မဲခေါင်၊ ဇန်နဝါရီ ၁၆
အာဏာမသိမ်းမီ တစ်လအလိုမှာ အစ္စရေး Cognyte ကုမ္ပဏီက စစ်ကောင်စီထံ ကြားဖြတ် Spyware ရောင်းချဖို့ တင်ဒါအောင်ခဲ့ကြောင်း ပေါက်ကြားခဲ့တာကြောင့် အစ္စရေးတရားရုံးချုပ်ထံ အစ္စရေးဦးဆောင် လူ့အခွင့်အရေးအဖွဲ့တွေက တိုင်ကြားထားပါပြီ။
အစ္စရေးတရားရုံးချုပ်ဟာ မြန်မာစစ်တပ် ရိုဟင်ဂျာတွေကို အစုလိုက်အပြုံလိုက်သတ်ဖြတ်မှုနဲ့ပတ်သက်လို့ ၂၀၁၇ ခုနှစ် ဒေါ်အောင်ဆန်းစုကြည်ဦးဆောင်တဲ့ အစိုးရလက်ထက်ကတည်းက စစ်ဘက်ဆိုင်ရာပစ္စည်းတွေရောင်းချမှု ပိတ်ပင်ကြောင်း ကြေညာခဲ့တဲ့ နိုင်ငံဖြစ်ပါတယ်။
ဒါပေမဲ့ ကြားကာလတွေမှာ မြန်မာစစ်ကောင်စီထံ လက်နက်တွေတင်ပို့နေတယ်ဆိုတဲ့စွပ်စွဲချက်တွေအကြိမ် ကြိမ်ကို ငြင်းဆိုခဲ့ပြီး အခုနောက်ဆုံး မြန်မာစစ်တပ်ပိုင် MPT ထံ Cognyte ကုမ္ပဏီက ၂၀၂၀ ဒီဇင်ဘာ ၃၀ ရက်စွဲနဲ့လိပ်မူပြီး ဖုန်းကြားဖြတ်စောင့်ကြည့် ဆော့ဖ်ဝဲလ်ဖြစ်တဲ့ Intercept Spyware စနစ် ရောင်းချကြောင်း ရိုက်တာသတင်းဌာနက စာချုပ်အထောက်အထားနဲ့ပါ ဖော်ထုတ်တင်ပြနိုင်ခဲ့တာဖြစ်ပါတယ်။
ဒါကြောင့် အစ္စရေး နိုင်ငံသား ၆၀ ကျော်ပါဝင်တဲ့ ဦးဆောင် လူ့အခွင့်အရေးအဖွဲ့တွေက အစ္စရေး တရားရုံးချုပ်ထံ လိပ်မူပြီး ဇန်နဝါရီ ၁၅ ရက်နေ့မှာ အစ္စရေးရှေ့နေချုပ်ထံ လိပ်မူပြီး လက်မှတ်ရေးထိုးတိုင်ကြားခဲ့ကြပါတယ်။
အစ္စရေးလူ့အခွင့်အရေးရှေ့ဆောင် ရှေ့နေဖြစ်တဲ့ အီတေမက်ခ်က Cognyte ကုမ္ပဏီနဲ့ အစ္စရေးနိုင်ငံ ခြားရေးဝန်ကြီးဌာနက အမည်မဖော်ပြသေးတဲ့ အရာရှိတစ်ဦး ပူးပေါင်းပြီး စစ်ကောင်စီရဲ့ MPT တယ်လီကွန်း ကုမ္ပဏီထံ စောင့်ကြည့် Spyware ရောင်းချခဲ့ခြင်းဟာ လူ့အခွင့်အရေးချိုးဖောက်မှုဖြစ်ကြောင်း၊ မြန်မာစစ်တပ် ကို စစ်အသုံးအဆောင်ပစ္စည်းတင်ပို့ခွင့်ပိတ်ပင်ထားတဲ့ကြားက Cognyte ကုမ္ပဏီကို Intercept Spyware စနစ် ရောင်းချဖို့ ခွင့်ပြုမိန့်ပေးခဲ့တဲ့ အစိုးရတာဝန်ရှိသူတွေကိုလည်း စုံစမ်းဖော်ထုတ်အရေးယူဖို့ တိုင်ကြားခဲ့တာ ဖြစ်တယ်လို့ ပြောသွားပါတယ်။
