မဲခေါင်၊ ဇန်နဝါရီ ၁၉
မန္တလေးတိုင်း၊ ကျောက်ဆည်မြို့နယ်၊ သာစည်လေးကျေးရွာက စစ်ကောင်စီ သတင်းပေး ဆိုသူကို မနေ့ည ၈ နာရီခန့်မှာ သေနတ်ပစ်ခတ် ရှင်းလင်းခဲ့တယ်လို့ People Revolution Force-Kyaukse တာဝန်ခံ ဗိုလ်စစ်နိုင်က ပြောပါတယ်။
အသတ်ခံရသူဟာ အသက် ၄၀ ကျော်အရွယ် ဦးထွန်းဦး ဆိုသူ ဖြစ်ကာ နေအိမ်ကနေ ထွက်လာပြီး လမ်းပေါ် အရောက်မှာ ဦးခေါင်းနဲ့ ရင်အုံကို သေနတ် ၂ ချက် ပစ်ခတ်ရှင်းလင်း ခဲ့တယ်လို့ ဆိုပါတယ်။
ဦးထွန်းဦးဟာ စစ်အာဏာသိမ်းပြီး ကတည်းက စစ်ကောင်စီ သတင်းပေးလုပ်ပြီး ပြည်သူလူထုကို ဒုက္ခ အမျိုးမျိုး ပေးနေသူ ဖြစ်သလို လက်ရှိ စစ်ကောင်စီရဲ့ ရွေးကောက်ပွဲ အတွက် အစည်းအဝေး တက်တာ၊ သန်းခေါင်စာရင်း ကောက်တာတွေကို ဦးစီး လုပ်ဆောင်နေတာကြောင့် ရှင်းလင်းခဲ့တာလို့ ဗိုလ်စစ်နိုင်က ဆိုပါတယ်။
စစ်ကောင်စီနဲ့ ပူးပေါင်းပြီး ပြည်သူတွေကို ဒုက္ခပေးနေတဲ့ အုပ်ချုပ်ရေးမှူးတွေနဲ့ ဒလန်တွေ အနေနဲ့လည်း မိမိရဲ့ လုပ်ရပ်တွေ ဆက်ပြီး လုပ်နေပါက အပြင်းထန်ဆုံး ထိရောက်စွာ အရေးယူသွားမယ်လို့ People Revolution Force Kyaukse အဖွဲ့က သတိပေးထားပါတယ်။
MK-003
