မဲခေါင်၊ ဇန်နဝါရီ ၂၀
ပြည်သူလူထုနဲ့ တသားတည်း ရပ်တည်ကာ အာဏာရှင် ချုပ်ငြိမ်းတဲ့အထိ စုပေါင်း ခေါင်းဆောင်မှုနဲ့ အစွမ်းကုန် တိုက်ပွဲဝင်မယ်လို့ ကရင်နီပြည်နယ် အတိုင်ပင်ခံ ကောင်စီ ပြန်လည်ဖွဲ့စည်းရာမှာ ပါဝင်မယ့် အဖွဲ့အစည်း ၆ ခုက ဒီကနေ့ ထုတ်ပြန်ပါတယ်။
အဖွဲ့အစည်း ၆ ခု အနေနဲ့ ပြည်သူလူထုနဲ့အတူ တစ်သားတည်း အတူတကွ ရပ်တည်မှာ ဖြစ်ပြီး စုပေါင်း ခေါင်းဆောင်မှုကို အခြေခံပြီးတော့ စစ်အာဏာရှင် စနစ်နဲ့ အာဏာရှင်အားလုံး ချုပ်ငြိမ်းတဲ့အထိ နိုင်ငံရေး၊ စစ်ရေး၊ သံတမန်ရေး တိုက်ပွဲတွေမှာ အစွမ်းကုန် တိုက်ပွဲဝင်သွားမှာ ဖြစ်တယ်လို့ ဖော်ပြခဲ့တာပါ။
ကရင်နီပြည်နယ် အတိုင်ပင်ခံ ကောင်စီ-KSCC အဖွဲ့ဝင်တွေ အဖြစ် ကရင်နီ အမျိုးသား တိုးတက်ရေးပါတီ၊ ကရင်နီ အမျိုးသားများ ကာကွယ်ရေးတပ်၊ ကရင်နီပြည် ကြားကာလ ဥပဒေပြုရေးအဖွဲ့၊ ကရင်နီပြည် အမျိုးသမီးများ အင်အားစု၊ ကရင်နီပြည် လူမျိုးစု လူငယ်အင်အားစုနဲ့ ကရင်နီပြည်နယ် အရပ်ဘက် အဖွဲ့အစည်းတို့ ဖြစ်ပါတယ်။
စစ်အုပ်စုက နိုင်ငံတော် အာဏာကို မတရားသိမ်းယူဖို့ ကြိုးပမ်းခဲ့ပြီး အပြစ်မဲ့ ပြည်သူလူထုကို ဥပဒေမဲ့ ဖမ်းဆီး အကျဉ်းချတာ၊ သတ်ဖြတ်တာ၊ ရွာလုံးကျွတ် မီးရှို့ဖျက်ဆီးတာ၊ အမျိုးသမီးများ အပေါ် လိင်ပိုင်းဆိုင်ရာ အကြမ်းဖက်တာ အစရှိတဲ့ လူသားမဆန်တဲ့ လုပ်ရပ်တွေ ကျူးလွန်နေတယ်လို့ ထုတ်ပြန်ချက်မှာ ဖော်ပြပါတယ်။
ဒါ့အပြင် နိုင်ငံအတွင်းရှိ လူငယ်တွေ၊ အမျိုးသမီးတွေ၊ ပြည်သူတွေ၊ အရပ်ဘက်အသင်းအဖွဲ့တွေ၊ နိုင်ငံရေး ပါတီတွေ၊ ၂၀၂၀ ရွေးကောက်ခံ လွှတ်တော်ကိုယ်စားလှယ်တွေ၊ သပိတ်အဖွဲ့တွေ၊ CDM တွေနဲ့ တိုင်းရင်းသား တော်လှန်ရေး အဖွဲ့အစည်းတွေက စစ်အာဏာရှင်စနစ် ချုပ်ငြိမ်းရေးအတွက် အင်တိုက် အားတိုက် တိုက်ပွဲဝင်နေကြတယ်လို့လည်း ဖော်ပြထားပါတယ်။
ကရင်နီပြည်နယ် အတိုင်ပင်ခံကောင်စီ အတွင်းမှာ ပါဝင်တဲ့ အဖွဲ့အစည်းတွေ အားလုံးက စစ်အာဏာရှင်နဲ့ အာဏာရှင် မှန်သမျှ အမြစ်ပြတ်ကျဆုံးရေးနဲ့ ဖက်ဒရယ် ဒီမိုကရေစီ ပြည်ထောင်စုကြီး တည်ဆောက်ရေးတို့ အတွက် ကြိုးပမ်းမှာ ဖြစ်တယ်လို့ ဆိုပါတယ်။
ကရင်နီပြည်နယ်ရဲ့ ကိုယ်ပိုင်ပြဌာန်းခွင့်၊ ပြည်နယ် အချုပ်အချာ အာဏာ ပိုင်ဆိုင်ခွင့်တို့ကို တော်လှန်ရေးကာလ ကြားကာလက စတင်ပြီး အကောင်အထည် ဖော်ဆောင် ကျင့်သုံးသွားဖို့ လိုအပ်နေတယ် ဆိုပြီးတော့လည်း ထုတ်ပြန်ချက်မှာ ဖော်ပြထားပါတယ်။
MK-003