MPT ဖုန်းကွန်ရက်တွေမှာ စာသားပေးပို့မှု၊ ဖုန်းပြောဆိုမှု၊ အီးမေးလ်သုံးစွဲမှုအားလုံးကို ကြားဖြတ်ခိုးနားထောင် သိရှိစေတဲ့ Intercept Spyware စနစ်တွေ တပ်ဆင်ပြီးစီးနေပြီဖြစ်ကြောင်း စစ်တပ်ကိုကြောက်လို့ အမည်မဖော် လိုတဲ့ MPT ဝန်ထမ်းနှစ်ဦးက ရိုက်တာကို အတည်ပြုပြောကြားထားပါတယ်။
ဒီကိစ္စနဲ့ပတ်သက်လို့ ရိုက်တာက MPT အပြင် ပူးတွဲအလုပ်လုပ်နေတဲ့ ဂျပန် KDDI Corp.နဲ့ Sumitomo Corp တို့ကို ဆက်သွယ် မေးမြန်းပေမယ် တစ်စုံတစ်ရာ တုံ့ပြန်ခြင်းမရှိသလို အစ္စရေး ရှေ့နေချုပ်၊ Cognyte ကုမ္ပဏီ ကိုယ်စားလှယ် တွေ၊ အစ္စရေးနိုင်ငံခြားရေးဝန်ကြီးဌာန အားလုံးဆီ ရိုက်တာက လိုက်စုံစမ်းပေမယ့် ဘယ်သူကမှ တုံ့ပြန်ဖြေကြား ခြင်းမရှိသေးဘူးလို့ ဖော်ပြခဲ့ပါတယ်။
Intercept Spyware စနစ်ဟာ အစ္စရေးမှာ စစ်အသုံးအဆောင်ပစ္စည်း စာရင်းဝင်ပြီး ရာဇဝတ်မှုတွေကို လိုက်လံ စုံစမ်းတဲ့အခါမှာသာ အသုံးပြုရတာဖြစ်ပြီး အများပြည်သူသုံးဖုန်းစနစ်ထဲ ထည့်သွင်းခွင့်မရှိပါဘူး။
အများပြည်သူသုံး ဖုန်းကွန်ရက်တွေမှာ စစ်ကောင်စီက ဒီ Intercept Spyware စနစ်ကို ထည့်သွင်းအသုံးပြုခြင်းဟာလည်း နိုင်ငံတကာဥပဒေအရ လူ့အခွင့်အရေးချိုးဖောက်မှုမြောက်ပါတယ်။
Cognyte ကုမ္ပဏီကို အကောင့်တုတွေစီမံပြီး သတင်းအချက်အလက်ခိုးမှု၊ မဟုတ်မမှန်သတင်းတင်မှုကြောင့် ၂၀၂၁ ခုနှစ်ကတည်းက ဖေ့စ်ဘုတ်ကုမ္ပဏီ (META) က ပိတ်ပင်ထားသလို နော်ဝေအချုပ်အခြာအာဏာပိုင် ငွေကြေးရန်ပုံငွေအဖွဲ့ကလည်း ပြီးခဲ့တဲ့လက ပိတ်ပင်တဲ့စာရင်းထဲ ထည့်သွင်းထားပါတယ်။
အများပြည်သူ လူ့အခွင့်အရေးချိုးဖောက်မှုဖြစ်တဲ့ စောင့်ကြည့်နည်းပညာတွေကို ထုတ်လုပ်လို့ ပိတ်ပင်လိုက်ကြတာဖြစ်ပြီး ဒီကုမ္ပဏီရဲ့ မနှစ်က တစ်နှစ်တာဝင်ငွေဟာ ဒေါ်လာ ၄၇၄ သန်းရှိခဲ့တယ်လို့ သိရပါတယ်။
MKF – 001
Ref: Reuter
#MeKongNews
