင် မင်းအောင်လှိုင်က ရှမ်းပြည်နယ်နဲ့ ကရင်နီပြည်ကို တာဝန်ယူ ကိုင်တွယ်ခဲ့တဲ့ အထူးစစ်ဆေးရေးမှူး ဒုတိယ ဗိုလ်ချုပ်ကြီးအောင်ဇော်အေး ကို ရှမ်းပြည်နယ် စစ်ဝန်ကြီးချုပ်အဖြစ် ခန့်အပ်လိုက်ပါတယ်။
ဒုတိယဗိုလ်ချုပ်ကြီး အောင်ဇော်အေး ဟာ ရှမ်းပြည်နယ် အခြေစိုက် တြိဂံဒေသတိုင်း စစ်ဌာနချုပ်နဲ့ အရှေ့မြောက်တိုင်း စစ်ဌာနချုပ်တွေမှာ တိုင်းမှူးအဖြစ် ၂၀၁၆ မှ ၂၀၂၀ ခုနှစ် အထိ တာဝန်ယူခဲ့သူ ဖြစ်ပါတယ်။
၂၀၂၂ ခုနှစ်၊ နိုဝင်ဘာလ ၁၇ ရက်နေ့မှာ စည်သူဘွဲ့ ရခဲ့တဲ့ ဒုတိယဗိုလ်ချုပ်ကြီးအောင်ဇော်အေး (ကြည်း ၂၀၁၇၅) ဟာ စစ်အာဏာသိမ်း ၂ နှစ် ကာလအတွင်း ရှမ်းပြည်နယ် တစ်ခုလုံးနဲ့ ကရင်နီပြည် ပါဝင်တဲ့ အမှတ် (၂) စစ်ဆင်ရေး အထူးအဖွဲ့မှူးအဖြစ် တာဝန်ယူခဲ့ပြီး တော်လှန်လူငယ်တွေကို ရက်ရက်စက်စက် ဖြိုခွင်းခဲ့ပြီး အရပ်သားတွေကို နှိပ်စက်သက်ဖြတ်ရာမှာ အဓိက တာဝန်ရှိသူ ဖြစ်ပါတယ်။
စစ်ဆင်ရေးအထူးအဖွဲ့ (၂) ဗိုလ်ချုပ်ဖြစ်သူ အောင်ဇော်အေး ဟာ အရှေ့ပိုင်းတိုင်း စစ်ဌာနချုပ်ကို ကွပ်ကဲရတဲ့ တာဝန်ရှိသူ ဖြစ်ပါတယ်။
စစ်အာဏာသိမ်းပြီးနောက် ရှမ်းပြည်နယ်နဲ့ ကရင်နီပြည်က ငြိမ်းချမ်းစွာ ဆန္ဒပြခဲ့တဲ့ ကျောင်းသားလူငယ်တွေနဲ့ ပြည်သူလူထုကို အကြမ်းဖက် ဖြိုခွင်း သတ်ဖြတ်ခဲ့မှုတွေ အတွက် အဓိက တာဝန်ရှိသူလည်း ဖြစ်ပါတယ်။
ဒါ့အပြင် ၂၀၂၁ ခုနှစ်၊ ဒီဇင်ဘာ ၂၄ ရက်က ကရင်နီပြည်၊ ဖရူဆိုမြို့နယ်၊ မိုဆိုကျေးရွာကို အကြမ်းဖက် စစ်တပ်က ဝင်ရောက်စီးနင်းပြီး အမျိုးသမီး၊ ကလေးနဲ့ သက်ကြီးရွယ်အိုတွေ အပါအဝင် ရွာသား အယောက် ၄၀ ကို လက်ပြန်ကြိုးတုပ် ဖမ်းဆီး မီးရှို့သတ်ဖြတ်ခဲ့တဲ့ စစ်ရာဇဝတ်မှုကို ကျူးလွန်ခဲ့သူ ဖြစ်ပါတယ်။
ခရစ်စမတ်အကြို သတ်ဖြတ်မှုလို့ နာမည်ကျော်တဲ့ ဒီဖြစ်စဉ်နဲ့ စပ်လျဉ်းပြီး ပုဂ္ဂိုလ် ၂ ဦးကို ဥရောပသမဂ္ဂက ၂၀၂၂ ခုနှစ် ဖေဖော်ဝါရီလ ၂၁ ရက်နေ့မှာ ပိတ်ဆို့စာရင်းသွင်းခဲ့ပါတယ်။ ပထမ တစ်ဦးက အရှေ့ပိုင်းတိုင်း စစ်ဌာနချုပ် ဗိုလ်မှူးချုပ် နီလင်းအောင်ဖြစ်ပြီး ဒုတိယ တစ်ဦးကတော့ ဒုတိယဗိုလ်ချုပ်ကြီး အောင်ဇော်အေး ဖြစ်ပါတယ်။
မိုဆိုရွာ ဖြစ်စဉ်နဲ့ ပတ်သက်ပြီး သက်ဆိုင်သူ မိသားစုဝင်တွေက တရားမျှတမှုရရှိဖို့ တောင်းဆိုထားသလို အမျိုးသား ညီညွှတ်ရေး အစိုးရရဲ့ လူ့အခွင့်အရေး ဝန်ကြီးဌာနကလည်း နိုင်ငံတကာ တရားရုံးတွေမှာ တရားစွဲနိုင်ဖို့ ကြိုးစားမှုတွေ ရှိနေတာပါ။
အဲဒီလို အာဏာသိမ်း စစ်ခေါင်းဆောင် အလိုကျ ကျောင်းသားလူငယ်တွေ၊ အရပ်သားတွေကို သွေးအေးအေးနဲ့ ပစ်သတ်ဖို့ အမိန့်ပေးခဲ့တာ၊ အစုလိုက် အပြုံလိုက် မီးရှို့သတ်ဖို့ ခွင့်ပြုခဲ့တာ စသဖြင့် အသုံးတော်ခံခဲ့ရာက လက်ရှိမှာတော့ အရပ်ဘက်ပြောင်းပြီး စစ်ကောင်စီခန့် ရှမ်းပြည်နယ် ဝန်ကြီးချုပ် ဖြစ်လာတာကြောင့် ဒေသတွင်း အကြမ်းဖက်မှုတွေ ပဋိပက္ခတွေ ပိုမိုးများပြားလာနိုင်တယ်ဆိုတဲ့ သုံးသပ်မှုတွေလည်း ရှိနေပါတယ်။
#MeKongNews
