မဲခေါင်၊ ဇန်နဝါရီ ၂၅
မြန်မာနိုင်ငံမှာ စစ်အာဏာသိမ်းပြီးနောက် ဘိန်းစိုက်ပျိုးမှု အထူးမြင့်တက်လာသလို ဘိန်းထုတ်ကုန် ၃၃ ရာခိုင်နှုန်းအထိ ပြန်မြင့်တက်လာတယ်လို့ ဘန်ကောက်အခြေစိုက် ကုလသမဂ္ဂမူးယစ်ဆေးဝါးနှင့် ရာဇဝတ်မှုရုံးက ထုတ်ပြန်ခဲ့ပါတယ်။
စစ်အာဏာသိမ်းမှုကြောင့် နိုင်ငံတစ်ဝန်း လက်နက်ကိုင်တိုက်ပွဲတွေနဲ့ မငြိမ်မသက်ဖြစ်ရခြင်း၊ ယူကရိန်းစစ်ပွဲကြောင့် ဆီစျေးတက်ခြင်းနဲ့ စီးပွားရေးချွတ်ခြုံကျလာတဲ့အတွက် ဘိန်းစိုက်ပျိုးမှုဘက်ကို ပိုမိုလုပ်ကိုင်လာကြတယ်လို့ ဆိုပါတယ်။
ဘိန်းစိုက်ပျိုးမှုကို ပြန်လည်လုပ်ကိုင်လာရာကနေ ဘိန်းထုတ်ကုန်တွေ ပြန်လည်မြင့်တက်လာတဲ့အခြေအနေကို ဂြိုဟ်တုကောင်းကင်ဓာတ်ပုံတွေ၊ မြေပြင်ကွင်းဆင်းလေ့လာမှုတွေအရ သိရှိနိုင်ခဲ့တယ်လို့ ကုလသမဂ္ဂမူးယစ်ဆေးဝါးနှင့် ရာဇဝတ်မှုရုံးက ထုတ်ပြန်လိုက်တာဖြစ်ပါတယ်။
မြန်မာနိုင်ငံမှာ ၂၀၂၁ ခုနှစ်နောက်ပိုင်း စီးပွားရေးတိုးတက်လာခြင်း၊ အစိုးရနဲ့နိုင်ငံတကာအဖွဲ့အစည်းတွေပေါင်းပြီး ဘိန်းဆန့်ကျင်ရေး စီမံကိန်းတွေ အကောင်အထည်ဖော်နိုင်ခဲ့လို့ ၂၀၁၃ မှာ ဘိန်းထုတ်လုပ်မှု စံချိန်တင် မက်ထရစ်တန် ၈၇၀ ရှိခဲ့ရာက ၂၀၂၀ မှာ တန် ၄၀၀ အထိ လျှော့ချထုတ်လုပ်နိုင်ခဲ့ပါတယ်။
အာဏာသိမ်းပြီးနောက် မနှစ်က တန် ၇၉၀ အနည်းဆုံးထုတ်လုပ်ပြီး အများဆုံးအဖြစ် တန် ၁၂၀၀ အထိတောင် ထုတ်လုပ်ခဲ့တယ်လို့ အဆိုပါ အစီရင်ခံစာမှာ ဖော်ပြထားပါတယ်။
ဘိန်းထုတ်ရာမှာ ရွှေတြိဂံဒေသက အဓိကထုတ်လုပ်ပြီး ထုတ်ကုန်တွေဟာ ကမ္ဘာမှာ အရည်အသွေး အကောင်းဆုံးအဖြစ် သတ်မှတ်ခံရကာ လက်နက်ကိုင်ပြည်သူ့စစ်အဖွဲ့တွေရဲ့ ဦးဆောင်မှုကနေ ဘိန်းစိုက်ပျိုးမှုနဲ့ ဘိန်းထုတ်ကုန်တွေ ထုတ်လုပ်မှုဟာ လုပ်ကွက်ငယ်လေးတွေကနေ အဆင့်မြင့် လုပ်ကွက်ကြီး၊ စက်ရုံကြီးတွေ အဖြစ်ပါ တည်ရှိလာတယ်လို့ ဆိုပါတယ်။
မြန်မာ အာဏာသိမ်း စစ်ကောင်စီဟာ တိုင်းရင်းသားလက်နက်ကိုင်တွေကို ကြိုက်သလို ဘိန်းစိုက်ခွင့်၊ ဘိန်းထုတ်လုပ်ခွင့်ပေးပြီး NUG အဖွဲ့အစည်းနဲ့ PDF ကိုသာ အဓိက နှိမ်နင်းဖို့ ကြံစည်ခဲ့ခြင်းကလည်း ဘိန်းထုတ်လုပ်မှုကို ပိုမြင့်တက်လာစေတယ်လို့ International Crisis Group မြန်မာနိုင်ငံဆိုင်ရာအကြံပေး ရစ်ချက်ဟော့ဆေးကလည်း သုံးသပ်ပြောကြားသွားပါတယ်။
World Bank ရဲ့ အစီရင်ခံစာမှာ ဒီမိုကရေစီအစိုးရဖြစ်တဲ့ ဒေါ်အောင်ဆန်းစုကြည်အစိုးရလက်ထက် နိုင်ငံစီးပွားရေး မြင့်တက်လာမှုဟာ စစ်အာဏာသိမ်းပြီး ပထမနှစ်မှာပဲ စီးပွားရေးကျဆင်းမှု ၁၈ ရာခိုင်နှုန်းဆီ ရောက်ရှိသွားကြောင်းနဲ့ မြန်မာ့လူဦးရေရဲ့ ၄၀ ရာခိုင်နှုန်းဟာ ဆင်းရဲမွဲတေမှု မျဉ်းအောက်မှာသာ နေထိုင်ရှင်သန်နေကြရတယ်လို့ ဖော်ပြထားပါတယ်။
MKF-001
ဘိန်းစိုက်ပျိုးမှုမြင့်တက်
MilitaryCoupInMyanmar
Ref:theglobeandmail
