မဲခေါင်၊ ဇန်နဝါရီ ၃၁

နိုင်ငံတော် အာဏာကို မတရား လုယူထားတဲ့ စစ်ကောင်စီရဲ့ ယာယီသမ္မတ ဦးမြင့်ဆွေ ဦးဆောင်ကာ အမည်ခံ အမျိုးသား ကာကွယ်ရေးနှင့် လုံခြုံရေးကောင်စီ အစည်းအဝေးကို ဒီကနေ့ နေပြည်တော်မှာ ကျင်းပခဲ့ပြီး တိုင်းပြည်ရဲ့ အခြေအနေဟာ သာမန် အခြအနေ မဟုတ်ဘူးလို့ သတ်မှတ်ကာ စစ်တပ်က အာဏာ ဆက်သိမ်းထားဖို့ ဆုံးဖြတ် အတည်ပြုပေးခဲ့တယ်လို့ သိရပါတယ်။

စစ်တပ် အာဏာထိမ်းထားတဲ့ ၂ နှစ်ပြည့် ဒီကနေ့ ဇန်နဝါရီ ၃၁ ရက် မနက်ပိုင်းမှာ ယာယီသမ္မတ ဦးမြင့်ဆွေ ဦးဆောင်ကာ အစည်းအဝေး ကျင်းပခဲ့တာ ဖြစ်ပြီး လက်ရှိ အခြေအနေဟာ တိုင်းပြည် တည်ငြိမ်အေးချမ်းမှု မရှိတဲ့ သာမန်မဟုတ်တဲ့ အခြေအနေအဖြစ် ဆုံးဖြတ်ခဲ့တယ်လို့ သိရပါတယ်။

၂၀၀၈ ဖွဲ့စည်ပုံ အခြေခံ ဥပဒေအရ ကာလုံ အစည်းအဝေးကို (၁)နိုင်ငံတော်သမ္မတ (၂) ဒုတိယသမ္မတ (၃) ဒုတိယသမ္မတ (၄) ပြည်သူ့လွှတ်တော် ဥက္ကဋ္ဌ (၅) အမျိုးသားလွှတ်တော် ဥက္ကဋ္ဌ (၆) တပ်မတော် ကာကွယ်ရေးဦးစီးချုပ် (၇) ဒုတိယ တပ်မတော် ကာကွယ်ရေးဦးစီးချုပ် (၈) ကာကွယ်ရေးဝန်ကြီးဌာန ဝန်ကြီး (၉) နိုင်ငံခြားရေးဝန်ကြီးဌာန ဝန်ကြီး (၁၀) ပြည်ထဲရေးဝန်ကြီးဌာန ဝန်ကြီး နဲ့ (၁၁) နယ်စပ်ရေးရာဝန်ကြီးဌာန ဝန်ကြီးတို့နဲ့ ကျင်းပရမှာ ဖြစ်ပါတယ်။

ဒါပေမယ့် ဒီကနေ့ ကျင်းပတဲ့ ကာလုံ အမည်ခံ အစည်းအဝေးမှာတော့ စစ်ကောင်စီရဲ့ ရုပ်သေး ယာယီသမ္မတ ဦးမြင့်ဆွေက ဦးဆောင်ခဲ့ပြီး ဒုသမ္မတဟင်နီရီဗန်ထီးယူ ပင်ပါဝင်ခြင်း မရှိဘဲ ကာလုံမှာ မပါတဲ့ စစ်ကောင်စီ အတွင်းရေးမှူး ဒုတိယဗိုချုပ်ကြီးအောင်လင်းဒွေး၊ တွဲဖက် အတွင်းရေးမှူး ဒုတိယ ဗိုလ်ချုပ်ကြီး ရဲဝင်းဦး၊ ဥပဒေရေးရာဝန်ကြီးဌာန ဝန်ကြီး ဒေါက်တာသီတာဦး တို့ကို အထူးဖိတ်ကြားထားတဲ့ ဧည့်သည်တွေ အဖြစ် တက်ရောက်စေခဲ့တာ တွေ့ရပါတယ်။

ဒီကနေ့ အင်္ဂါမစုံတဲ့ ကာလုံ အစည်းအဝေးမှာ မင်းအောင်လှိုင်က ၂ နှစ်အတွင်း စစ်တပ်လုပ်ခဲ့တဲ့ ကိစ္စတွေကို အစီရင်ခံခဲ့ပြီးနောက် ဆွေးနွေး သုံးသပ်ချက်တွေအရ အကြမ်းဖက်အုပ်စုတွေက နိုင်ငံတော်ကို အလုံးစုံ ပျက်သုဉ်းစေဖို့ ရည်ရွယ် လုပ်ဆောင်မှုတွေ ရှိနေပြီး ဆူပူအကြမ်းဖက်မှုတွေ၊ အဖျက်အမှောင့် လုပ်ငန်းတွေ လုပ်ဆောင်လျက်ရှိ နေတဲ့အတွက် တိုင်းပြည်ရဲ့ တည်ငြိမ်အေးချမ်းရေးမှာ သာမန်အခြေ အနေမဟုတ်ဘူးလို့ အတည်ပြုခဲ့တာပါ။

၂၀၀၈ ဖွဲ့စည်းပုံ ဥပဒေပုဒ်မ ၄၂၅ မှာ သာမန်မဟုတ်တဲ့ အခြေအနေ ဖြစ်ပါက ကာလုံအနေနဲ့ ကာကွယ်ရေး ဦးစီးချုပ်ထံ အာဏာ ဆက်လက် ပေးအပ်နိုင်တယ်လို့ ပြဌာန်းထားပါတယ်။

ပုဒ်မ ၄၂၁ (ခ) အရ သမ္မတ အနေနဲ့ စစ်အာဏာသိမ်းမှုကို သာမန်အားဖြင့် တကြိမ်လျှင် ခြောက်လနဲ့ ၂ ကြိမ် သက်တမ်းတိုးလို့ရပြီး လက်ရှိ သက်တမ်း ၂ ကြိမ် တိုးပြီးဖြစ်လို့ စစ်ကောင်စီရဲ့သက်တမ်း ကုန်ဆုံးရမှာ ဖြစ်ပါတယ်။

ဒါပေမယ့် ပုဒ်မ ၄၂၅ အရ သမ္မတက မဟုတ်ဘဲ ကာလုံ အနေနဲ့ သာမန်အားဖြင့် “တကြိမ်လျှင် ၆ လနဲ့ ၂ ကြိမ် သက်တမ်း တိုးပေးနိုင်တယ်” လို့ ဖော်ပြထားတဲ့ အချက်ကို အသုံးချပြီး ဒီကနေ့ အစည်းအဝေးမှာ စစ်တပ် အာဏာသိမ်းမှုကို ကာလုံ အနေနဲ့ ၆ လ သက်တမ်း ထပ်တိုးပေးလိုက်တာ ဖြစ်ပါတယ်။

ဒါ့အပြင် “သာမန်အားဖြင့်” ဆိုတဲ့ စကားရပ် ပါရှိနေတဲ့ အတွက် နိုင်ငံရဲ့ အခြေအနေဟာ သာမန် မဟုတ်ဘူးလို့ ကာလုံက ဆုံးဖြတ်နေသရွေ့ စစ်အုပ်ချုပ်ရေး သက်တမ်းတိုးနိုင်တဲ့ အခြေအနေဖြစ်တယ်လို့ သုံးသပ်မှုတွေလည်း ရှိနေပါတယ်။

#MeKongNews

#နေပြည်တော်

#ကာလုံ

#ဦးမြင့်ဆွေ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)