မဲခေါင်၊ ဇန်နဝါရီ ၃၁

စစ်ကိုင်းတိုင်း၊ ယင်းမာပင်မြို့နယ်ကနေ နေရပ် ကနီမြို့နယ်ကို ရေကြောင်းနဲ့ ပြန်လာတဲ့ မိသားစုတစ်စုကို စစ်ကောင်စီတပ်ဖွဲ့ဝင်တွေက ပစ်ခတ်ခဲ့တာကြောင့် စက်လှေပေါ်ပါ အမျိုးသမီးတစ်ဦး နှလုံးရပ်ပြီးသေဆုံးခဲ့တယ်လို့ ယင်းမာပင် သတင်းမှန်ပြန်ကြားရေးအဖွဲ့ထံက သိရပါတယ်။

ဇန်နဝါရီ ၃၀ ရက် နံနက် ၈ နာရီခန့်က ယင်းမာပင်ကနေ ကနီမြို့နယ်ကို ရေကြောင်းနဲ့ အထက်ကို ဆန်တက်လာတဲ့ စက်လှေတစ်စင်းကို စစ်ကောင်စီတပ်ဖွဲ့ဝင်တွေက လက်နက်ငယ်တွေနဲ့ ပစ်ခတ်ခဲ့ရာ စက်လှေပေါ်ပါ မမာမာဝင်းဆိုသူ နှလုံးရပ်သေဆုံးခဲ့တာဖြစ်ပါတယ်။

အဲ့ဒီ့နောက် စစ်တပ်ဘက်က သူတို့တပ်စွဲနေထိုင်ရာ သပြေတောကျေးရွာကို ပစ်ခတ်ခံရတဲ့ မိသားစုကိုခေါ်သွားခဲ့ပြီး အထက်သို့ဆန်မတက်စေဘဲ လာရာကိုစေခဲ့တယ်လို့ သိရပါတယ်။

စစ်တပ်ရဲ့ပစ်ခတ်မှုကြောင့် သေဆုံးသွားတဲ့ အမျိုးသမီးဟာ နှလုံးရောဂါရှိသူဖြစ်ပြီး သေဆုံးသူအမျိုးသမီးကို ယင်းမာပင်မြို့နယ်အတွင်းရှိ ကျေးရွာတစ်ရွာမှာ သင်္ဂြိုလ်ခဲ့ရတယ်လို့ ယင်းမာပင်သတင်းမှန်က ထုတ်ပြန်ထားပါတယ်။

#MeKongNews

#စစ်ကောင်စီ

#ယင်းမာပင်

#နှလုံးရပ်သေဆုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)