မဲခေါင်၊ ဇန်နဝါရီ ၂၅
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသမှာ အခုလ အတွင်း စစ်ကောင်စီတပ်က ကားတွေကို နေ့စဉ် ချောဆွဲပြီး PDF တွေကို တောနင်းရှာဖွေနေတယ်လို့ ဒေသခံတွေက ပြောပါတယ်။
အင်းလေးဒေသ သန်းထောင်ကျေးရွာအုပ်စု အတွင်းမှာရှိတဲ့ ဘုရားကြီးရှေ့၊ ဝမ်းဘဲအင်း၊ နွားတမ၊ ဘုရားနီ၊ လှေဆိပ်၊ သရက်သုံးပင်၊ သန်းထောင်စတဲ့ ကျေးရွာတွေက ကားရှိတဲ့ အိမ်တွေကို စစ်ကောင်စီတပ်က အလှည့်ကျ ကားချောဆွဲပြီး PDF တွေကို တောနင်းရှာဖွေနေတာဖြစ်တယ်လို့ ဆိုပါတယ်။
“ရွာတွေ အားလုံးပေါင်းရင် ကားက အစီး ၄၀ ကျော်ရှိတယ်။ အဲဒါကို နေ့တိုင်း ချောဆွဲနေတာ။ နောက်ပိုင်းတော့ ကားသမားတွေအားလုံး စုပေါင်းတိုင်ပင်ပြီး တစ်ရက်ကို ၇ စီးနှုန်းနဲ့ အလှည့်ကျ ထွက်ပေးနေရတယ်။ ဆီက ကိုယ့်ကိုကိုယ်ထည့်၊ ကားပြင်ရင် ကိုယ့်ကိုကိုယ် ပြင်ရတယ်။ နေ့တိုင်း ကားတွေက ပျက်တယ်။ ကားနဲ့မလွတ်တဲ့ လမ်းတွေကိုပဲ သွားနေရတာလေ” လို့ ဒေသခံတစ်ဦးက ပြောပါတယ်။
သန်းထောင်နဲ့ ဘုရားနီကျေးရွာ အနီးမှာ ပြီးခဲ့တဲ့ ဇန်နဝါရီလ ၃ ရက်က USSFU တပ်ပေါင်းစုနဲ့ စစ်ကောင်စီ၊ အင်းပျူစောထီး၊ PNO ပူးပေါင်းအဖွဲ့တို့ တိုက်ပွဲ ဖြစ်ပွားခဲ့ရာ စစ်ကောင်စီ ပူးပေါင်းအဖွဲ့ဘက်က ၃၀ ကျော် သေဆုံးပြီး ၂၀ ကျော် ထိခိုက်ဒဏ်ရာရရှိခဲ့တယ်လို့ သိရပါတယ်။
USSFU တပ်ပေါင်းစု ဘက်ကလည်း အမှတ် (၁၀၀၉) တပ်ရင်း -အင်းလေးဒေသ ပြည်သူ့ကာကွယ်ရေးတပ်ဖွဲ့-IPDF ရဲ့ တပ်ရင်းမှူးနဲ့ ရဲဘော်တချို့ မြင့်မြတ်စွာ အသက်ပေးလှူခဲ့ရပြီး ရဲဘော်အချို့ ဖမ်းဆီးခံခဲ့ရတယ်လို့ ညီညွတ်သော ရှမ်းတောင် ဖက်ဒရယ်တပ်ပေါင်းစု-USSFU မှ ဇန်နဝါရီလ ၂၁ ရက်က ထုတ်ပြန်ထားပါတယ်။
အဲဒီ တိုက်ပွဲ ဖြစ်ပွားပြီး နောက်ရက်တွေမှာ USSFU တပ်ပေါင်းစုဝင် ရဲဘော်တချို့နဲ့ ဒေသခံ တချို့ စစ်ကောင်စီနဲ့ အင်းပျူစောထီးတွေရဲ့ ဖမ်းဆီးနှိပ်စက်ခံရပြီး ကျဆုံးမှုတွေ ရှိခဲ့တယ်လို့ USSFU ရဲ့ ထုတ်ပြန်ချက်မှာ ပါရှိပါတယ်။
PNO နဲ့ အင်းပျူစောထီးတွေက ညောင်ရွှေ-အင်းလေးဒေသ တကြောရှိ လမ်းတွေပိတ်ပြီး အစစ်အဆေးတွေ ပြုလုပ်နေတာ ဒေသခံတွေအပေါ် အကြမ်းဖက် ဖမ်းဆီးနှိပ်စက် နေတာတွေကို ချက်ချင်းရပ်တန့်ဖို့ ပြင်းပြင်းထန်ထန် သတိပေးလိုက်တယ်လို့ USSFU က အသိပေးထားပါတယ်။
PNO နဲ့ အင်းပျူစောထီးတွေ အနေနဲ့ စစ်ကောင်စီအလိုကျ ပြည်သူလူထုရဲ့ လွတ်လပ်စွာသွားလာခွင့်နဲ့ အသက်အန္တရာယ်တွေကို ခြိမ်းခြောက်တဲ့ လုပ်ဆောင်ချက်တွေ ဆက်လက်လုပ်ဆောင်မယ်ဆိုပါက စစ်ကောင်စီနဲ့ တန်းတူထားပြီး အခုထက်ပိုမို ပြင်းထန်တဲ့တိုက်ခိုက်မှုတွေ လုပ်ဆောင်မှာဖြစ်တယ်လို့လည်း USSFU က သတိပေးထားပါတယ်။
MK-008
