မဲခေါင်၊ ဇန်နဝါရီလ၂၇
စစ်ကောင်စီက ပြည်ပငွေလွဲလုပ်ငန်းတွေကို တရားဝင်လိုင်စင် ရှိမှသာ လုပ်ကိုင်ရမယ်လို့ တင်းကျပ်မှုဟာ နိုင်ငံခြားငွေကြေးစီးဆင်းမှုကို ထပ်မံထိန်းချုပ်လိုခြင်းသာဖြစ်တယ်လို့ စီးပွားရေးလုပ်ငန်းရှင်တွေက ပြောပါတယ်။
ဗဟိုဘဏ်ကမိမိနိုင်ငံနဲ့ ပြည်ပနိုင်ငံတွေကြားမှာ တရားမဝင် ငွေလွှဲလုပ်ငန်းတွေ လျော့နည်းစေဖို့ပြည်ပငွေလွှဲလုပ်ငန်းလိုင်စင် လျှောက်ရမှာဖြစ်ပြီး လိုင်စင်လျောက်တဲ့အခါမှာလည်းDICA ကခွင့်ပြုတဲ့လုပ်ငန်းဖြစ်ရမယ်လို့ ကြေညာချက်ထွက်ရှိထားပါတယ်။
ပြည်ပနိုင်ငံနဲ့ ချိတ်ဆက်ဆောင်ရွက်ရာမှာလည်း သက်ဆိုင်ရာနိုင်ငံမှာ တရားဝင်ငွေလွှဲလုပ်ငန်းလိုင်စင် ရရှိရမှာဖြစ်တယ်လို့လည်းဗဟိုဘဏ်ကဆိုပါတယ်။
“ဒါက ငွေကြေးစီးဆင်းမှုကို ထိန်းချုပ်ချင်တဲ့သဘောပေါ့။ နောက်တစ်ခုက အခွန်ကို အဓိကထိန်းချင်တာလည်းပါတယ်။ နိုင်ငံတော်ဘတ်ဂျက်ထဲကို ရသလောက်ဆွဲသွင်းတာမျိုး၊ အခုလိုတင်းကျပ်လာတာက ပြည်တွင်းဘဏ်တွေ အသုံးပြုမှုနည်းလာတာရယ် ဟွန်ဒီလုပ်ငန်း ငွေယိုစိမ့်လာတာထိန်းချုပ်ချင်တာလည်းပါတယ်။ နောက် မမြင်ရတဲ့ဘက်အခြမ်းမှာ ဘာလုပ်ချင်တာလည်းဆိုတာလည်း စဥ်းစားစရာပေါ့လို့” သုံးသပ်သူကဆိုပါတယ်။
ပြည်ပ ငွေလွဲလိုင်စင်ရရှိထားတဲ့သူက ဗဟိုဘဏ်မှာ အာမခံငွေကျပ် သန်း ၁၀၀ အပ်နှံထားရတဲ့အပြင် နှစ်စဥ်ကြေး ကျပ် တစ်သိန်း သတ်မှတ်ထားပြီး လိုင်စင်သက်တမ်း ၃ နှစ် ခွင့်ပြုထားတယ်လို့လည်း သိရပါတယ်။
ဟွန်ဒီငွေလွဲလုပ်ငန်းတွေနဲ့ ပတ်သက်ပြီး အစိုးရအဆက်ဆက် ထိန်းချုပ်မှုလုပ်ခဲ့ပေမယ့် အရပ်သား အစိုးခေတ်လက်ထက်က အနည်းငယ်ပြောင်းလဲမှုရှိခဲ့ပေမယ့် လက်ရှိနိုင်ငံအခြေနေအရ ထိန်းချုပ်ဖို့ မလွယ်ကူနိုင်ဘူးလို့ သုံးသပ်သူကဆိုပါတယ်။
