မဲခေါင်၊ ဇန်နဝါရီ ၂၈
စစ်ကောင်စီရဲ့ အရေးပါတဲ့ အဓိက ထောက်ပို့ လမ်းကြောင်း တစ်ခုဖြစ်တဲ့ ကြာအင်းဆိပ်ကြီး-မုဒုံလမ်းမပေါ်က ဒါလီတံတား မိုင်းခွဲဖျက်ဆီး ခံခဲ့ရတယ်လို့ ဒေသခံတွေထံမှ သိရပါတယ်။
ကရင်ပြည်နယ်၊ ကြာအင်းဆိပ်ကြီးနဲ့ မွန်ပြည်နယ် မုဒုံမြို့ကို ဆက်သွယ်ထားတဲ့ လမ်းမပေါ်က ဒါလီတံတား ဒီနေ့ ဇန်နဝါရီ ၂၈ ရက် မနက်ပိုင်းမှာ မိုင်းပေါက်ကွဲမှုကြောင့် တံတားချဉ်းကပ်လမ်း တစ်ဖက်ခြမ်း ပြိုကျပျက်စီး သွားပါတယ်။
ဒါလီတံတားဟာ ကြာအင်းဆိပ်ကြီးမြို့နယ် သံပုရာရွာနဲ့ ရွှေလင်းကျေးရွာကြားမှာရှိပြီး ဇန်နဝါရီ ၂၆ ရက်နေ့က မိုင်းခွဲခံခဲ့ရပေမယ့် အသုံးပြုလို့ရနေပြီး ဒီနေ့မနက် ၂ နာရီဝန်းကျင်မှာ မိုင်းကွဲသံကြားရပြီး ကျိုးကျ ပျက်စီးခဲ့တယ်လို့ ဒေသခံတွေက ဆိုပါတယ်။
ဒါလီတံတား ကျိုးကျမှုကြောင့် ဒေသခံတွေကြားမှာ ဝေဖန်မှုတွေ မြင့်တက်နေပြီး ကြာအင်းဆိပ်ကြီး ဒေသခံတွေ ကတော့ လမ်းပန်းဆက်သွယ်ရေး ခက်ခဲမှာနဲ့ ကုန်ဈေးနှုန်း မြင့်တက်မှုတွေ ဖြစ်လာမှာ စိုးရိမ်နေကြတယ်လို့ သိရပါတယ်။
ဒါလီတံတားကို စစ်ကောင်စီတပ်က ရိက္ခာ၊ လက်နက်နဲ့ စစ်ကူအတွက် ထောက်ပို့ လမ်းကြောင်းအဖြစ် အဓိက အသုံးပြုနေတာလို့ ဒေသခံတွေထံက သိရပြီး တံတား ဖောက်ခွဲမှုကို ဘယ်အဖွဲ့အစည်းက ပြုလုပ်ခဲ့တယ် ဆိုတာကိုေတော့ မဲခေါင်သတင်း အနေနဲ့ အတည်ပြုနိုင်တာ မရှိသေးပါဘူး။
ပြီးခဲ့တဲ့ ဇန်နဝါရီ ၄ ရက်နေ့မှာ ကြာအင်းဆိပ်ကြီးမြို့နယ်ထဲက စစ်ကောင်စီ တပ်ရင်းတွေကို KNLA ပူးပေါင်း တပ်ဖွဲ့တွေ ဝင်ရောက် တိုက်ခိုက်ခဲ့ပြီး တိုက်ပွဲ အပြင်းအထန်ဖြစ်ပွားခဲ့ရာ နှစ်ဖက် ထိခိုက်ကျဆုံးမှုတွေ များပြားခဲ့ကာ စစ်တပ်ဘက်က လေကြောင်းပစ်ကူတွေ အလွန်အကွ ျံအသုံးပြုတာကြောင့် အနီးတဝိုက်က ကျေးရွာဒေသခံ ၄၀၀၀ ဝန်းကျင် နေရပ်စွန့်ခွာ ထွက်ပြေးခဲ့ရတယ်လို့ ဒေသခံတွေထံက သိရပါတယ်။
MK-009
