မဲခေါင်၊ ဇန်နဝါရီလ ၂၄

မြန်မာနိုင်ငံ အလယ်ပိုင်းဒေသတွေမှာ ကြံကို စီးပွါးဖြစ်စိုက်ပျိုးသူနည်းလာတာဟာ နယ်မြေမအေးချမ်းတဲ့အပြင် သကြားစက်ရုံတွေက အကျိုးတူလယ်ယာစနစ်ဖျက်သိမ်းမှု​တို့ကြောင့်လို့ စစ်ကိုင်းတိုင်းရှိ တောင်သူတွေက ပြောပါတယ်။

အရင်နှစ်တွေက တစ်နိုင်ငံလုံးအတိုင်းအတာနဲ့ ကြံ စိုက်ဧက ၅ သိန်းကျော်ရှိခဲ့ရာကနေ လက်ရှိမှာတော့ ဧက ၄ သိန်းကျော်သာ စိုက်ပျိုးမှုရှိပါတယ်။

သကြားစက်ရုံတွေက ဈေးကောင်းပေးဝယ်တယ် လို့ဆိုပေမယ့် စိုက်ပျိုးစရိတ် မြင့်တက်မှုတွေကြောင့် အမြတ်ကျန်ရှိတာ နည်းလာတာလို့လည်း သိရပါတယ်။

“အလယ်ပိုင်းဒေသတွေမှာ ကြံကိုစီးပွားဖြစ် မစိုက်တော့ဘူး။ သူတို့ပေးတဲ့အရင်းနှီးနဲ့ ကုန်ကျစရိတ်က မကိုက်ဘူး။ နောက် သူတို့သတ်မှတ်တဲ့ ဈေးနဲ့ဘဲ ဝယ်တယ်။ ကိုယ့်အနီးနားမှာရှိတဲ့ သကြားစက်ကိုပဲ ရောင်းလို့ရတော့ သူတိုက စင်ပေါ်ကပဲ။ အခုလို နယ်မြေမအေးချမ်းတော့ နှစ်ရှည်သီးနှံတွေကို မစိုက်ချင်ကြတာလည်း ပါမယ်။ တောင်သူရှုံးနေတာကိုသိတော့ သူတို့က အကျိုးတူ လယ်ယာစနစ်ကို မလုပ်ချင်ကြတော့ဘူး” လို့ စစ်ကိုင်းတိုင်း ကြံစိိုက်တောင်သူတစ်ဦးက ဆိုပါတယ်။

ကြံစိုက်ပျိုးရာမှာ စိုက်စရိတ်မြင့်တက်တာ သွင်းအားစုဈေးမြင့်တက်မှုတွေကြောင့် တောင်သူတွေ တွက်ချေမကိုက်ဘဲ တခြားသီးနှံ အစားထိုးစိုက်ပျိုးလာ​ကြတာကြောင့် ကြံအထွက်နှုန်းလျော့နည်းပြီး သကြား စျေးမြင့်တက်လာတာဖြစ်တယ်လို့လည်း သူကပြောပါတယ်။

ကြံစိုက်ရာသီအတွင်း သကြားစက်ရုံတွေက ကြံ တစ်တန် ကို ကျပ် ၉ သောင်းဈေးဖွင့်ပေးထားပေမယ့် အဲ့ဒီ ဈေးနှုန်းက တောင်သူတွေ တွက်ချေမကိုက်ဘူးလို့လည်း သိရပါတယ်။

“ထွက်နှုန်းနည်းရင် ဈေးတက်တာက သဘာဝပဲ။ ကြံစိုက်သူနည်းလာတယ်၊ အဓိကတော့ အကျိုးတူလယ်ယာစနစ်ကို ပြန်ပြီးအသက်သွင်းမှ အဆင်ပြေနိုင်မယ်။ တောင်သူက စက်ရုံကဝယ်မှာလား၊ ဘယ်ဈေးပေးမှာလည်း မသိရင် မစိုက်ဘူး။ ဒါဆို သကြားအထွက်နှုန်းနည်းမယ်၊ ပြည်ပတင်ပို့မှု လျော့နည်းမယ်လို့” သကြားနှင့် ကြံထွက်ပစ္စည်းလုပ်ငန်းရှင်များအသင်း တာဝန်ရှိသူက ပြောပါတယ်။

ပြည်ပနိုင်ငံတချို့က သကြားဝယ်ယူရန်ကမ်းလှမ်းမှုတွေ ရှိပေမယ့် ရောင်းချနိုင်ခြင်း မရှိသေးဘူးလို့ သတင်းထွက်ပေါ်ပြီး ကုန်သည်တချို့ရဲ့ စျေးဆွဲတင်မှုကြောင့် သကြားဈေး တစ်ပိဿာကို ၂၇၀၀ ကျပ် ထိဖြစ်နေတယ်လို့ သိရပါတယ်။

ကြံ ကို ရှမ်းပြည်နယ်မြောက်ပိုင်း၊ တောင်ပိုင်း၊ စစ်ကိုင်းတိုင်း နဲ့ ပဲခူးအရှေ့ခြမ်း၊ အနောက်ခြမ်းတွေမှာ အဓိကစိုက်ပျိုးပြီး တိုက်ပွဲအခြေအနေတွေကြောင့် ပိတ်ထားတဲ့ သကြားစက်တွေလည်း ရှိတယ်လို့ သိရပါတယ်။

၂၀၂၂-၂၀၂၃ ဘဏ္ဍာနှစ် ဇန်နဝါရီလမှ ဧပြီလကုန်အထိ ပြည်ပကို သကြားတန်ချိန် နှစ်သိန်းဝန်းကျင်လောက် တင်ပို့ထားတယ်လို့လည်း သကြားအသင်းက သိရပါတယ်။

လက်ရှိမှာ ဗီယက်နမ်နိုင်ငံ တစ်ခုတည်းကိုပဲ မြန်မာ့သကြား တန်ချိန် ၄ သောင်းခွဲ တင်ပို့ရောင်းချဖို့ စာချုပ်ချုပ်ဆိုထားပြီး တန်ချိန် ၅၀၀၀ လောက်သာ တင်ပို့ရသေးတယ်လို့ သိရပါတယ်။

MK-006

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)