ပြီးခဲ့တဲ့ ၂ လ ကျော်က နိုင်ငံခြား ငွေရှားပါးကာ ကန် ၁ ဒေါ်လာ ၃၀၀၀ ကျော်အထိ ရောက်ရှိချိန်မှာ ပြည်ပရောက်ရွှေ့ပြောင်းလုပ်သားတွေနဲ့ သင်္ဘောသားတွေရဲ့ လုပ်ခ လစာ အပေါ် စစ်ကောင်စီက ဖိအားပေးတင်းကျပ်မှုတွေ လုပ်ပြီး အတင်းအကျပ်ငွေလွဲခိုင်းစေမှုတွေ ရှိခဲ့ပါတယ်။
“ပြည်ပက ငွေလွဲဆိုတဲ့လုပ်ငန်းမှာ အဓိကလမ်းကြောင်းက နိုင်ငံခြားမှာ အလုပ်လုပ်နေတဲ့သူတွေ ကုန်သွယ်ရေးလုပ်ငန်းတွေ အဓိကသက်ဆိုင်တာပေါ့။ ဒီဟာတွေအပေါ် မူဝါဒအမျိုးမျိုး ထုတ်ပြန်တယ်။ မတည်ငြိမ်တဲ့ အခြေနေဖန်တီးထားပြီးမှတော့ အခွန်ရဖို့ လုပ်ဆောင်တာကဟာသလို ဖြစ်နေတယ်။ အာဏာသိမ်းလုပ်ရက်ကို ကာဗာလုပ်ဖို့က ငွေကြေးခဝါချမှုနဲ့ မူးယစ်ဆေးဝါးကို တင်းကျပ်စွာကိုင်တွယ်နေတယ်ဆိုတာ ကမ္ဘာကိုပြချင်တာကြောင့် လိုက်တင်းကျပ်နေတာလို့ပဲမြင်တယ်လို့” အမည်မဖော်လိုသူ ငွေလွှဲ လုပ်ငန်းလုပ်ဆောင်နေသူ တစ်ဦးကပြောပါတယ်။
ပြည်ပ ငွေလွှဲလိုင်စင် ရရှိထားတဲ့သူက ဗဟိုဘဏ်က သတ်မှတ်ထားတဲ့ စည်းမျဥ်းတွေ လမ်းညွန်ချက်တွေ ပျက်ကွက်ရင် ပျက်ကွက်မှုတစ်ခုစီအတွက် ကျပ် ၁၀ သန်း ထက်မနည်း ဒဏ်ငွေကျခံရကာ လိုင်စင်အသိမ်းခံရတဲ့အထိ အရေးယူမှုတွေကြောင့် တရားဝင်လုပ်ဆောင်မှု အားနည်းတာလို့လည်းသူကဆိုပါတယ်။
လက်ရှိ စစ်ကောင်စီ ထိန်းချုပ်နေတဲ့ ငွေကြေးခဝါချမှု အပိုင်းမှာလည်း လုပ်ငန်းတရားဝင် ဖြစ်ရေးနဲ့ အခွန်ဆောင်ရေးသာကြည့်ပြီး ငွေကြေးစီးဆင်းမှုကို မျက်ကွယ်ပြုထားတာကြောင့်အမြတ်ထုတ်လိုတဲ့ စီးပွားရေးလုပ်ငန်းရှင်တွေ အတွက် အခွင့်လမ်းသဖွယ်ဖြစ်နေတယ်လို့ လည်းသူကပြောပါတယ်။
လက်ရှိအချိန်ထိ တစ်နိုင်ငံလုံးအတိုင်းအတာနဲ့ ပြည်ပငွေလွှဲလုပ်ငန်းလိုင်စင်အား ကုမ္မဏီ ၁၁ ခု အတွက်ထုတ်ပေးထားပြီးဖြစ်တယ်လို့လည်းစစ်ကောင်စီလက်အောက်ခံဗဟိုဘဏ်ကကြေညာထားပါတယ်။
MK-006
