စစ်တပ် အာဏာသိမ်းပြီး နောက်ပိုင်း တန့်ဆည်မြို့နယ်ရှိ ကျေးရွာ ၈၃ ရွာမှ လူနေအိမ် ၃,၄၇၄ လုံး၊ သာသနိက အဆောက်အဦ ၉ လုံး၊ စာသင်ကျောင်း တစ်ကျောင်းနဲ့ ဆေးရုံ ဆေးခန်းတစ်ခုကို စစ်ကောင်စီတပ်က မီးရှို့ဖျက်ဆီး ခဲ့တယ်လို့ သိရပါတယ်။
ဒါ့အပြင် စစ်ကောင်စီတပ်ဖွဲ့တွေက ပြည်သူ ၈၁ ဦးကို သတ်ဖြတ်ခဲ့ပြီး ဒေသခံ အမျိုးသမီး တစ်ဦးကိုလည်း အဓမ္မပြုကျင့်ခဲ့တယ်လို့ တန့်ဆည်- ပအဖ ရဲ့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီတပ်ဖွဲ့ရဲ့ မီးရှို့ဖျက်ဆီးမှုကြောင့် တန့်ဆည်မြို့နယ်ရှိ ဒေသခံ ၁၅,၆၃၀ ဦး အိုးအိမ်မဲ့ ဖြစ်ခဲ့ရပြီး ပြည်သူ ၁၈,၀၀၀ ဦး နေရပ်စွန့်ခွာ ထွက်ပြေး တိမ်းရှောင် နေရတယ်လို့ ဆိုပါတယ်။
ဒီနေ့ အထိ တန့်ဆည်မြို့နယ် ပြည်သူ့အုပ်ချုပ်ရေးအဖွဲ့၊ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဌာနနဲ့ အမျိုးသမီး၊ လူငယ်နှင့် ကလေးသူငယ်ရေးရာဌာနတို့က ကျပ် ၈၁,၇၃၉,၂၀ဝ ကျပ် တိတိကို အကူအညီ လိုအပ်တဲ့ နေရာ အသီးသီးသို့ ထောက်ပံ့နိုင်ခဲ့တယ်လို့ သိရပါတယ်။
ဒါ့အပြင် ပအဖအဖွဲ့သို့ ချိတ်ဆက်လှူဒါန်းကြတဲ့ ပြည်တွင်း၊ ပြည်ပ အလှူရှင်တွေရဲ့ ငွေကြေး၊ အစားအစာ၊ အဝတ်အထည် စတာတွေလည်း ထောက်ပံ့ပေးနိုင်ခဲ့တယ်လို့ တန့်ဆည်-ပအဖ က အသိပေးထားပါတယ်။
ပအဖ အဖွဲ့အနေနဲ့ မြို့နယ်တွင်း လူသားချင်း စာနာမှု အကူအညီများ ရရှိနိုင်ဖို့ အခွန်ဘဏ္ဍာ ရှာဖွေတာ၊ သက်ဆိုင်ရာဝန်ကြီးဌာနတွေနဲ့ ချိတ်ဆက်တာ၊ ပြည်တွင်း၊ ပြည်ပ အလှူရှင် တွေနဲ့ ချိတ်ဆက် ဆောင်ရွက်နေတယ်လို့လည်း သိရပါတယ်။
ကုလသမဂ္ဂ အဖွဲ့အစည်းတွေ၊ နိုင်ငံတကာ အဖွဲ့အစည်း တွေနဲ့ အစိုးရ မဟုတ်တဲ့ နိုင်ငံတကာ အဖွဲ့အစည်းတွေ ကလည်း တန့်ဆည်မြို့နယ်သို့ လူသားချင်း စာနာထောက်ထားမှု အကူအညီပေးရေး လုပ်ငန်းတွေ ဆောင်ရွက်ပါက လုံခြုံရေးနဲ့ ထောက်ပံ့ရေး လုပ်ငန်းတွေ ပူးပေါင်း ကူညီ ဆောင်ရွက်ပေးနိုင်ဖို့ အတွက် ပအဖ အဖွဲ့သို့ ချိတ်ဆက် ဆောင်ရွက်ကြဖို့လည်း တန့်ဆည်မြို့နယ် ပြည်သူ့အုပ်ချုပ်ရေးအဖွဲ့က တိုက်တွန်းထားပါတယ်။
