မဲခေါင်၊ ဇန်နဝါရီ ၁၉
မွန်ပြည်နယ်၊ ဘီးလင်းမြို့ရှိ ခလရ (၈) တပ်ရင်း၊ ခမရ (၃) တပ်ရင်း၊ ထွေအုပ်ရုံးနဲ့ ရဲစခန်းတို့ ဒရုန်းနဲ့ တိုက်ခိုက်ခံရပြီး စစ်သားတစ်ဦး သေဆုံးကာ ဒဏ်ရာ အပြင်းအထန်ရသူတွေ ရှိတယ်လို့ Hawk Revolutionary Squad -HRS က ဒီကနေ့ ထုတ်ပြန်ပါတယ်။
မနေ့က မနက် ၁၀ နာရီ ၅၈ မိနစ်မှာ ဘီးလင်းမြို့မရဲစခန်းနဲ့ ထွေအုပ်ရုံး တို့ကို Hawk Revolutionary Squad-HRS နဲ့ KNLA ပူးပေါင်းတပ်ဖွဲ့မှ ၆၀ မမ ဗုံးသီးတွေနဲ့ တိုက်ခိုက်ခဲ့တာလို့ သိရပါတယ်။
ရဲစခန်းကို ဗုံးသီး ၃ လုံး၊ ထွေအုပ်ရုံးကို ဗုံးသီး တစ်လုံးနဲ့ တိုက်ခိုက်ခဲ့တာဖြစ်ပြီး ဗုံးသီး စုစုပေါင်း ၄ လုံး ပစ်မှတ် တိကျစွာ ထိမှန်ပေါက်ကွဲ ခဲ့တယ်လို့ ဆိုပါတယ်။
တိုက်ခိုက်ခံရတဲ့ စစ်ကောင်စီတပ်ဘက်က လက်နက်ငယ်၊ လက်နက်ကြီးတွေနဲ့ ပြန်လည် ပစ်ခတ်မှုတွေ ပြုလုပ်ခဲ့တယ်လို့ သိရပါတယ်။
အဲဒီ တိုက်ခိုက်မှုမှာ ရဲစခန်းမှ ရဲ ၃ ဦး ပြင်းထန်စွာ ဒဏ်ရာရရှိပြီး ကားတစ်စီး ပျက်စီးကာ ထွေအုပ်ရုံးမှာမူ အဆောက်အဦ ထိခိုက်ပျက်စီးသွားတာကို ကနဦး သိရတယ်လို့ ဆိုပါတယ်။
နေ့လယ် ၁၂ နာရီမှာတော့ ဘီးလင်းမြို့တွင်း စစ်ကောင်စီရဲ့ ခလရ (၈) တပ်ရင်းကို ပူးပေါင်းတပ်မှ ဗုံးသီး ၄ လုံးနဲ့ တိုက်ခိုက်ခဲ့ရာ တပ်ရင်းဝန်း အတွင်းသို့ ဗုံးသီးအားလုံး ထိမှန်ပေါက်ကွဲ ခဲ့တယ်လို့ သိရပါတယ်။
တစ်ချိန်တည်းမှာ ကင်းပုန်းဝပ်နေတဲ့ စစ်ကောင်စီတပ်သားတွေက လက်နက်ငယ်တွေနဲ့ ပစ်ခတ်တာကြောင့် ပူးပေါင်း တပ်ဖွဲ့မှ ၄၀ မမ ၂ လုံးနဲ့ ပြန်လည် ပစ်ခတ်တိုက်ခိုက် ခဲ့တယ်လို့ ဆိုပါတယ်။
ဒီတိုက်ခိုက်မှုမှာ ခလရ (၈) တပ်ရင်း အတွင်းမှ စစ်ကောင်စီတပ်သား တစ်ဦး သေဆုံးပြီး အခြား ထိခိုက်ဒဏ်ရာ ရသူတွေ ရှိတယ်လို့ သိရပါတယ်။
ညနေ ၅ နာရီခွဲမှာတော့ ဘီးလင်းမြို့ ကဇိုင်းဆည် အနီးရှိ စစ်ကောင်စီ ခမရ (၃) တပ်ရင်းကို ပူးပေါင်းတပ်ဖွဲ့မှ ဗုံးသီး ၃ လုံးနဲ့ တိုက်ခိုက်ခဲ့ရာ တပ်ရင်းအတွင်း အစည်းအဝေး ပြုလုပ်ချိန်မှာ ဗုံးသီးတွေ ထိမှန်ခဲ့တာကြောင့် ထိခိုက်ဒဏ်ရာ ရရှိသူ များပြားတယ်လို့ ဆိုပါတယ်။
တိုက်ခိုက်မှုကြောင့် ရှေ့တန်း ထွက်ရမယ့် အရာခံ ဗိုလ် ၃ ဦး အပါအဝင် ၈ ဦး ပြင်းထန်စွာ ထိခိုက်ဒဏ်ရာ ရရှိကာ ဒဏ်ရာရရှိသူ တွေကို တပ်ရင်း အတွင်း ဆေးကုပေးနေတယ်လို့ ကနဦး သတင်းရရှိထားပြီး အမှန်တကယ် ထ်ခိုက်ဒဏ်ရာရသူ အရေအတွက် ပိုမို များပြားနိုင်တယ်လို့ သိရပါတယ်။
စစ်ကောင်စီဘက်မှ ထိခိုက်သေဆုံးမှုတွေကို မြေပြင်သတင်းရင်းမြစ်တွေ၊ တပ်တွင်းမှ သတင်းပေးချက်တွေနဲ့ အတည်ပြုထားတာလို့ Hawk Revolutionary Squad-HRS က ထုတ်ပြန်ထားပါတယ်။
Aerial Bomb တွေ ဆက်လက်ထုတ်လုပ်နိုင်ဖို့ နဲ့ Missions တွေ ဆက်လက်လုပ်ဆောင်နိုင်ဖို့ ခက်ခဲ နေတာကြောင့် ပြည်သူတွေ အနေနဲ့ အားထည့် ကူညီပေးကြဖို့လည်း HRS အဖွဲ့တာဝန်ခံက မေတ္တာရပ်ခံ ထားပါတယ်။
MK-003
