မဲခေါင်၊ ဇန်နဝါရီ ၁၇
တောင်ကိုရီးယား အလုပ်အကိုင် အရည်အချင်းစစ် စာမေးပွဲ EPS ရဲ့ ကုန်ထုတ်လုပ်ငန်း ပထမအသုတ် အတွက် အောင်မြင်သူ ၆,၀၀၀ ကျော်အထိ ရှိတာကြောင့် စာမေးပွဲ သမိုင်းတစ်လျှောက် စံချိန်တင် အောင်မြင်မှု အများဆုံး ဖြစ်တယ်လို့ စာမေးပွဲ ကျင်းပရေး အဖွဲ့ထံမှ သိရပါတယ်။
ဒီစာမေးပွဲကို ၂၀၂၂ နှစ်ကုန်ပိုင်းက ပြုလုပ်ခဲ့တာဖြစ်ပြီး ဝင်ရောက် ဖြေဆိုသူ လူငယ် ၁၀,၀၀၀ ကျော်ထဲက ၆,၄၀၀ နီးပါးအထိ အောင်မြင်ခဲ့တာ ဖြစ်တယ်လို့ အစိုးရ ပြည်ပ အလုပ်အကိုင် အေဂျင်စီ-POEA ရဲ့ အောင်စာရင်း ထုတ်ပြန်ချက်အရ သိရပါတယ်။
“ဒီအကြိမ်က ဝင်ဖြေတဲ့သူ များသလောက် အောင်ချက်ကလည်း များတာ တွေ့ရတယ်။ နောက်ဖြေမယ့် သူ တွေအတွက် အားရှိတာပေါ့။ အခွင့်အရေး ပိုများလာတာ တွေ့ရတယ်။ အောင်မြင်တဲ့သူတွေ အတွက်ကတော့ အခွင့်လမ်းကောင်း ဖြစ်လာမယ် မျှော်လင့်ရတယ်” လို့ ကိုရီးယား ဘာသာစကား သင်တန်းဆရာတစ်ဉီးက ပြောပါတယ်။
အခု ရလဒ်ဟာ EPS စာမေးပွဲ သမိုင်း တစ်လျှောက် အောင်မြင်မှု အများဆုံးဖြစ်ပြီး တောင်ကိုရီးယားနိုင်ငံရဲ့ လုပ်သား တိုးမြှင့် ခေါ်ယူမယ်ဆိုတဲ့ အစီအစဉ်ရဲ့ သက်ရောက်မှု ဖြစ်နိုင်တယ်လို့ ကိုရီးယားဘာသာ သင်တန်းကျောင်း ဆရာတွေက သုံးသပ်ပါတယ်။
“Exam Results ထွက်ပြီးတော့လည်း ကျွန်တော်တို့မှာ ထွက်ဖို့ပြင်ဆင်တဲ့ အပိုင်းတွေရှိတယ်။ ဒါပေမယ့် Passport ရုံးတွေ ပိတ်ထားပြီး အပြင်ပွဲစားနဲ့ လုပ်ကြတဲ့အခါ အခကြေးငွေ အလွန်ကုန်ကျတာ၊ အလိမ်ခံရတာ ဒီအခြေအနေတွေကြောင့် လုပ်သား နစ်နာရတာတွေရှိတယ်။ ပုဂ္ဂလိက အလုပ်သမား စေလွှတ်ရေး အေဂျင်စီ တော်တော်များကတော့ Company Demand နဲ့ အမြန် လုပ်ပေးနေတာတွေလည်း ရှိပါတယ်။ တချို့ အလုပ်အကိုင် အေဂျင်စီတွေကျတော့ အလုပ် ဖောင်တင်သည့်အခါ Passport သက်တမ်း ၁ နှစ်ကျန် ရှိရမယ် ဆိုတဲ့ ကန့်သတ်ချက် အခက်အခဲတွေတော့ ရှိတယ်” လို့ စာမေးပွဲ အောင်မြင်သူတစ်ဉီးက ပြောပါတယ်။
အဆိုပါ စာမေးပွဲ အားလုံးကို ဝင်ရောက်ဖြေဆိုဖို့ လျှောက်ထားသူ ၃၇,၀၀၀ ကျော်ရှိပြီး လက်ရှိမှာ ကုန်ထုတ် ဒုတိယ အသုတ်နဲ့ ဆောက်လုပ်ရေး စာမေးပွဲကို ဖေဖော်ဝါရီ ကနေ ဇွန်လအထိ အသုတ်လိုက် ဆက်ကျင်းပဖို့ ရှိနေပါတယ်။
တောင်ကိုရီးယား အစိုးရသည် အခုနှစ်အတွင်း မြန်မာ အပါအဝင် နိုင်ငံခြားသားလုပ်သား ၁၂၀,၀၀၀ ကျော် ခေါ်ယူမယ်လို့ ထုတ်ပြန်ထားပြီး လက်ရှိ မြန်မာလုပ်သား ၅၀,၀၀၀ နီးပါး လုပ်ကိုင်နေတယ်လို့ သိရပါတယ်။
MK-010
