မဲခေါင်၊ ဖေဖော်ဝါရီ ၁
အမေရိကန် ပြည်ထောင်စု၊ နိုင်ငံခြားရေးဝန်ကြီးဌာန ဒုဝန်ကြီး ဦးဆောင်တဲ့ အဖွဲ့နဲ့ အမျိုးသား ညီညွတ်ရေး အစိုးရ၊ ဆက်သွယ်ရေး၊ သတင်းအချက်အလက်နဲ့ နည်းပညာဝန်ကြီးဌာန ပြည်ထောင်စုဝန်ကြီးတို့ ဇန်နဝါရီ ၃၁ ရက်နေ့က ဝါရှင်တန်ဒီစီမှာရှိတဲ့ အမျိုးသားညီညွတ်ရေး အစိုးရအဖွဲ့ရုံးမှာ တွေ့ဆုံဆွေးနွေးခဲ့တယ်လို့ သိရပါတယ်။
စစ်ခေါင်းဆောင်တွေကို ဖယ်ရှားဖို့ ဘယ်လို အကူအညီတွေ ပေးရမလဲဆိုတာ အမေရိကန် ဒု နိုင်ငံခြားရေး ဝန်ကြီးက ဆွေးနွေးရာ အချက် ၃ ချက်ကို အဓိကထား ဆွေးနွေးခဲ့တယ်လို့ ဆက်သွယ်ရေး၊ သတင်းအချက်အလက်နဲ့ နည်းပညာဝန်ကြီးဌာနက ထုတ်ပြန်ပါတယ်။
“စစ်ကောင်စီ ကျူးလွန်နေတဲ့ လူ့အခွင့်အရေး ချိုးဖောက်မှုတွေ၊ စစ်ရာဇဝတ်မှုတွေ၊ အပြစ်မဲ့ ပြည်သူတွေနဲ့ ကလေးသူငယ်တွေကို သတ်ဖြတ်နေမှုတွေ၊ ရွာတွေကို မီးရှို့ ဖျက်ဆီးမှုတွေကို ရပ်တန့်ဖို့ဟာ အရေးအကြီးဆုံးနဲ့ စစ်ခေါင်းဆောင်တွေကို ဖယ်ရှားဖို့လိုမယ်။ အဲဒီလို ဖယ်ရှားဖို့ ဘယ်လို ကူညီရမလဲလို့ မေးလာလို့ အချက် ၃ ချက်ကို အဓိကထား ဆွေးနွေးလိုက်တဲ့အခါ သိပ်ကို လက်တွေ့ကျတယ်လို့ မှတ်ချက်ပြုပြီး မကြာခင်မှာ အသေးစိတ် ထပ်မံ ဆွေးနွေးဖို့ စီစဉ်မယ်လို့ ပြန်လည် ပြောကြားခဲ့ပါတယ်” လို့ NUG ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီး ဦးထင်လင်းအောင်က ပြောပါတယ်။
ဆွေးနွေးခဲ့တဲ့ အချက် ၃ ချက် ထဲမှာ အချက်တစ်ခုက နည်းပညာကို သေသေချာချာ အသုံးချရမယ်ဆိုတဲ့ အချက်လို့ ဆက်သွယ်ရေး၊ သတင်းအချက်အလက်နဲ့ နည်းပညာဝန်ကြီးဌာနက ဖော်ပြပြီး ကျန်တဲ့ အချက်တွေကိုတော့ ဖော်ပြတာ မရှိသေးပါဘူး။
“အဲဒီအချက် ၃ ချက်ထဲက တချက်ကတော့ နည်းပညာကို သေသေချာချာ အသုံးချရမယ်ဆိုတဲ့ အချက်ပါမယ်။ ကျန် ၂ ချက်ကတော့ အချိန်တန်ရင် အသိပေးပါမယ်” လို့ ဦးထင်လင်းအောင်က ပြောပါတယ်။
ဒီဆွေးနွေးပွဲကို အမေရိကန် ဒုနိုင်ငံခြားရေးဝန်ကြီး Mr. Daniel Kritenbrink ၊ လက်ထောက် ဒုဝန်ကြီး Mrs. Melissa Brown တို့ပါဝင်တဲ့အဖွဲ့နဲ့ အမျိုးသား ညီညွတ်ရေး အစိုးရက ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီး ဦးထင်လင်းအောင်၊ ဒုနိုင်ငံခြားရေးဝန်ကြီး ဦးမိုးဇော်ဦးနဲ့ တိုင်းရင်းသား ကိုယ်စားလှယ်အချို့တို့ တက်ရောက်ခဲ့ကြတာလို့ သိရပါတယ်။
MK-003
#MeKongNews
#ဝါရှင်တန်ဒီစီ
#NUG
