မဲခေါင်၊ ဇန်နဝါရီလ ၁၉
မွန်ပြည်နယ်၊ သံဖြူဇရပ်မြို့နယ်၊ ထင်းရှုးကျေးရွာ အခြေစိုက် (င) အဆင့်ရှိ နယ်မြေရဲစခန်းကို ဝင်ရောက် တိုက်ခိုက်ရာ စစ်သားနဲ့ရဲ ၃ ဦး သေဆုံးပြီး ၅ ဦး ပြင်းထန် ဒဏ်ရာရခဲ့တယ်လို့ YGF ရေးပြောက်ကျားတပ်ဖွဲ့ တာဝန်ခံ ဗိုလ်ကျန်ရစ်က ပြောပါတယ်။
မနေ့ မနက် ၆ နာရီခွဲက စစ်ကောင်စီ အင်အား ၁၀ ဦးနီးပါးရှိတဲ့ နယ်မြေ ရဲစခန်းကို ၄၀ မမ ဗုံးသီးလောင်ချာ ၁၂ လုံးနဲ့ ပစ်ခတ်ပြီး စီးနင်း ဝင်ရောက်တိုက်ခိုက်ရာ မိနစ် ၂၀ ခန့် တိုက်ပွဲ ဖြစ်ပွားခဲ့တယ်လို့ သိရပါတယ်။
“စခန်းသိမ်းဖို့ထိ ကြိုးစားခဲ့ပေမဲ့ အချိန်မရလို့ ပြန်ဆုတ်ခွာခဲ့ရပါတယ်။ ကျနော်တို့ဘက်ကတော့ ဘေးကင်းစွာနဲ့ အောင်ပွဲဆင်နိုင်ပြီး ပြန်လာခဲ့ပါတယ်” လို့ ဗိုလ်ကျန်ရစ်က ဆိုပါတယ်။
လက်ရှိ ရေးပြောက်ကျားတပ်ဖွဲ့မှ ရဲဘော်တွေ အထိခိုက်မရှိဘဲ လွတ်မြောက်နယ်မြေသို့ ပြန်လည် ရောက်ရှိနေပြီလို့ သူကပြောပါတယ်။
ပြီးခဲ့တဲ့ ဇန်နဝါရီ ၁၁ ရက်ကလည်း ရေးမြို့၊ လမိုင်းမြို့နယ် နှစ်ကရင်ရွာရှိ နယ်မြေ ရဲစခန်းနဲ့ စစ်ကောင်စီဂိတ်ကို YGF ရေးပြောက်ကျားတပ်ဖွဲ့က တိုက်ခိုက်ခဲ့ရာ စစ်ကောင်စီတပ်ဘက်မှ သေဆုံးမှုတွေ ရှိခဲ့တယ်လို့ သိရပါတယ်။
MK-003
