မနေ့က ဇန်နဝါရီလ ၄ ရက်၊ မနက် ၈ နာရီကျော်က စစ်ကောင်စီနဲ့ ဆက်ဆံရေး ကောင်းမွန်တဲ့ ရခိုင်ပြည် လွတ်မြောက်ရေးပါတီ-ALP ရဲ့ ဗဟိုအလုပ်မှုဆောင် ကော်မတီဝင်၊ ရခိုင်ပြည် လွတ်မြောက်ရေး တပ်မတော်-ALA ရဲ့ စစ်ဦးစီးချုပ် ဗိုလ်ချုပ်ခိုင်စိုးမြ၊ အမှတ်(၁၀၁) တပ်ရင်းမှူး ဒုတိယ ဗိုလ်မှူးကြီးခိုင်ကျော်စိုးနဲ့ ဗိုလ်ကြီးခိုင်သူရိန္ဓ တို့ ၃ ဦးဟာ စစ်တွေမြို့မှာ ကားနဲ့ သွားနေစဉ် ရခိုင်အမျိုးသား အဖွဲ့ချုပ်/ ရက္ခိုင့်တပ်တော်-ULA/AA မှ အကြမ်းဖက် လုပ်ကြံတာကြောင့် စီးလာတဲ့ ကားပေါ်မှာပဲ သေနတ်ဒဏ်ရာ များစွာနဲ့ ကွယ်လွန် ခဲ့တယ်လို့ ALP က ထုတ်ပြန် စွပ်စွဲ ထားပါတယ်။
ဗိုလ်ချုပ်ခိုင်စိုးမြနဲ့ တပ်မှူး ၂ ဦးကို ULA/AA က ရခိုင်အမျိုးသား အချင်းချင်းကြား လူသားမဆန် အကြမ်းဖက် လုပ်ကြံတာဟာ ရခိုင်တမျိုးသားလုံး စည်းလုံး ညီညွတ်ရေးကို ထိခိုက်ပျက်စီးစေရုံ သာမက ရခိုင်ပြည်သူတွေ ကိုပါ တုန်လှုပ်ချောက်ချားစေတဲ့ အတွက် ပြင်းပြင်းထန်ထန် ကန့်ကွက်ရှုတ်ချလိုက်တယ်လို့ ထုတ်ပြန်စာမှာ ပါရှိပါတယ်။
ဗိုလ်ချုပ်ခိုင်စိုးမြဟာ ရခိုင်ပြည်လွတ်မြောက်ရေး အတွက် ၁၉၈၄ ခုနှစ်မှ စပြီး နှစ်ပေါင်း ၄၀ ခန့် ပါတီ- တပ်မတော်မှာ တာဝန် ထမ်းဆောင်လာခဲ့တယ်လို့လည်း ဖော်ပြထားပါတယ်။
သူဟာ မဟာမိတ် ကရင်ပြည်နဲ့ အနောက်ဖက် စစ်ဒေသ-ရခိုင်ပြည် တို့မှာ ပါတီ-တပ်မတော်မှ ပေးအပ်တဲ့ တာဝန်အဆင့်ဆင့်ကို ကျေပွန်စွာ ထမ်းဆောင်ခဲ့တဲ့ စစ်ဘက် ခေါင်းဆောင်တစ်ဦး ဖြစ်တယ်လို့လည်း ဆိုပါတယ်။
ဗိုလ်ချုပ်ခိုင်စိုးမြနဲ့ တပ်မှူး ၂ ဦး လုပ်ကြံ သတ်ဖြတ်ခံရတာက မိမိတို့ ပါတီ-တပ်မတော်နဲ့ ခိုင်ပြည်သူတွေ အတွက် အစားထိုး မရတဲ့ ဆုံးရှုံးမှု ဖြစ်တယ်လို့လည်း ဆိုထားပါတယ်။
ULA/AA က မိမိတို့ ပါတီ-တပ်မတော်မှ ခေါင်းဆောင်တွေ၊ ပါတီဝင်တွေနဲ့ တပ်ဖွဲ့ဝင်တွေကို ဖမ်းဆီးနှိပ်စက်တာ လုပ်ကြံသတ်ဖြတ်တာ တို့ကို ပြုလုပ်နေရုံ သာမက ရခိုင်နိုင်ငံရေးပါတီတွေမှ ခေါင်းဆောင် တွေ၊ ပါတီဝင်တွေ အပြစ်မဲ့ ရဟန်းသံဃာတွေနဲ့ ပြည်သူတွေကိုပါ မချန် ဥပဒေမဲ့ ဖမ်းဆီးနှိပ်စက်တာ၊ လုပ်ကြံ သတ်ဖြတ်တာတွေကို ဆက်တိုက် ပြုလုပ်နေတာတွေ အတွက် တရားမျှတမှုရရှိဖို့ ဆောင်ရွက်သွားမှာ ဖြစ်တယ်လို့လည်း ရခိုင်ပြည်လွတ်မြောက်ရေးပါတီ ဗဟိုဌာနချုပ် က ထုတ်ပြန်ကြေငြာထားပါတယ်။
ဒီထုတ်ပြန် ကြေညာချက်ပါ စွပ်စွဲချက်တွေနဲ့ ပတ်သက်ပြီး ရခိုင်အမျိုးသား အဖွဲ့ချုပ်/ ရက္ခိုင့်တပ်တော်-ULA/AA အနေနဲ့ တုံ့ပြန်တာ မရှိသေးပါဘူး။
