မဲခေါင်၊ ဇန်နဝါရီ ၂၈
ကိုရီးယား အလုပ်လျှောက်လွှာ ထုတ်ယူရာမှာ နိုင်ငံကူး လက်မှတ် သက်တမ်း လက်ကျန် ဖြေလျှော့ပေး ထားတယ်လို့ အစိုးရ ပြည်ပ အလုပ်အကိုင် အေဂျင်စီ-POEA မှသိရပါတယ်။
လက်ရှိမှာ ကိုရီးယား-မြန်မာ လုပ်သားခေါ်ယူမှု EPS စနစ် စာမေးပွဲ အောင်မြင်သူ ၆,၃၀၀ ဝန်းကျင်ရှိ ပေမယ့် အများစုမှာ ပတ်စ်ပို့သက်တမ်းတိုးမရတာနဲ့ ပတ်စ်ပို့ အမျိုးအစား PV ကနေ PJ သို့ပြောင်းမရတဲ့ ဒုက္ခတွေနဲ့ ရင်ဆိုင်နေရတာ ဖြစ်ပါတယ်။
ကုန်ထုတ်လုပ်ငန်း ပထမအသုတ် စာမေးပွဲ အောင်ထားသူတွေ အတွက် အလုပ်လျှောက်လွှာကို ဇန်နဝါရီလ ၃၀ ရက်ကနေ ဖေဖော်ဝါရီလ ၂ ရက်အထိ ထုတ်ယူနိုင်တယ်လို့ အစိုးရ ြပေည်ပအလုပ်အကိုင် အေဂျင်စီ POEA က ကြေညာထားပါတယ်။
“အရင်က အလုပ်လျှောက်လွှာ လာထုတ်ရင် နိုင်ငံကူး လက်မှတ် သက်တမ်း တစ်နှစ်ကျန်ရှိရမယ်လို့ သတ်မှတ် ထားတယ်။ ကိုရီးယား EPS လုပ်သားတွေ အတွက်ကြတော့ MOU လမ်းကြောင်း မရှိဘူး။ အဲ့ဒါကြောင့် EPS လုပ်သားတွေရဲ့ ပတ်စ်ပို့က အခက်အခဲ ရှိတယ်။ အခုက ပတ်စ်ပို့ရုံးတွေ ပိတ်ထားလို့ အကုန်လုံးက ဘာမှ လုပ်မရပဲ ထွက်ဖို့ ခက်နေတာပေါ့။ ဒါကိုလည်း သက်ဆိုင်ရာ အလုပ်လျှောက်လွှ ာထုတ်ပေးသူတွေကို လူမူကွန်ရက်ကနေ အကူညီတောင်းပြီး မှတ်ချက်ပြုကြလို့ ဖြေလျှော့ဖို့ ဖြစ်လာတာဖြစ်တယ်” လို့ ကိုရီး ယားနိုင်ငံကို EPS စနစ်နဲ့ သွားရောက်ဖို့ ကြိုးစားနေသူ တစ်ဦးက မဲခေါင်သတင်းကို ပြောပါတယ်။
၂၀၂၂ ခုနှစ်မှာ မြန်မာ အပါအဝင် နိုင်ငံခြား လုပ်သား ၆၈,၀၀၀ ဦး ခေါ်ယူဖို့ ရှိနေပြီး၊ မြန်မာမှ ကိုရီးယားသို့ တရားဝင် စေလွှတ်ခဲ့တဲ့ EPS အလုပ်သမား ၇,၄၀၀ ကျော်ရှိမှာ ဖြစ်ကာ ၂၀၂၃ ခုနှစ်မှာတော့ ကိုရီးယားနိုင်ငံမှ နိုင်ငံခြား အလုပ်သမား ၁ သိန်း ၁ သောင်းကျော် ခေါ်ယူမယ်လို့ ကိုရီးယားသမ္မတနိုင်ငံ အလုပ်အကိုင်နှင့် အလုပ်သမား ဝန်ကြီးဌာနက ထုတ်ပြန်ထားပါတယ်။
“ပတ်စ်ပို့တွေကို ဘာကြောင့်ပိတ်လိုက်တာ ဆိုတာတော့ ကောလဟာလ မျိုးစုံ ထွက်နေတာပေါ့။ အချက် အလက်အရတော့ ဘယ်သူမှ မသိနိုင်ဘူး။ ပတ်စ်ပို့ စာအုပ်ထုတ်ဖို့ စက္ကူကြောင့်လား၊ ရွေးကောက်ပွဲလုပ် ဖြစ်ရင် နိုင်ငံခြားမှာ ရောက်နေသူတွေ မရှိအောင် ပြည်တွင်းမှာ လူတွေရှိအောင် ပိတ်ထားတာလား။ ပြီးတော့ နေပြည်တော် ရဲမင်းကြီးဖက်က ညွှန်ကြားစာ ထွက်လာတယ်လို့လည်း သိထားတယ်။ ပြည်ပကို အလုံးအရင်း ထွက်နေတာကြောင့် လူသားအရင်းအမြစ် အားနည်းလာတယ်လို့ ထွက်ပေါ်နေတာတွေလည်း ရှိတယ်” လို့ ပတ်စ်ပို့ရုံး အသိုင်းအဝိုင်းနဲ့ နီးစပ်သူ တစ်ဦးက ပြောပါတယ်။
လက်ရှိ ကိုရီးယားနိုင်ငံမှာ မြန်မာလုပ်သား ၅ သောင်းနီးပါး လုပ်ကိုင်နေပါတယ်။
MK-010
