မဲခေါင်၊ ဇန်နဝါရီ ၁၅
ရှမ်းပြည်နယ်တောင်ပိုင်း၊ ညောင်ရွှေမြို့နယ်မှာ တိုက်ပွဲဖြစ်ပြီးနောက်ပိုင်း စစ်တပ်၊ ရဲနဲ့ ပျူစောထီးတွေက အရပ်ဝတ်တွေနဲ့ စုံစမ်းထောက်လှမ်းနေတယ်လို့ တော်လှန်ရေးအင်အားစုသတင်းရင်းမြစ်တွေထံကနေ သိရပါတယ်။
ညောင်ရွှေမြို့ပေါ်နဲ့ မြို့နီးစပ်ရွာတွေမှာ အရပ်ဝတ်တွေနဲ့ စစ်တပ်၊ ရဲနဲ့ ပျူစောထီးတွေဟာ ကုန်လမ်းသာမက ရေလမ်းမှာပါ ခေါက်တုန့်ခေါက်ပြန် ကင်းလှည့်ထောက်လှမ်းနေတယ်လို့ သတင်းရင်းမြစ်တစ်ဦးက မဲခေါင်ကို ပြောပါတယ်။
“ကုန်လမ်းပိတ်ဆို့ပြီး စစ်တာအပြင် ရေလမ်းကိုပါ ခေါက်တို့ခေါက်ပြန် လှည့်ပတ်သွားနေသလို ခေါင်တိုင်နဲ့စံကားဖက် မှာ တရပ်စပ်ပိတ်ဆို့ထားတယ်။ ယူနီဖောင်းနဲ့မဟုတ်ပဲ အရပ်ဝတ်သီးသန့်နဲ့ကို ထောက်လှမ်းနေတာပါ။ ထပ်ဖမ်းခံရတယ်တော့ မကြားသေးဘူး”လို့ သူက ပြောပါတယ်။
ဒါ့အပြင် မြို့ဝင်မြို့ထွက်စစ်ဆေးရေးဂိတ်တွေမှာ စစ်ကောင်စီအထိုင်ချထားတဲ့ ကျေးရွာချင်းဆက်လမ်းမကြီးတချို့မှာ ဒေသခံပုံစံမဟုတ်သူ(ခရီးသွား)တွေနဲ့ ကျောပိုးအိတ်၊ လွယ်အိတ်ပါလာတဲ့ လူငယ်လူရွယ်တွေကို ရှာဖွေစစ်ဆေးမှုတွေ ပြုလုပ်နေတယ်လို့ သိရပါတယ်။
တိုက်ပွဲဖြစ်ပွားပြီးနောက် စစ်ကောင်စီတပ်ဟာ ဟဲဟိုး-တောင်လေးလုံး (ခေါင်တိုင်)လမ်းခွဲကနေ သန်းထောင်ရွာအကျော် တောင်ဖက် ပေါင်းပိန်းရွာအထိ ရက်အတန်ကြာလမ်းပိတ်ထားပြီး အခုချိန်မှာတော့ ပြန်လည်ဖွင့်လှစ်ထားပေမယ့် စစ်ဆေးမှုတွေ တင်းကြပ်ထားတယ်လို့လည်း သိရပါတယ်။
ပြီးခဲ့တဲ့ ဇန်နဝါရီ ၃ ရက်က ညောင်ရွှေမြို့နယ် အနောက်ဘက်၊ ညောင်ရွှေ-ခေါင်တိုင် လမ်းပေါ်မှာရှိတဲ့ သန်းထောင်ရွာနဲ့ ဘုရားနီရွာကြားမှာ ရှမ်းတောင် PDF နဲ့ စစ်ကောင်စီတပ်တို့ အပြန်အလှန် ဖြစ်ပွားခဲ့တာ ဖြစ်ပါတယ်။
MK-008
#MeKongNews
